റിയാദ്, 2026 ജൂൺ 15 –
വിസ സംബന്ധമായ നിയമക്കുരുക്കുകൾ കാരണം കഴിഞ്ഞ ഒരു പതിറ്റാണ്ടായി നാട്ടിൽ പോകാൻ സാധിക്കാതിരുന്ന മലയാളി സൗദി അറേബ്യയിൽ ഹൃദയാഘാതത്തെ തുടർന്ന് മരിച്ചു. തിരുവനന്തപുരം വർക്കല ജനാർദ്ദനപുരം സ്വദേശി ആർ. ഹരിദാസ് (57) ആണ് സൗദിയിലെ വടക്കൻ മേഖലയായ റഫായിൽ മരിച്ചത്. ദീർഘകാലമായി സൗദിയിൽ ജോലി ചെയ്തുവരികയായിരുന്നു അദ്ദേഹം.
കഴിഞ്ഞ 35 വർഷമായി ഒരു സൗദി പൗരന്റെ കീഴിൽ ജോലി ചെയ്തിരുന്ന ഹരിദാസിന് വിസയുമായി ബന്ധപ്പെട്ട സാങ്കേതിക പ്രശ്നങ്ങൾ കാരണം കഴിഞ്ഞ പത്ത് വർഷമായി നാട്ടിലേക്ക് മടങ്ങാനായിരുന്നില്ല. ഭാര്യ എം.എസ്. ശ്രീകലയും മക്കളായ നിതിൻ കൃഷ്ണ, നിഖിൽ കൃഷ്ണൻ എന്നിവരുമാണ് കുടുംബാംഗങ്ങൾ.
നിലവിൽ മൃതദേഹം റഫ ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. നിയമനടപടികൾ വേഗത്തിലാക്കി മൃതദേഹം എത്രയും പെട്ടെന്ന് നാട്ടിലെത്തിക്കാനുള്ള ശ്രമങ്ങൾ പുരോഗമിക്കുകയാണ്. തിരുവനന്തപുരം ജില്ലാ പ്രവാസി അസോസിയേഷൻ പ്രസിഡന്റും ഒ.ഐ.സി.സി പ്രവർത്തകനുമായ നാസർ കല്ലറയും മാത്യു ജോസഫും ഉൾപ്പെടെയുള്ളവരുടെ നേതൃത്വത്തിലാണ് നടപടികൾ ഏകോപിപ്പിക്കുന്നത്.
