തിരുവനന്തപുരം, 2026 ജൂൺ 19 –

പിഎം ശ്രീ പദ്ധതിയുമായി ബന്ധപ്പെട്ട് രൂപീകരിച്ച മന്ത്രിസഭാ ഉപസമിതിയുടെ പ്രാഥമിക റിപ്പോർട്ട് ഒരു മാസത്തിനകം സമർപ്പിക്കുമെന്ന് വിദ്യാഭ്യാസ മന്ത്രി എൻ. ഷംസുദ്ദീൻ അറിയിച്ചു. ദേശീയ വിദ്യാഭ്യാസ നയവുമായി ബന്ധപ്പെട്ട എല്ലാ വശങ്ങളും ഉപസമിതി പരിശോധിക്കും. സംസ്ഥാന സർക്കാരിന് പാഠ്യപദ്ധതി രൂപപ്പെടുത്താനുള്ള സ്വാതന്ത്ര്യമുണ്ടോയെന്ന കാര്യവും വിലയിരുത്തും.

പിഎം ശ്രീ പദ്ധതിയിൽ കഴിഞ്ഞ എൽഡിഎഫ് സർക്കാർ ഭരണപക്ഷത്തെയും പ്രതിപക്ഷത്തെയും അറിയിക്കാതെയാണ് ഒപ്പുവെച്ചതെന്ന് ആരോപിച്ചു. അതിന്റെ അടിസ്ഥാനത്തിലാണ് തടഞ്ഞുവെച്ച ഫണ്ട് അനുവദിച്ചതെന്നും വ്യക്തമാക്കി. പദ്ധതിയിൽ ഒപ്പുവെച്ചതിന് പിന്നാലെ എസ്എസ്കെയുടെ ഫണ്ട് അനുവദിച്ചിരുന്നുവെന്നും പറഞ്ഞു.

നിലവിലെ പ്രതിസന്ധിക്ക് കാരണം കഴിഞ്ഞ സർക്കാരിന്റെ നടപടികളാണെന്നും പദ്ധതിയിൽ നിന്ന് ഇപ്പോൾ പിന്മാറാൻ കഴിയില്ലെന്നും വ്യക്തമാക്കി. ഈ വിഷയത്തിൽ പുകമറ സൃഷ്ടിക്കാനുള്ള ശ്രമമാണ് നടക്കുന്നതെന്നും വിമർശിച്ചു. യുഡിഎഫ് സർക്കാർ ആർഎസ്എസ് വിധേയത്വം കാണിക്കില്ലെന്നും രാജ്യത്തുടനീളം സംഘപരിവാർ ശക്തികൾക്കെതിരെ പോരാടുന്നത് കോൺഗ്രസാണെന്നും പറഞ്ഞു.