തിരുവനന്തപുരം | ജൂൺ 1 | ലോക ക്ഷീരദിനാചരണത്തിന്റെ സംസ്ഥാനതല ഉദ്ഘാടനം നിർവഹിച്ച് സംസാരിക്കവേ സംസ്ഥാനത്ത് അടുത്ത മൂന്ന് വർഷത്തിനുള്ളിൽ പാൽ ഉൽപ്പാദനം 100 ലക്ഷം ലിറ്ററായി ഉയർത്തുകയാണ് സർക്കാരിന്റെ പ്രധാന ലക്ഷ്യമെന്ന് മുഖ്യമന്ത്രി വി.ഡി. സതീശൻ പ്രഖ്യാപിച്ചു.

നിലവിൽ കേരളത്തിൽ പ്രതിദിനം ഏകദേശം 70 ലക്ഷം ലിറ്റർ പാലാണ് ഉൽപ്പാദിപ്പിക്കുന്നത്. എന്നാൽ സംസ്ഥാനത്തിന്റെ ആവശ്യം 86 ലക്ഷം ലിറ്ററാണ്. ഈ കുറവ് പരിഹരിച്ച് പാൽ ഉൽപ്പാദനത്തിൽ സ്വയംപര്യാപ്തത കൈവരിക്കാനാണ് സർക്കാർ ലക്ഷ്യമിടുന്നത്. പാൽ ഉൽപ്പാദനം വർധിപ്പിക്കുന്നതിനൊപ്പം മൂല്യവർധിത പാലുൽപ്പന്നങ്ങൾ നിർമ്മിക്കുന്ന സംരംഭങ്ങൾക്കും സർക്കാർ പിന്തുണ നൽകുമെന്ന് മുഖ്യമന്ത്രി വ്യക്തമാക്കി.

തിരുവനന്തപുരം ജവഹർ സഹകരണ ഭവനിൽ നടന്ന ചടങ്ങിലാണ് മുഖ്യമന്ത്രി വി.ഡി. സതീശൻ പ്രഖ്യാപനം നടത്തിയത്. ക്ഷീരവികസന വകുപ്പ് മന്ത്രി ബിന്ദു കൃഷ്ണ അധ്യക്ഷത വഹിച്ചു. ക്ഷീരവികസന വകുപ്പ് ഉദ്യോഗസ്ഥർ, മിൽമ പ്രതിനിധികൾ, ക്ഷീരകർഷകർ, വിവിധ സൊസൈറ്റി ഭാരവാഹികൾ തുടങ്ങിയവർ ചടങ്ങിൽ പങ്കെടുത്തു.

ക്ഷീരകർഷകർ നേരിടുന്ന പ്രധാന പ്രശ്നങ്ങളിലൊന്നായ കാലിത്തീറ്റ വിലക്കയറ്റത്തിൽ സർക്കാർ ശക്തമായി ഇടപെടുമെന്ന് മുഖ്യമന്ത്രി പറഞ്ഞു. പാലിന് വില വർധിക്കുമ്പോൾ കാലിത്തീറ്റ കമ്പനികൾ അന്യായമായി വില കൂട്ടുന്ന പ്രവണത അനുവദിക്കില്ലെന്നും വ്യക്തമാക്കി. ഗ്രാമ, ബ്ലോക്ക്, ജില്ലാ പഞ്ചായത്തുകൾ വഴി കാലിത്തീറ്റ സബ്‌സിഡി പദ്ധതികൾ ആവിഷ്‌കരിക്കുമെന്നും അദ്ദേഹം അറിയിച്ചു. പാലിന്റെ ഗുണനിലവാരത്തിൽ യാതൊരു വിട്ടുവീഴ്ചയും ഉണ്ടാകില്ലെന്നും മായം കണ്ടെത്താൻ അത്യാധുനിക സാങ്കേതിക സംവിധാനങ്ങൾ ഉപയോഗിച്ച് പരിശോധന ശക്തമാക്കുമെന്നും മുഖ്യമന്ത്രി ഉറപ്പുനൽകി.

സംസ്ഥാനത്ത് ഏകദേശം എട്ട് ലക്ഷം കർഷകർ ആശ്രയിക്കുന്ന മേഖലയാണ് ക്ഷീരമേഖല. വന്യജീവി ആക്രമണവും കാർഷിക മേഖലയിലെ പ്രതിസന്ധികളും വർധിച്ച സാഹചര്യത്തിൽ പല കർഷകർക്കും ആശ്വാസമായത് പശുവളർത്തലാണെന്ന് മുഖ്യമന്ത്രി ചൂണ്ടിക്കാട്ടി. ക്ഷീരമേഖലയിൽ സ്ത്രീകളുടെ പങ്ക് നിർണായകമാണെന്നും വനിതാ കർഷകരെ കൂടുതൽ പിന്തുണയ്ക്കേണ്ടതുണ്ടെന്നും അദ്ദേഹം പറഞ്ഞു. നിലവിൽ അമ്പത് ശതമാനത്തിൽ താഴെ കർഷകർ മാത്രമാണ് ക്ഷീരസഹകരണ സംഘങ്ങളിൽ അംഗങ്ങളായിട്ടുള്ളത്. കൂടുതൽ കർഷകരെ സഹകരണ മേഖലയിലേക്ക് കൊണ്ടുവരാനുള്ള ശ്രമങ്ങളും ശക്തമാക്കും. ആറുമാസം കൂടുമ്പോൾ പാൽ ഉൽപ്പാദന പുരോഗതി വിലയിരുത്തുമെന്നും സർക്കാർ അറിയിച്ചു.

.