തിരുവനന്തപുരം, 2026 ജൂൺ 18 –

അന്താരാഷ്ട്ര യോഗാദിനത്തിന്റെ ഒരുക്കങ്ങൾ വിലയിരുത്തുന്നതിനായി ഗവർണർ രാജേന്ദ്ര ആർലേക്കർ വിവിധ വകുപ്പ് ഉദ്യോഗസ്ഥരുടെ യോഗം വിളിച്ച സംഭവത്തിൽ സംസ്ഥാന സർക്കാർ അതൃപ്തി അറിയിച്ചു. ചീഫ് സെക്രട്ടറി ഗവർണറുടെ സെക്രട്ടറിയുമായി ബന്ധപ്പെട്ട് വിശദീകരണം തേടുകയും സർക്കാരിന്റെ അതൃപ്തി അറിയിക്കുകയും ചെയ്തതായി മുഖ്യമന്ത്രിയുടെ ഓഫീസ് വ്യക്തമാക്കി.

ഉദ്യോഗസ്ഥരുമായി ബന്ധപ്പെട്ട യോഗങ്ങളോ അവലോകന യോഗങ്ങളോ സർക്കാരിന്റെ എക്സിക്യൂട്ടീവ് ചുമതലകളുടെ ഭാഗമാണെന്ന് സർക്കാർ ചൂണ്ടിക്കാട്ടി. ഭാവിയിൽ ഇത്തരം കാര്യങ്ങൾ ആവർത്തിക്കാതിരിക്കാൻ പ്രത്യേക ശ്രദ്ധ വേണമെന്നും ചീഫ് സെക്രട്ടറി ലോക്ഭവന് നൽകിയ കത്തിൽ ആവശ്യപ്പെട്ടിട്ടുണ്ട്. അതേസമയം, ഇത് പ്രത്യേക യോഗമായിരുന്നില്ലെന്നും യോഗാദിനവുമായി ബന്ധപ്പെട്ട ആശയവിനിമയം മാത്രമാണ് നടന്നതെന്നും ഗവർണറുടെ സെക്രട്ടറി ഔദ്യോഗികമായി അറിയിച്ചതായി സർക്കാർ വ്യക്തമാക്കി.

ചൊവ്വാഴ്ച ഗവർണർ നേരിട്ട് വിളിച്ചുചേർത്ത യോഗത്തിൽ ഉന്നത വിദ്യാഭ്യാസ, പൊതുവിദ്യാഭ്യാസ വകുപ്പ് ഉദ്യോഗസ്ഥർ, ദേശീയ ആരോഗ്യ മിഷൻ സംസ്ഥാന മേധാവി, വിവിധ സർവകലാശാലകളിലെ വൈസ് ചാൻസലർമാർ എന്നിവർ പങ്കെടുത്തിരുന്നു. സർക്കാരിന്റെ ഭരണകാര്യങ്ങളിൽ ഗവർണർ ഇടപെട്ടുവെന്ന വിമർശനമാണ് വിഷയത്തെ വിവാദമാക്കിയത്.