ന്യൂഡല്ഹി | കോഴിക്കോട്-വയനാട് ജില്ലകളെ ബന്ധിപ്പിക്കുന്ന നിര്ദിഷ്ട നാലുവരി തുരങ്കപാതക്ക് കേന്ദ്ര പരിസ്ഥിതി മന്ത്രാലയത്തിനു കീഴിലെ വിദഗ്ധസമിതി അനുമതി നല്കി. 60 ഉപാധികളോടെയാണ് കേന്ദ്ര പരിസ്ഥിതി മന്ത്രാലയത്തിലെ വിദഗ്ധ സമിതി അന്തിമ പാരിസ്ഥിതികാനുമതി നല്കിയത്. ഇതോടെ കരാര് ഒപ്പിട്ട് തുരങ്കപാതയുടെ പ്രവൃത്തി ആരംഭിക്കാനാകും.
പക്ഷികളുടെയും വന്യമൃഗങ്ങളുടെയും സംരക്ഷണത്തിനാവശ്യമായ കാര്യങ്ങൾ ചെയ്യണം..
തുരങ്കപാതയുടെ നിര്മാണത്തിന്റെ ഖനനസമയത്ത് ഉണ്ടാവാന് സാധ്യതയുള്ള സ്ഫോടനതിന്റെ പ്രത്യാഘാതങ്ങള് കുറക്കാന് സി എസ് ഐ ആര്, സി ഐ എം എഫ് ആര് എന്നിവ നല്കിയിട്ടുള്ള മുഴുവന് നിര്ദേശങ്ങളും പാലിക്കാന് പദ്ധതി നിര്വാഹകര് ശ്രദ്ധിക്കണം എന്നതാണ് വിദഗ്ധസമിതിയുടെ പ്രധാന നിര്ദേശങ്ങളില് ഒന്ന്. വൈബ്രേഷന്, പ്രളയം, ഭൂമിശാസ്ത്രപരമായ പഠനങ്ങള് എന്നിവയിലുള്ള നിര്ദേശങ്ങളും പാലിക്കണം. ഇവയുമായി ബന്ധപ്പെട്ട റിപ്പോര്ട്ട് ആറു മാസത്തില് ഒരിക്കല് പരിസ്ഥിതി മന്ത്രാലയത്തിന് കൈമാറണം. നാല് ഗ്രൗണ്ട് വൈബ്രേഷന് മോണിറ്ററിങ് സ്റ്റേഷനുകള് നിര്മിക്കാനും നിര്ദേശമുണ്ട്. നിര്മാണ ജോലിക്കിടെ മണ്ണിടിച്ചിലോ വെള്ളപ്പൊക്കമോ മൂലമുണ്ടാകുന്ന അപകടങ്ങള് കുറയ്ക്കുന്നതിനായുള്ള സംവിധാനങ്ങളും ഒരുക്കണം. പശ്ചിമഘട്ട മലനിരകളിലൂടെ കടന്നു പോകുന്ന പാത ജൈവ വൈവിധ്യ സമ്പന്നമായതിനാല് സംരക്ഷണ പട്ടികയിലുള്ള ബാണാസുര ചിലപ്പന് അടക്കമുള്ള പക്ഷികളുടെയും വന്യമൃഗങ്ങളുടെയും സംരക്ഷണത്തിനാവശ്യമായ കാര്യങ്ങളും ചെയ്യണം..
നിര്മ്മാണത്തില് ഏര്പ്പെടുന്നവര്ക്ക് മതിയായ സുരക്ഷ ഒരുക്കണം
അപ്പന്കാപ്പ് ആന ഇടനാഴിയുടെ സംരക്ഷണം, നിര്ധിഷ്ട പദ്ധതി പരിസ്ഥിതി ലോല മേഖലയില് ഉള്പ്പെടുന്നതിനാല് സ്ഥിരമായ നിരീക്ഷണം, കലക്ടര് ശുപാര്ശ ചെയ്യുന്ന നാലുപേര് അടങ്ങുന്ന വിദഗ്ധസമിതി രൂപീകരിക്കുക, നിര്മ്മാണത്തില് ഏര്പ്പെടുന്നവര്ക്ക് മതിയായ സുരക്ഷ ഒരുക്കുക, ഇരുവഴിഞ്ഞി പുഴയുടെ സ്വാഭാവിക ഒഴുക്ക് തടയാത്ത രീതിയില് നിര്മ്മാണം നടത്തുക, ടണലിന്റെ ഉള്ളിലെ വായുവിന്റെ ഗുണനിലവാരം തുടര്ച്ചയായി നിരീക്ഷിക്കുക തുടങ്ങിയ നിബന്ധനകളും നല്കിയിട്ടുണ്ട്..
.
