മന്ത്രി സണ്ണി ജോസഫിന്റെ പ്രൈവറ്റ് സെക്രട്ടറിയായി ചന്ദ്രൻ തില്ലങ്കേരി

തിരുവനന്തപുരം, 2026 ജൂൺ 12 –

മന്ത്രി സണ്ണി ജോസഫിന്റെ പ്രൈവറ്റ് സെക്രട്ടറിയായി കെപിസിസി ജനറൽ സെക്രട്ടറി ചന്ദ്രൻ തില്ലങ്കേരിയെ നിയമിച്ചു. ബന്ധു നിയമന വിവാദത്തെ തുടർന്ന് ബെന്നി തോമസ് സ്ഥാനമൊഴിഞ്ഞ സാഹചര്യത്തിലാണ് പുതിയ നിയമനം. ചന്ദ്രൻ തില്ലങ്കേരിയുടെ നിയമനത്തിന് മുഖ്യമന്ത്രിയുടെ ഓഫീസ് അംഗീകാരം നൽകിയിട്ടുണ്ട്.

നിയമസഭാ തിരഞ്ഞെടുപ്പിൽ മട്ടന്നൂർ മണ്ഡലത്തിലെ യുഡിഎഫ് സ്ഥാനാർഥിയായിരുന്നു ചന്ദ്രൻ തില്ലങ്കേരി. നേരത്തെ സണ്ണി ജോസഫിന്റെ സഹോദരീഭർത്താവായ ബെന്നി തോമസിനെ അഡീഷണൽ പ്രൈവറ്റ് സെക്രട്ടറിയായി നിയമിച്ചത് വിവാദമായിരുന്നു. തുടർന്ന് താൻ കാരണം മന്ത്രിയുടെ പൊതുജീവിതത്തിന് പോറലേൽക്കരുതെന്ന് വ്യക്തമാക്കി ബെന്നി തോമസ് രാജിവെക്കുകയായിരുന്നു.

ബെന്നി തോമസിന്റെ നിയമനത്തെ സണ്ണി ജോസഫ് നേരത്തെ ന്യായീകരിച്ചിരുന്നു. ബെന്നി തോമസ് മികച്ച പൊതുപ്രവർത്തകനാണെന്നും സഹോദരീഭർത്താവ് എന്നത് നിയമനത്തിനുള്ള മാനദണ്ഡമല്ലെന്നും അദ്ദേഹം പറഞ്ഞിരുന്നു. തിരഞ്ഞെടുപ്പിൽ തന്റെ ചീഫ് ഏജന്റായിരുന്നെന്നും രണ്ട് തവണ പഞ്ചായത്ത് പ്രസിഡന്റായിരുന്നെന്നും കണ്ണൂർ ഡിസിസി പ്രസിഡന്റിന്റെ ശുപാർശയും ഉണ്ടായിരുന്നെന്നും സണ്ണി ജോസഫ് വിശദീകരിച്ചിരുന്നു. ബെന്നി തോമസിന്റെ രാജിക്ക് പിന്നാലെയാണ് ഇപ്പോൾ ചന്ദ്രൻ തില്ലങ്കേരിയുടെ നിയമനം വന്നിരിക്കുന്നത്.