ജൽ ശക്തി മന്ത്രാലയത്തിന്റെ പ്രധാന നദീബന്ധന, ജലസംരക്ഷണ പദ്ധതികളെക്കുറിച്ച് ഉപരാഷ്ട്രപതി സി. പി. രാധാകൃഷ്ണനെ ഇന്ന് ഉപരാഷ്ട്രപതി ഭവനിൽ വിശദമായി അറിയിച്ചു. രാജ്യത്തെ ജലസംരക്ഷണവും ജലവിഭവ പരിപാലനവും ശക്തിപ്പെടുത്താൻ നടപ്പാക്കുന്ന പദ്ധതികളാണ് അവതരിപ്പിച്ചത്. ജലസമ്മർദ്ദം കുറയ്ക്കാനും വരൾച്ച നേരിടാനും ജലസേചന പരിധി വർധിപ്പിക്കാനും സമതുലിതമായ പ്രാദേശിക വികസനം ഉറപ്പാക്കാനും നദീബന്ധനത്തിന് വലിയ പങ്ക് വഹിക്കാനാകുമെന്ന് ഉപരാഷ്ട്രപതി പറഞ്ഞു.

ജൽ ശക്തി മന്ത്രി സി. ആർ. പാട്ടീലും സഹമന്ത്രി രാജ് ഭൂഷൺ ചൗധരിയും ജലവിഭവ വകുപ്പ് ഉന്നത ഉദ്യോഗസ്ഥരുമാണ് ഉപരാഷ്ട്രപതിയെ സന്ദർശിച്ചത്. സർക്കാരുകൾ, സമൂഹങ്ങൾ, വ്യവസായ സ്ഥാപനങ്ങൾ, സന്നദ്ധ സംഘടനകൾ എന്നിവയുടെ പങ്കാളിത്തത്തോടെ നടപ്പാക്കുന്ന “ജൽ സഞ്ചയ് ജനഭാഗിദാരി” പദ്ധതിയെ അദ്ദേഹം അഭിനന്ദിച്ചു. പദ്ധതിയുടെ രണ്ടാം ഘട്ടത്തിൽ ലക്ഷ്യത്തേക്കാൾ കൂടുതൽ, ഒരു കോടി അൻപത്തിയഞ്ച് ലക്ഷത്തിലധികം ജലസംരക്ഷണ, ഭൂഗർഭജല പുനർനിറവ് സംവിധാനങ്ങൾ റിപ്പോർട്ട് ചെയ്തതായി യോഗത്തിൽ അറിയിച്ചു.

കെൻ-ബേത്വ, പാർവതി-കാളിസിന്ദ്-ചമ്പൽ, ഗോദാവരി-കാവേരി നദീബന്ധന പദ്ധതികളുടെ പുരോഗതിയും ഉപരാഷ്ട്രപതിയെ അറിയിച്ചു. കെൻ-ബേത്വ പോലുള്ള ദേശീയ ജല അടിസ്ഥാനസൗകര്യ പദ്ധതികൾ ഭാവി തലമുറകൾക്ക് അഭിമാനത്തോടെ മനസ്സിലാക്കാൻ കഴിയുന്ന വിധത്തിൽ രേഖപ്പെടുത്തണമെന്നും അദ്ദേഹം നിർദേശിച്ചു. നദീബന്ധന പദ്ധതികൾ നടപ്പാക്കുന്നതിലെ പ്രധാന വെല്ലുവിളി പണമല്ലെന്നും മനോഭാവവുമായി ബന്ധപ്പെട്ട പ്രശ്നങ്ങളും രാഷ്ട്രീയ പരിഗണനകളുമാണെന്നും അദ്ദേഹം അഭിപ്രായപ്പെട്ടു. കൂടാതെ 2026 സെപ്റ്റംബറിൽ നടക്കാനിരിക്കുന്ന ഇന്ത്യ അന്തർദേശീയ ജലവാരത്തിലേക്ക് ഉപരാഷ്ട്രപതിയെ ക്ഷണിക്കുകയും ചെയ്തു.