ഭവായ്യ നാടൻ സംഗീത പാരമ്പര്യം സംരക്ഷിക്കണമെന്ന് ഉപരാഷ്ട്രപതിയുടെ ആഹ്വാനം

ന്യൂഡൽഹി, 2026 ജൂൺ 26 

വടക്കൻ ബംഗാളിലെയും സമീപ പ്രദേശങ്ങളിലെയും ഭവായ്യ നാടൻ സംഗീത പാരമ്പര്യത്തെക്കുറിച്ചുള്ള പുസ്തകം ഉപരാഷ്ട്രപതി സി. പി. രാധാകൃഷ്ണൻ ന്യൂഡൽഹിയിലെ ഉപരാഷ്ട്രപതി ഭവനിൽ പ്രകാശനം ചെയ്തു. ജയന്ത കുമാർ റോയും സംഗീത റോയും ചേർന്ന് രചിച്ച പുസ്തകമാണ് പ്രകാശനം ചെയ്തത്. ചടങ്ങിൽ സംസാരിക്കവെ ഇന്ത്യയുടെ സാംസ്കാരിക പൈതൃകം സംരക്ഷിക്കേണ്ടത് കാലത്തിന്റെ ആവശ്യമാണ് എന്ന് അദ്ദേഹം പറഞ്ഞു.

ഭവായ്യ നാടൻ സംഗീതം സാധാരണ ജനങ്ങളുടെ വികാരങ്ങളും പ്രതീക്ഷകളും ജീവിതാനുഭവങ്ങളും പ്രതിഫലിപ്പിക്കുന്നതാണെന്ന് ഉപരാഷ്ട്രപതി പറഞ്ഞു. കൊച്ച് രാജ്ബൻഷി സമൂഹത്തിന്റെ സമ്പന്നമായ സാംസ്കാരിക പാരമ്പര്യം മുഖ്യധാരയിലേക്ക് കൊണ്ടുവന്നതിന് പുസ്തകത്തിന്റെ രചയിതാക്കളെ അദ്ദേഹം അഭിനന്ദിച്ചു. ഭാഷകളും സംഗീതവും ആചാരങ്ങളും രാജ്യത്തിന്റെ കൂട്ടായ ഓർമകളാണെന്നും യുവതലമുറ സാങ്കേതികവിദ്യയുടെ സഹായത്തോടെ അവ സംരക്ഷിക്കാൻ മുന്നിട്ടിറങ്ങണമെന്നും അദ്ദേഹം ആഹ്വാനം ചെയ്തു. വികസനം സാംസ്കാരിക ആത്മവിശ്വാസത്തോടൊപ്പം മുന്നോട്ടുപോകുമ്പോഴാണ് അതിന് യഥാർഥ അർഥമുണ്ടാകുന്നതെന്നും അദ്ദേഹം പറഞ്ഞു.

ഭവായ്യ വടക്കൻ ബംഗാൾ, അസം, സമീപ പ്രദേശങ്ങൾ എന്നിവിടങ്ങളിലെ പരമ്പരാഗത നാടൻ സംഗീത വിഭാഗമാണ്. ജനങ്ങളുടെ സാമൂഹികവും സാംസ്കാരികവും കാർഷികവുമായ ജീവിതവുമായി ഈ സംഗീത പാരമ്പര്യം ആഴത്തിൽ ബന്ധപ്പെട്ടിരിക്കുന്നു. ആധുനികവൽക്കരണവും നഗരവൽക്കരണവും ആഗോളവൽക്കരണവും ഉണ്ടായിട്ടും യഥാർഥ മനുഷ്യാനുഭവങ്ങളിലും സർവസാധാരണമായ വികാരങ്ങളിലും വേരൂന്നിയതിനാലാണ് ഈ പാരമ്പര്യം ഇന്നും നിലനിൽക്കുന്നതെന്ന് ഉപരാഷ്ട്രപതി പറഞ്ഞു. ഇന്ത്യയുടെ വൈവിധ്യമാണ് രാജ്യത്തിന്റെ ശക്തിയെന്നും ഇന്ത്യ എന്നും ഒന്നായി തുടരുമെന്നും അദ്ദേഹം കൂട്ടിച്ചേർത്തു.