ദേശീയ ജൈവവൈവിധ്യ അതോറിറ്റി കാർഷിക ജൈവവൈവിധ്യ വിദഗ്ധ സമിതിയെ ഒരു വർഷത്തേക്കായി പുനഃസംഘടിപ്പിച്ചു. കാർഷിക ജൈവവൈവിധ്യത്തിന്റെ സംരക്ഷണം, സുസ്ഥിര ഉപയോഗം, പ്രയോജന പങ്കിടൽ എന്നിവയുമായി ബന്ധപ്പെട്ട വിഷയങ്ങളിൽ വിദഗ്ധ മാർഗനിർദേശം നൽകാനാണ് നടപടി. കാർഷിക ശാസ്ത്രജ്ഞനും ദേശീയ ജൈവവൈവിധ്യ അതോറിറ്റിയുടെയും സസ്യ ഇന സംരക്ഷണ-കർഷകാവകാശ അതോറിറ്റിയുടെയും മുൻ അധ്യക്ഷനുമായ പത്മശ്രീ ഡോക്ടർ പി എൽ ഗൗതമിനെയാണ് സമിതി അധ്യക്ഷനായി നിയമിച്ചത്.

ജൈവവൈവിധ്യ നിയമപ്രകാരം രൂപീകരിച്ച സമിതിയിൽ വിവിധ ഗവേഷണ, അക്കാദമിക്, നയരൂപീകരണ സ്ഥാപനങ്ങളിലെ വിദഗ്ധരും മുതിർന്ന പ്രതിനിധികളും അംഗങ്ങളാണ്. കാർഷിക മേഖലയിലേക്ക് ജൈവവൈവിധ്യ പരിഗണനകൾ ഉൾപ്പെടുത്തുക, സുസ്ഥിര കാർഷിക രീതികൾ പ്രോത്സാഹിപ്പിക്കുക, വിത്ത് മേഖലയുമായി ബന്ധപ്പെട്ട വിഷയങ്ങൾ പരിശോധിക്കുക, ജൈവസമ്പത്തുകൾ ഉൾപ്പെടുന്ന അന്തർദേശീയ സംയുക്ത ഗവേഷണ മാർഗരേഖകൾ അവലോകനം ചെയ്യുക എന്നിവയിൽ സമിതി അതോറിറ്റിക്ക് ഉപദേശം നൽകും. വംശനാശ ഭീഷണി നേരിടുന്ന തദ്ദേശീയ വിള ഇനങ്ങളുടെയും കന്നുകാലി ഇനങ്ങളുടെയും സംരക്ഷണത്തിനുള്ള നിർദേശങ്ങളും സമിതി മുന്നോട്ടുവെക്കും.

രണ്ടായിരത്തി അഞ്ചു മുതൽ പ്രവർത്തിക്കുന്ന ഈ സമിതി കാർഷിക ജനിതക വിഭവങ്ങളുമായി ബന്ധപ്പെട്ട ഉയർന്നുവരുന്ന വിഷയങ്ങൾ കൈകാര്യം ചെയ്യുന്നതിനായി കാലാകാലങ്ങളിൽ പുനഃസംഘടിപ്പിക്കപ്പെട്ടിരുന്നു. ജൈവവൈവിധ്യ സംരക്ഷണവും കാർഷിക ഗവേഷണവും നവീകരണവും തമ്മിൽ സന്തുലിതാവസ്ഥ നിലനിർത്തുന്നതിൽ സമിതിയുടെ മുൻകാല ശുപാർശകൾ പ്രധാന പങ്കുവഹിച്ചു. കാർഷിക ജൈവവൈവിധ്യം സംരക്ഷിക്കാനും ജനിതക വിഭവങ്ങളും പരമ്പരാഗത അറിവും കാത്തുസൂക്ഷിക്കാനും കാലാവസ്ഥയെ അതിജീവിക്കാൻ കഴിയുന്ന സുസ്ഥിര കാർഷിക സംവിധാനങ്ങൾ പ്രോത്സാഹിപ്പിക്കാനുമുള്ള കേന്ദ്ര സർക്കാരിന്റെ പ്രതിബദ്ധതയുടെ ഭാഗമായാണ് പുതിയ പുനഃസംഘടന. ഇത് രാജ്യത്തിന്റെ പുതുക്കിയ ജൈവവൈവിധ്യ ലക്ഷ്യങ്ങൾ കൈവരിക്കാനും സഹായകരമാകും.