മുപ്പത്തിയാറാമത് ദേശീയ യുവജന പാർലമെന്റ് മത്സരത്തിന്റെ സമ്മാനദാനം നാളെ ഡൽഹിയിൽ

ന്യൂഡൽഹി, 2026 ജൂൺ 24

കേന്ദ്ര വിദ്യാലയങ്ങൾക്കായുള്ള മുപ്പത്തിയാറാമത് ദേശീയ യുവജന പാർലമെന്റ് മത്സരം ഇരുപത്തിയഞ്ചാം തീയതി ഉച്ചകഴിഞ്ഞ് മൂന്ന് മണിക്ക് ന്യൂഡൽഹിയിലെ പാർലമെന്റ് ഹൗസ് സമുച്ചയത്തിലെ പാർലമെന്റ് ലൈബ്രറി ഭവനത്തിലുള്ള ജിഎംസി ബാലയോഗി ഓഡിറ്റോറിയത്തിൽ നടക്കും. മത്സരത്തിൽ മികച്ച പ്രകടനം കാഴ്ചവെച്ച വിദ്യാർഥികൾക്കും കേന്ദ്ര വിദ്യാലയങ്ങൾക്കും സമ്മാനങ്ങൾ വിതരണം ചെയ്യും.

നിയമ-നീതികാര്യ സഹമന്ത്രിയും പാർലമെന്ററി കാര്യ സഹമന്ത്രിയുമായ അർജുൻ റാം മേഘ്വാൾ ചടങ്ങിൽ അധ്യക്ഷത വഹിച്ച് പുരസ്കാരങ്ങൾ സമ്മാനിക്കും. ദേശീയതലത്തിൽ ഒന്നാം സ്ഥാനം നേടിയ ന്യൂഡൽഹിയിലെ ഡോ. രാജേന്ദ്ര പ്രസാദ് കേന്ദ്ര വിദ്യാലയത്തിലെ വിദ്യാർഥികൾ ചടങ്ങിൽ വീണ്ടും യുവജന പാർലമെന്റ് അവതരണം നടത്തും. ദേശീയതലത്തിലെ ഒന്നാം സ്ഥാനത്തിനുള്ള സർദാർ വല്ലഭ്ഭായ് പട്ടേൽ റണ്ണിംഗ് പാർലമെന്ററി ഷീൽഡും ട്രോഫിയും ഈ വിദ്യാലയത്തിന് നൽകും.

കഴിഞ്ഞ മുപ്പത്തിയെട്ട് വർഷമായി പാർലമെന്ററി കാര്യ മന്ത്രാലയം കേന്ദ്ര വിദ്യാലയങ്ങളിൽ യുവജന പാർലമെന്റ് മത്സരങ്ങൾ സംഘടിപ്പിച്ചുവരികയാണ്. രണ്ടായിരത്തി ഇരുപത്തിയഞ്ച്-ഇരുപത്തിയാറ് വർഷത്തെ മത്സരത്തിൽ രാജ്യത്തെ ഇരുപത്തഞ്ച് മേഖലകളിലായി വ്യാപിച്ചുകിടക്കുന്ന ഇരുന്നൂറ് കേന്ദ്ര വിദ്യാലയങ്ങളാണ് പങ്കെടുത്തത്. ജനാധിപത്യ ജീവിതമൂല്യങ്ങൾ, വ്യത്യസ്ത അഭിപ്രായങ്ങളോടുള്ള സഹിഷ്ണുത, ചർച്ചാ-സംവാദ രീതികൾ, നേതൃത്വഗുണം, വാഗ്മിത്വം എന്നിവ വിദ്യാർഥികളിൽ വളർത്തുകയെന്നതാണ് പദ്ധതിയുടെ ലക്ഷ്യം. കേരളത്തിലെ തിരുവനന്തപുരം പള്ളിപ്പുറം സി.ആർ.പി.എഫ് കേന്ദ്ര വിദ്യാലയം എറണാകുളം മേഖലയിലെ വിജയിയായി ട്രോഫിക്ക് അർഹത നേടിയിട്ടുണ്ട്.