തിരുവനന്തപുരം, 2026 ജൂൺ 24
ഇന്ത്യൻ അണ്ടർ-19 ക്രിക്കറ്റ് ടീമിൽ ഇടം ലഭിച്ചതിന്റെ സന്തോഷം പങ്കുവെച്ച് കേരള അണ്ടർ-19 ടീം നായകനും വിക്കറ്റ് കീപ്പർ-ബാറ്ററുമായ മാനവ് കൃഷ്ണ. ദേശീയ ടീമിന്റെ ഭാഗമാകാൻ കഴിഞ്ഞതിൽ ഏറെ ആവേശമുണ്ടെന്നും ലഭിച്ച അവസരം പരമാവധി പ്രയോജനപ്പെടുത്തി മികച്ച പ്രകടനം പുറത്തെടുക്കാനാണ് ലക്ഷ്യമെന്നും മാനവ് പറഞ്ഞു. ശ്രീലങ്കയ്ക്കെതിരായ പരമ്പരയ്ക്കുള്ള ഇന്ത്യയുടെ അണ്ടർ-19 ടീമിലേക്കാണ് തിരുവനന്തപുരം പേരൂർക്കട സ്വദേശിയായ മാനവ് തിരഞ്ഞെടുക്കപ്പെട്ടത്.
ആഭ്യന്തര ക്രിക്കറ്റിലെ മിന്നും പ്രകടനം
കേരളത്തിന്റെ അണ്ടർ-19 ടീമിനെ നയിച്ച മാനവ്, കഴിഞ്ഞ സീസണിൽ 592 റൺസ് നേടി ശ്രദ്ധേയ പ്രകടനമാണ് കാഴ്ചവെച്ചത്. കൂച്ച് ബെഹാർ ട്രോഫിയിൽ സൗരാഷ്ട്രയ്ക്കെതിരെ 189 റൺസും ഹൈദരാബാദിനെതിരെ 144 റൺസും നേടി തുടർച്ചയായ രണ്ട് സെഞ്ചുറികൾ സ്വന്തമാക്കിയിരുന്നു. ബാറ്റിങ്ങിലെ സ്ഥിരതയും വിക്കറ്റിന് പിന്നിലെ മികവും ദേശീയ ടീമിലേക്കുള്ള വഴി തുറന്നതായി വിലയിരുത്തപ്പെടുന്നു.
കേരള ക്രിക്കറ്റിന്റെ അഭിമാന നേട്ടം
ഡൽഹിയിൽ ക്രിക്കറ്റ് ജീവിതം ആരംഭിച്ച മാനവ് പിന്നീട് കേരളത്തിലേക്ക് മാറി വിവിധ പ്രായവിഭാഗ ടീമുകളെ നയിച്ചു. ഈ വർഷം രഞ്ജി ട്രോഫിയിലും അരങ്ങേറ്റം കുറിച്ച താരം ഭാവിയിലെ വാഗ്ദാന താരങ്ങളിലൊരാളായാണ് വിലയിരുത്തപ്പെടുന്നത്. ശ്രീലങ്കൻ പര്യടനത്തിലെ പ്രകടനം മാനവിന്റെ കരിയറിലെ നിർണായക ഘട്ടമാകുമെന്നാണ് പ്രതീക്ഷ.
