കൊല്ലം, 2026 ജൂൺ 26 –

മേഘാലയയിൽ നിന്ന് തപാൽ പാഴ്സൽ വഴി കഞ്ചാവ് കടത്തിയ കേസിലെ മുഖ്യപ്രതി എക്‌സൈസ് സംഘത്തിന്റെ പിടിയിലായി. പാലക്കാട് കൊല്ലങ്കോട് ത്രാമണി സ്വദേശി ജിജിറ്റ് (19) ആണ് അറസ്റ്റിലായത്. സുഹൃത്തുക്കളുടെ പേരിൽ കഞ്ചാവ് ഓർഡർ ചെയ്ത് കേരളത്തിലെത്തിച്ചെന്നാണ് എക്‌സൈസിന്റെ കണ്ടെത്തൽ. നാലര മാസമായി ഒളിവിൽ കഴിഞ്ഞിരുന്ന പ്രതിയെ കൊല്ലത്തെ പുത്തൂരിലെ വാടകവീട്ടിൽ നിന്നാണ് പിടികൂടിയത്.

പ്രതി ഒളിവിൽ കഴിയുന്ന വിവരം ലഭിച്ചതിനെ തുടർന്ന് എക്‌സൈസ് സംഘം പരിശോധന നടത്തി. പരിശോധനയ്ക്കിടെ വീട്ടിലുണ്ടായിരുന്ന ഇരുപതോളം നായകളെ അഴിച്ചുവിട്ട് രക്ഷപ്പെടാൻ ശ്രമിച്ചതായി എക്‌സൈസ് അറിയിച്ചു. വീടിന് ചുറ്റും നായകളെ നിർത്തി ഉദ്യോഗസ്ഥരെ തടയാൻ ശ്രമിച്ചെങ്കിലും വീട്ടിനുള്ളിൽ കയറി പ്രതിയെ സാഹസികമായി പിടികൂടുകയായിരുന്നു.

സുഹൃത്തുക്കളുടെ പേരിൽ കഞ്ചാവ് എത്തിച്ചതായി മൊഴി

2026 ഫെബ്രുവരി 4ന് കൊല്ലങ്കോട് പോസ്റ്റ് ഓഫീസിലേക്ക് മേഘാലയയിൽ നിന്ന് കഞ്ചാവ് പാഴ്സലായി എത്തിയിരുന്നു. കേസിൽ കൊല്ലങ്കോട് സ്വദേശികളായ ആർ. സഞ്ജയെയും സഹോദരൻ ആർ. രാഹുലിനെയും നേരത്തെ എക്‌സൈസ് അറസ്റ്റ് ചെയ്തിരുന്നു. ചോദ്യം ചെയ്യലിലാണ് ജിജിറ്റാണ് തങ്ങളുടെ പേരിൽ കഞ്ചാവ് ഓർഡർ ചെയ്ത് കേരളത്തിലെത്തിച്ചതെന്ന് ഇരുവരും മൊഴി നൽകിയത്. പാഴ്സൽ പിടിക്കപ്പെട്ടതിന് പിന്നാലെ ജിജിറ്റ് നാലര മാസമായി ഒളിവിലായിരുന്നുവെന്ന് എക്‌സൈസ് അറിയിച്ചു.