വീട്ടിനുള്ളിൽ കയറി വയോധികയെ തെരുവുനായ ആക്രമിച്ചു

തിരുവനന്തപുരം, 2026 ജൂൺ 12 –

സംസ്ഥാനത്ത് വീണ്ടും തെരുവുനായ ആക്രമണം റിപ്പോർട്ട് ചെയ്തു. തിരുവനന്തപുരം ജില്ലയിലെ കല്ലമ്പലം ഭാഗത്ത് പനി ബാധിച്ച് വീട്ടിൽ വിശ്രമത്തിലായിരുന്ന 65കാരി ഗിരിജയെ തെരുവുനായ ആക്രമിച്ചു. തുറന്നുകിടന്ന വാതിലിലൂടെ വീടിനുള്ളിൽ കയറിയ നായയെ ഓടിക്കാൻ ശ്രമിക്കുന്നതിനിടെയാണ് കൈയിൽ കടിയേറ്റത്. പരിക്കേറ്റ ഗിരിജയെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു.

കല്ലമ്പലം കരവാരം പ്രദേശത്താണ് സംഭവം. ഗിരിജയെ കൂടാതെ നാല് പേർക്കും തെരുവുനായയുടെ ആക്രമണത്തിൽ പരിക്കേറ്റിട്ടുണ്ട്. പ്രദേശത്തെ വളർത്തുമൃഗങ്ങളെയും നായ ആക്രമിച്ചതായാണ് വിവരം. ആക്രമണം നടത്തിയ നായയ്‌ക്കൊപ്പം ഉണ്ടായിരുന്ന മറ്റൊരു നായയെ പിന്നീട് ചത്ത നിലയിൽ കണ്ടെത്തിയതും ആശങ്ക വർധിപ്പിച്ചിട്ടുണ്ട്.

ആക്രമണം നടത്തിയ നായയ്ക്ക് പേവിഷബാധയുണ്ടോയെന്ന കാര്യത്തിൽ സംശയം നിലനിൽക്കുകയാണ്. പ്രദേശത്ത് തെരുവുനായ ശല്യം അതിരൂക്ഷമാണെന്ന് വാർഡ് മെമ്പർ അറിയിച്ചു. സംഭവത്തെ തുടർന്ന് നാട്ടുകാർക്കിടയിൽ ആശങ്ക ഉയർന്നിരിക്കുകയാണ്.