ഗുജറാത്തിലെ ഗാന്ധിനഗറിൽ ജൂൺ 9ന് ആത്മനിർഭർ പഞ്ചായത്ത് പദ്ധതിയെക്കുറിച്ചുള്ള പ്രചാരണ ശിൽപശാല സംഘടിപ്പിക്കും. കേന്ദ്ര പഞ്ചായത്തിരാജ് മന്ത്രാലയത്തിന്റെ നേതൃത്വത്തിലാണ് പരിപാടി നടക്കുന്നത്. സമീപ പ്രദേശങ്ങളിലെ അർഹരായ ഗ്രാമ പഞ്ചായത്തുകളും ബ്ലോക്ക് പഞ്ചായത്തുകളും നേരിട്ട് പങ്കെടുക്കും. മറ്റ് പഞ്ചായത്തുകൾ ദൃശ്യസമ്മേളന സംവിധാനത്തിലൂടെ തത്സമയം പങ്കെടുക്കും.

കേന്ദ്ര പഞ്ചായത്തിരാജ് മന്ത്രാലയ സെക്രട്ടറി വിവേക് ഭരദ്വാജ് ഉൾപ്പെടെയുള്ള മുതിർന്ന ഉദ്യോഗസ്ഥർ പരിപാടിയിൽ പങ്കെടുക്കും. ഗുജറാത്ത് സർക്കാരിലെ ഉന്നത ഉദ്യോഗസ്ഥരും വിവിധ സ്ഥാപനങ്ങളുടെ പ്രതിനിധികളും പഞ്ചായത്തുതല പ്രതിനിധികളും ശിൽപശാലയുടെ ഭാഗമാകും. പദ്ധതിയുടെ ലക്ഷ്യങ്ങൾ, പ്രവർത്തനരീതി, ദേശീയ നയപരമായ ഉദ്ദേശ്യങ്ങൾ എന്നിവ അവതരിപ്പിക്കും. ആത്മനിർഭർ പഞ്ചായത്ത് കവാടത്തിന്റെ തത്സമയ പ്രദർശനവും ചോദ്യോത്തരവേളയും നടക്കും. ഗ്രാമ, ബ്ലോക്ക് പഞ്ചായത്ത് നേതാക്കളുമായി നേരിട്ട് ആശയവിനിമയം നടത്തുകയാണ് മന്ത്രാലയത്തിന്റെ ലക്ഷ്യം.

പഞ്ചായത്തുകളുടെ സാമ്പത്തിക സ്വയംപര്യാപ്തത വർധിപ്പിക്കാനായി കേന്ദ്ര സർക്കാരിന്റെ പഞ്ചായത്തിരാജ് മന്ത്രാലയം നടപ്പാക്കുന്ന പദ്ധതിയാണ് ആത്മനിർഭർ പഞ്ചായത്ത് പദ്ധതി. വരുമാനം സൃഷ്ടിക്കാനാകുന്ന പദ്ധതികൾ പഞ്ചായത്തുകൾക്ക് അവതരിപ്പിക്കാം. തിരഞ്ഞെടുക്കപ്പെടുന്ന ആശയങ്ങൾക്ക് സാങ്കേതിക സഹായവും ധനസഹായം ലഭ്യമാക്കാനുള്ള പിന്തുണയും നൽകും. ഗ്രാമസഭയുടെ നിർബന്ധിത പങ്കാളിത്തത്തോടെയാണ് പദ്ധതികൾ ആസൂത്രണം ചെയ്യുക. ദേശീയ ഗ്രാമ സ്വരാജ് അഭിയാന്റെ ഭാഗമായി നടപ്പാക്കുന്ന ഈ പദ്ധതിയുടെ ഗുജറാത്തിലെ പ്രചാരണ പ്രവർത്തനങ്ങൾക്ക് തുടക്കമിടുന്നതാണ് ഗാന്ധിനഗറിലെ ശിൽപശാല.