ന്യൂഡൽഹി  / 2026 / ഒക്ടോബർ 07

പ്രധാനമന്ത്രിയുടെ ഓർമസമ്മാനങ്ങളുടെ എട്ടാമത് ലേലത്തിൽ ഛത്തീസ്ഗഢിന്റെ സാംസ്കാരിക പാരമ്പര്യം പരിചയപ്പെടുത്തുന്ന 16 വസ്തുക്കൾ ഇടംപിടിച്ചു. പുരാതന ലോഹവാർപ്പുകലയും ഗോത്രപാരമ്പര്യവും ഭക്തികലയും സംസ്ഥാനത്തിന്റെ സമകാലിക സാംസ്കാരിക മുഖവും ഇവയിൽ കാണാം. തലമുറകളിലൂടെ കൈമാറിയ പാരമ്പര്യം ഇന്നത്തെ കലാവസ്തുക്കളിലും തുടരുന്നതാണ് ഈ ശേഖരത്തിന്റെ പ്രത്യേകത. ഓൺലൈനായി നടക്കുന്ന ലേലം ഒക്ടോബർ 31 വരെ നീട്ടിയിട്ടുണ്ട്. ലഭിക്കുന്ന തുക നമാമി ഗംഗെ പദ്ധതിക്ക് നൽകും.

നാലായിരം വർഷത്തിന്റെ കഥ പറയുന്ന ധോക്ര കല

ഇന്ത്യയിൽ നാലായിരത്തിലേറെ വർഷത്തെ ചരിത്രമുള്ള ധോക്ര ലോഹവാർപ്പുകലയാണ് ശേഖരത്തിലെ പ്രധാന ആകർഷണം. മെഴുകിൽ മാതൃകയൊരുക്കി, പിന്നീട് അത് നീക്കി ലഭിക്കുന്ന അച്ചിൽ ലോഹം ഒഴിച്ചാണ് ഈ രീതിയിൽ രൂപങ്ങൾ നിർമിക്കുന്നത്. ആനത്തലയുള്ള നന്ദി, നിൽക്കുന്ന നന്ദി, മാഡിയ–മാഡിൻ ഗോത്രദമ്പതികളുടെ അർധകായ പ്രതിമ എന്നിവ ശേഖരത്തിലുണ്ട്. ധോക്ര കലയുടെ തനതായ ശൈലിയും വ്യത്യസ്ത രൂപങ്ങൾ സൃഷ്ടിക്കാനുള്ള സാധ്യതയും ഇവ വ്യക്തമാക്കുന്നു.

ഗോത്രജീവിതവും ഭക്തിപാരമ്പര്യവും ഒരുമിക്കുന്നു

ഗോത്രസമൂഹങ്ങളുടെ പരമ്പരാഗത ചടങ്ങുകളിൽ ഉപയോഗിക്കുന്ന ശിരോഭൂഷണവും ശേഖരത്തിലുണ്ട്. മയിൽപ്പീലിക്കൂട്ടം, കവടികൾ, ലോഹത്തകിടുകൾ, പിച്ചളമണികൾ എന്നിവയാണ് ഇതിന്റെ അലങ്കാരങ്ങൾ. ഗോത്രകലയ്ക്കൊപ്പം സംസ്ഥാനത്തെ രൂപപ്പെടുത്തിയ മറ്റു സാംസ്കാരിക സ്വാധീനങ്ങളും ശേഖരം പരിചയപ്പെടുത്തുന്നു. ‘റാം റാം’ എന്ന് ആവർത്തിച്ചെഴുതിയ രാംനാമി സമാജിന്റെ ജപത്തിനുള്ള മേൽവസ്ത്രം വിശ്വാസത്തിന്റെയും ഭക്തിയുടെയും വേറിട്ട ആവിഷ്കാരമാണ്. ഹട്കേശ്വർ മഹാദേവ്, ബുഡേശ്വർ മഹാദേവ്, ജയ് മാ കുദർഗഡി, മധേശ്വർ മഹാദേവ് തുടങ്ങിയ പ്രധാന മത–സാംസ്കാരിക കേന്ദ്രങ്ങളെ പ്രതിനിധീകരിക്കുന്ന ഓർമസമ്മാനങ്ങളും ഉൾപ്പെടുത്തിയിട്ടുണ്ട്.

ഇന്നത്തെ ഛത്തീസ്ഗഢും ശേഖരത്തിൽ

മഹ്താരി വന്ദൻ യോജന ചിത്രീകരിക്കുന്ന മരത്തിൽ കൊത്തിയ പാനൽ, ഛത്തീസ്ഗഢ് നിയമസഭയുടെ രജതജൂബിലി ഓർമസമ്മാനം, നവ റായ്പൂരിലെ സ്ഥാപനങ്ങളുടെ മാതൃകകൾ എന്നിവ സംസ്ഥാനത്തിന്റെ സമകാലിക മുഖം അവതരിപ്പിക്കുന്നു. പരമ്പരാഗത പൈതൃകത്തിനൊപ്പം മാറിവരുന്ന ഛത്തീസ്ഗഢിനെയും ഇവ കാണിക്കുന്നു. തലമുറകളിലൂടെ രൂപപ്പെട്ട പാരമ്പര്യങ്ങൾ ഇന്നത്തെ വസ്തുക്കളിലും ആവിഷ്കരിക്കപ്പെടുന്നുവെന്നതാണ് ശേഖരത്തിന്റെ കേന്ദ്രസന്ദേശം. അതിലൂടെ സംസ്ഥാനത്തിന്റെ സാംസ്കാരിക ഓർമകൾ മുന്നോട്ടുകൊണ്ടുപോകുന്നു.

ഒക്ടോബർ 31 വരെ ഓൺലൈനായി ലേലത്തിൽ പങ്കെടുക്കാം

ലേലം ഇപ്പോൾ നടന്നുകൊണ്ടിരിക്കുകയാണ്. പങ്കെടുക്കാൻ താൽപര്യമുള്ളവർക്ക് പ്രധാനമന്ത്രിയുടെ ഓർമസമ്മാനങ്ങൾക്കായുള്ള ഔദ്യോഗിക ഇ–ലേല പോർട്ടലിലൂടെ ഓൺലൈനായി തുക വാഗ്ദാനം ചെയ്യാം. ഒക്ടോബർ 31 വരെ നീട്ടിയ ലേലത്തിൽനിന്നുള്ള വരുമാനം നമാമി ഗംഗെ പദ്ധതിയെ പിന്തുണയ്ക്കാനാണ് ഉപയോഗിക്കുക.