മെഡിക്കൽ കോളേജിന് ആവശ്യമായ കെട്ടിടങ്ങളുടെ നിർമാണ പുരോഗതിയും സാങ്കേതിക തടസ്സങ്ങളും നിരീക്ഷിക്കാൻ പ്രത്യേക മോണിട്ടറിംഗ് കമ്മിറ്റിയും രൂപീകരിച്ചു. മെഡിക്കൽ കോളേജ് സ്പെഷ്യൽ ഓഫീസർ കൂടിയായ ഒറ്റപ്പാലം സബ് കളക്ടറാണ് കൺവീനർ. സ്ഥലം എം.പി, എം.എൽ.എ, ജില്ലാ കളക്ടർ, മെഡിക്കൽ കോളേജ് ഡയറക്ടർ എന്നിവർ അംഗങ്ങളാണ്. മെയിൻ ബ്ലോക്ക്, ഒ.പി വാർഡ്, ഒ.ടി വാർഡ്, ഒ.പി.സി എന്നിവയുടെ നിർമാണം അടിയന്തരമായി പൂർത്തിയാക്കി പി.ഡബ്ല്യു.ഡി വകുപ്പ് കോളേജിന് കൈമാറണമെന്നും മന്ത്രി നിർദ്ദേശിച്ചു. ബോയിലർ, മോർച്ചറി, സീവേജ്, ഡ്രയിനേജ്, ഗ്യാസ് സപ്ലൈ സിസ്റ്റം, എസ്.ടി.പി, മോഡുലാർ ലാബുകൾ, ഹോസ്റ്റലുകൾ എന്നിവയുടെ നിർമാണത്തിലെ സാങ്കേതിക തടസ്സങ്ങൾ നീക്കുമെന്നും മന്ത്രി വ്യക്തമാക്കി. അധ്യാപക-അനധ്യാപക ഒഴിവുകൾ നികത്തുന്നതിനും അടിയന്തര നടപടി സ്വീകരിക്കും.

മെഡിക്കൽ കൗൺസിൽ മാനദണ്ഡങ്ങൾ പാലിച്ച് കോളേജിന്റെ പ്രവർത്തനം പൂർണതോതിൽ സജ്ജമാക്കാൻ ആവശ്യമായ ഫണ്ട് അനുവദിക്കണമെന്ന് മുഖ്യമന്ത്രിയോട് ആവശ്യപ്പെട്ടിട്ടുണ്ടെന്നും അതിന് അനുകൂലമായ ഉറപ്പ് ലഭിച്ചതായും മന്ത്രി പറഞ്ഞു. അധ്യാപകരുടെ ശമ്പള വേതന വ്യവസ്ഥ പുനഃക്രമീകരിക്കണമെന്ന ആവശ്യവും മുഖ്യമന്ത്രിയുടെ ശ്രദ്ധയിൽപ്പെടുത്തിയിട്ടുണ്ട്. എല്ലാ 10 ദിവസവും മോണിട്ടറിംഗ് കമ്മിറ്റി യോഗം ചേർന്ന് പുരോഗതി വിലയിരുത്തും. 100 ദിവസത്തിനകം മെഡിക്കൽ കോളേജ് പൂർണ സജ്ജമാക്കാൻ ആവശ്യമായ എല്ലാ നടപടികളും സ്വീകരിക്കാമെന്ന ഉറപ്പാണ് മുഖ്യമന്ത്രിയുമായുള്ള ചർച്ചയിൽ ലഭിച്ചതെന്നും മന്ത്രി അറിയിച്ചു.