പാലക്കാട്, 2026 ജൂൺ 12 –
മൂന്നുവർഷത്തിലേറെയായി നികുതി അടക്കാത്തതിനെ തുടർന്ന് സിപിഐഎം പാർട്ടി ഓഫീസുകൾക്കെതിരെ ജപ്തി നോട്ടീസ് നൽകി. പാലക്കാട് ജില്ലയിലെ ഷൊർണൂർ നഗരസഭയാണ് റവന്യൂ റിക്കവറി നടപടികൾ ആരംഭിച്ചത്. കുളപ്പുള്ളി, ഷൊർണൂർ ലോക്കൽ കമ്മിറ്റി ഓഫീസുകൾക്കാണ് നോട്ടീസ് നൽകിയിരിക്കുന്നത്.
കുളപ്പുള്ളി പാർട്ടി ഓഫീസ് പ്രവർത്തിക്കുന്ന കെട്ടിടത്തിന് ഏകദേശം മുക്കാൽ ലക്ഷം രൂപയുടെ നികുതി കുടിശ്ശികയുണ്ട്. ഷൊർണൂർ ലോക്കൽ കമ്മിറ്റി ഓഫീസിന് കാൽലക്ഷത്തോളം രൂപയുടെ കുടിശ്ശികയുമുണ്ട്. ഈ കുടിശ്ശിക ദീർഘകാലമായി അടയ്ക്കാത്തതിനെ തുടർന്നാണ് നഗരസഭ റവന്യൂ റിക്കവറി നടപടികളിലേക്ക് കടന്നത്.
പതിറ്റാണ്ടുകളായി സിപിഐഎം ഭരിക്കുന്ന ഷൊർണൂർ നഗരസഭ കഴിഞ്ഞ വർഷം സംസ്ഥാനത്ത് നികുതി പിരിവിൽ ഒന്നാം സ്ഥാനത്തെത്തിയിരുന്നു. എന്നാൽ നഗരസഭയുടെ നൂറുശതമാനം നികുതി പിരിവ് ലക്ഷ്യത്തിൽ ഉൾപ്പെടാതെ പോയതിൽ പാർട്ടി ഓഫീസുകളുടെ നികുതി കുടിശ്ശികയും കാരണമായതായി ചൂണ്ടിക്കാണിക്കപ്പെടുന്നു.
