ഇന്ത്യൻ നാവികസേനയ്ക്കായി 1.25 മെഗാവാട്ട് ശേഷിയുള്ള സമുദ്ര ഗ്യാസ് ടർബൈൻ ജനറേറ്ററുകളുടെ 12 സെറ്റുകൾ വാങ്ങാൻ പ്രതിരോധ മന്ത്രാലയം 425 കോടി രൂപയുടെ കരാറിൽ ഒപ്പുവച്ചു. ജൂൺ 19ന് ന്യൂഡൽഹിയിൽ പ്രതിരോധ സെക്രട്ടറി രാജേഷ് കുമാർ സിങ്ങിന്റെ സാന്നിധ്യത്തിലായിരുന്നു കരാർ ഒപ്പിട്ടത്. പൂനെയിലെ ഭാരത് ഫോർജ് ലിമിറ്റഡുമായാണ് കരാർ. ജനറേറ്ററുകളിൽ കുറഞ്ഞത് 60 ശതമാനം തദ്ദേശീയ ഘടകങ്ങൾ ഉൾപ്പെടുന്നവയായിരിക്കും.

പ്രതിരോധ മന്ത്രാലയവും ഭാരത് ഫോർജ് ലിമിറ്റഡും തമ്മിലാണ് കരാർ നിലവിൽ വന്നത്. രാജ്യത്ത് ശക്തമായ ആഭ്യന്തര ഉൽപാദന സംവിധാനം വികസിപ്പിക്കാനും ആത്മനിർഭർ ഭാരത്, മേക്ക് ഇൻ ഇന്ത്യ ലക്ഷ്യങ്ങൾ ശക്തിപ്പെടുത്താനുമാണ് പദ്ധതി ലക്ഷ്യമിടുന്നത്. തദ്ദേശീയ ഉൽപാദനവും സമ്പൂർണ ജീവിതചക്ര പിന്തുണയും വഴി ഇന്ത്യൻ നാവികസേനയുടെ പ്രവർത്തനസന്നദ്ധത വർധിപ്പിക്കുമെന്നും പ്രതിരോധ മന്ത്രാലയം അറിയിച്ചു.

സമുദ്ര ഗ്യാസ് ടർബൈൻ ജനറേറ്ററുകൾ നിർമ്മിക്കുന്ന തദ്ദേശീയ ശേഷി സ്ഥാപിക്കുന്നതിലേക്കുള്ള പ്രധാന ചുവടുവയ്പായാണ് ഈ കരാറിനെ വിലയിരുത്തുന്നത്. വൈദ്യുതി ഉൽപാദനത്തിനായി ഉപയോഗിക്കുന്ന ഈ ജനറേറ്ററുകൾ ആധുനിക നാവിക യുദ്ധക്കപ്പലുകളുടെ പ്രധാന ഘടകമാണ്. നിർണായക യുദ്ധ സംവിധാനങ്ങൾക്കും അത്യാധുനിക ആയുധങ്ങൾക്കും സെൻസറുകൾക്കും ആവശ്യമായ വൈദ്യുതി നൽകുന്നതിൽ ഇവ നിർണായക പങ്കുവഹിക്കും.