കോട്ടയം, 2026 ജൂൺ 18 –

പാമ്പാടി പഞ്ചായത്തിലെ വിവിധ പ്രദേശങ്ങളിൽ കുറുനരി ശല്യം രൂക്ഷമായതോടെ നാട്ടുകാർ ആശങ്കയിലാണ്. കഴിഞ്ഞ ഏതാനും ആഴ്ചകളായി ജനവാസ മേഖലകളിൽ കുറുനരികളുടെ സാന്നിധ്യം വർധിച്ചിട്ടുണ്ട്. പകൽ സമയങ്ങളിൽ പോലും വീടുകളുടെ തിണ്ണകളിലും റോഡുകളിലും ആളൊഴിഞ്ഞ വീടുകളുടെ സിറ്റൗട്ടുകളിലും കുറുനരികളെ കാണുന്നത് പതിവായതായി പ്രദേശവാസികൾ പറയുന്നു.

വീടുകളിൽ കയറി സോഫ ഉൾപ്പെടെയുള്ള സാധനങ്ങൾ നശിപ്പിച്ചതായും വീടിന് പുറത്ത് വച്ചിരുന്ന ചെരിപ്പുകളും മറ്റ് വസ്തുക്കളും കടിച്ചുകീറുന്നതായും പരാതിയുണ്ട്. പാമ്പാടി മുക്കാംകുഴി മേഖലയിലെ തെളിക്കാതെ കാടുപിടിച്ച് കിടക്കുന്ന റബർ തോട്ടങ്ങളാണ് കുറുനരി ശല്യം വർധിക്കാൻ പ്രധാന കാരണമെന്ന് നാട്ടുകാർ ചൂണ്ടിക്കാട്ടുന്നു. ഈ മേഖലകളിൽ അഭയം കണ്ടെത്തുന്ന കുറുനരികൾ ഭക്ഷണം തേടി ജനവാസ കേന്ദ്രങ്ങളിലേക്ക് എത്തുന്നതായാണ് വിലയിരുത്തൽ. സമീപത്തെ സ്കൂളുകളിലെ വിദ്യാർത്ഥികൾ ഉൾപ്പെടെയുള്ളവരും ആശങ്കയിലാണ്.

വൈകുന്നേരങ്ങളിലും രാത്രിയിലും കുറുനരികൾ കൂട്ടമായി ഓളിയിടുന്നത് പ്രദേശത്ത് ഭീതിജനകമായ അന്തരീക്ഷം സൃഷ്ടിക്കുന്നതായി നാട്ടുകാർ പറയുന്നു. ജനങ്ങളുടെ സുരക്ഷ ഉറപ്പാക്കാൻ വന്യജീവി വകുപ്പും പഞ്ചായത്ത് അധികൃതരും അടിയന്തരമായി ഇടപെടണമെന്നാണ് ആവശ്യം. കാടുപിടിച്ച് കിടക്കുന്ന സ്വകാര്യ ഭൂമികൾ വൃത്തിയാക്കാനും ശല്യത്തിന് ശാശ്വത പരിഹാരം കണ്ടെത്താനുമായി ബന്ധപ്പെട്ട വകുപ്പുകൾ നടപടി സ്വീകരിക്കണമെന്നും പ്രദേശവാസികൾ ആവശ്യപ്പെടുന്നു.