ന്യൂഡൽഹി, 2026 ജൂൺ 9 –

രാജ്യത്തെ കൽക്കരി വിതരണ ശൃംഖല നവീകരിക്കുന്നതിന്റെ ഭാഗമായി കൽക്കരി എക്സ്ചേഞ്ചുകൾ സ്ഥാപിക്കാൻ കേന്ദ്ര സർക്കാർ വഴി തുറന്നു. ഖനികളും ധാതുക്കളും സംബന്ധിച്ച വികസന-നിയന്ത്രണ ഭേദഗതി നിയമം 2025 മുഖേന ധാതു എക്സ്ചേഞ്ച് എന്ന ആശയം അവതരിപ്പിച്ചിരുന്നു. ഇതിന്റെ തുടർച്ചയായി കൽക്കരി എക്സ്ചേഞ്ച് ചട്ടങ്ങൾ 2026 കേന്ദ്ര കൽക്കരി മന്ത്രാലയം ജൂൺ 4ന് ഔദ്യോഗിക ഗസറ്റിൽ പ്രസിദ്ധീകരിച്ചു.

കൽക്കരി എക്സ്ചേഞ്ചുകളുടെ രജിസ്ട്രേഷനും നിയന്ത്രണവും നിർവഹിക്കുന്ന അധികാരിയായി കൽക്കരി കൺട്രോളർ ഓർഗനൈസേഷനെ 2025 ഡിസംബറിൽ തന്നെ നിയമിച്ചിരുന്നു. യോഗ്യതയുള്ള സ്ഥാപനങ്ങൾക്ക് കൽക്കരി എക്സ്ചേഞ്ചുകൾ സ്ഥാപിക്കാനും പ്രവർത്തിപ്പിക്കാനും അനുമതി നൽകും. വിപണി ചട്ടങ്ങളും ഉപനിയമങ്ങളും രൂപപ്പെടുത്താനും കൽക്കരി വ്യാപാരം സുഗമമാക്കാനും ഇവയ്ക്ക് അധികാരമുണ്ടാകും. രജിസ്ട്രേഷൻ കാലാവധി 25 വർഷമായിരിക്കും. പരമ്പരാഗതമായ ഒരാളിൽ നിന്ന് പലരിലേക്കുള്ള വിൽപ്പന രീതിക്ക് പകരം പലരും പലരുമായി ഇടപെടുന്ന മത്സരാധിഷ്ഠിത വ്യാപാര സംവിധാനമാണ് ഇതിലൂടെ വരുന്നത്.

വിലനിർണയം കൂടുതൽ സുതാര്യമാക്കാനും കാര്യക്ഷമത വർധിപ്പിക്കാനുമാണ് ഈ മാറ്റം ലക്ഷ്യമിടുന്നത്. വാണിജ്യ ഖനികളും ക്യാപ്റ്റീവ് ഖനികളും ഉൾപ്പെടെയുള്ള കൽക്കരി ഉൽപാദകർക്ക് കൂടുതൽ വാങ്ങലുകാരിലേക്ക് എത്താൻ ഇത് സഹായിക്കുമെന്ന് സർക്കാർ വിലയിരുത്തുന്നു. പൊതുമേഖലാ കൽക്കരി കമ്പനികൾക്കും വിപണിയിലെ പങ്കാളിത്തം വർധിപ്പിക്കാൻ ഈ സംവിധാനം പ്രയോജനപ്പെടും. വ്യാപാരം എളുപ്പമാക്കുക, സുതാര്യത ഉറപ്പാക്കുക, സ്വയംപര്യാപ്ത ഊർജ മേഖല രൂപപ്പെടുത്തുക എന്നീ ലക്ഷ്യങ്ങളോടെയാണ് ഈ നീക്കം. ഊർജ സുരക്ഷ ശക്തിപ്പെടുത്താനും വ്യവസായ വളർച്ചയ്ക്ക് പിന്തുണ നൽകാനും വികസിത ഭാരതം എന്ന ലക്ഷ്യത്തിലേക്കുള്ള മുന്നേറ്റത്തിന് ഇത് സഹായകരമാകുമെന്നാണ് പ്രതീക്ഷ.