ദില്ലി, 2026 ജൂൺ 15 –
രാജ്യത്ത് കഫ് സിറപ്പുകൾ വാങ്ങുന്നതിന് ഡോക്ടറുടെ കുറിപ്പടി നിർബന്ധമാക്കി കേന്ദ്ര ആരോഗ്യ മന്ത്രാലയം. ഇതോടെ മെഡിക്കൽ സ്റ്റോറുകളിൽ നിന്ന് നേരിട്ട് സിറപ്പുകൾ വാങ്ങുന്ന രീതി അവസാനിക്കും. കഫ് സിറപ്പുകൾ ഉൾപ്പെടെ എല്ലാ സിറപ്പുകൾക്കും പുതിയ ഉത്തരവ് ബാധകമാണെന്ന് കേന്ദ്ര ആരോഗ്യ മന്ത്രാലയം അറിയിച്ചു.
മെഡിക്കൽ സ്റ്റോറുകളിൽ കൗണ്ടറിൽ നിന്ന് സിറപ്പിന്റെ പേര് പറഞ്ഞ് നേരിട്ട് വാങ്ങുന്നത് നിയമവിരുദ്ധമായി കണക്കാക്കുമെന്ന് ഉത്തരവിൽ വ്യക്തമാക്കുന്നു. ഡോക്ടർ നൽകിയ കുറിപ്പടി ഹാജരാക്കിയാൽ മാത്രമേ ഇനി സിറപ്പുകൾ ലഭിക്കൂ. കഫ് സിറപ്പുകളുടെ സുരക്ഷിത ഉപയോഗവും പൊതുജനാരോഗ്യ സംരക്ഷണവുമാണ് പുതിയ നടപടിയുടെ ലക്ഷ്യമെന്ന് മന്ത്രാലയം അറിയിച്ചു.
മധ്യപ്രദേശിലും രാജസ്ഥാനിലും വ്യാജ സിറപ്പുകൾ കഴിച്ച് നിരവധി കുട്ടികൾ മരിച്ച സംഭവങ്ങളുടെ പശ്ചാത്തലത്തിലാണ് നടപടി. രാജ്യവ്യാപകമായി ഉയർന്ന പരാതികളും ഇതിന് കാരണമായി. 1945 ലെ ഡ്രഗ് റൂൾസിലെ അഞ്ചാമത്തെ ഭേദഗതിയായാണ് പുതിയ മാറ്റം കൊണ്ടുവന്നിരിക്കുന്നത്. കുട്ടികൾക്ക് നൽകുന്ന സിറപ്പുകൾക്ക് സമാന നിയന്ത്രണങ്ങൾ നിലവിലുണ്ടായിരുന്നുവെന്നും ഇനി അത് എല്ലാ സിറപ്പുകൾക്കും വ്യാപിപ്പിക്കുകയാണെന്നും ഉത്തരവിൽ പറയുന്നു.
