മരുമകനെ കൊല്ലാൻ ക്വട്ടേഷൻ നൽകിയ കേസിലെ പ്രതിയെ നേപ്പാളിൽ നിന്ന് കസ്റ്റഡിയിലെടുത്ത് കേരള പൊലീസ്. കേസിലെ പ്രതി മലപ്പുറം കൊണ്ടോട്ടി സ്വദേശി കുണ്ടകുളവൻ വമ്പറമ്പിൽ വീട്ടിൽ മുഹമ്മദ് അഷ്ഫാഖാണ് (72) ചേവായൂർ പോലീസിന്റെ പിടിയിലായത്.2022ലാണ് കേസിന് ആസ്പദമായ കൊലപാതകശ്രമം നടന്നത്. ബാലുശ്ശേരി സ്വദേശി ലുഖ്മാനുല്‍ ഹക്കീമിനെ അപായപ്പെടുത്താന്‍ ശ്രമിച്ച കേസിലാണ് അറസ്റ്റ്. ലുഖ്മാനുലിന്റെ ഭാര്യപിതാവാണ് മുഹമ്മദ് അഷ്ഫാഖ്.
ക്വട്ടേഷൻ നൽകൽ അക്രമ ശ്രമം
കൃത്യം ചെയ്യാൻ ക്വട്ടേഷൻ നൽകുന്നതിന്റെ ഭാഗമായി ബേപ്പൂർ സ്വദേശിയായ ജാഷിം ഷാക്ക് രണ്ട് ലക്ഷം രൂപയും മുഹമ്മദ് അഷ്ഫാഖ് നൽകിയിരുന്നു. ജാഷിം ഷാ നാലുപേരെ ഇതിനായി നിയോഗിച്ചു. ഇവർ ലുഖ്മാനുല്‍ ഹക്കീമിനെ തട്ടിക്കൊണ്ടുപോയി എടവണ്ണ-കൊണ്ടോട്ടി റോഡിലെ തടി മില്ലിൽ എത്തിച്ച് കൊലപ്പെടുത്താൻ ശ്രമിക്കുകയായിരുന്നു. ചെങ്കല്ല് കൊണ്ട് ഇടിച്ച് കൊല്ലാൻ ശ്രമിക്കുന്നതിനിടെ ശബ്ദം കേട്ട് നാട്ടുകാർ എത്തുമ്പോഴേയ്ക്കും സംഘം കാറിൽ രക്ഷപ്പെട്ടു.
പ്രതിയുടെ ഒളിവും അറസ്റ്റ്
കേസ് അന്വേഷണം നടക്കുന്നതിനിടെ വിദേശത്തേക്ക് മുങ്ങിയ അഷ്ഫാഖിനെ കഴിഞ്ഞ ദിവസമാണ് ചേവായൂർ പോലീസ് നേപ്പാളിൽ നിന്ന് പിടികൂടിയത്. അന്വേഷണത്തിനിടെ പ്രതി നേപ്പാളിലുണ്ടെന്ന് മനസ്സിലാകുകയും ചേവായൂർ പോലീസ് സ്റ്റേഷനിലെ ഉദ്യോഗസ്ഥർ പ്രതിയെ കണ്ടെത്തുന്നതിനായി നേപ്പാളിലേക്ക് പോകുകയും ചെയ്തു.
തുടർന്ന്, ഫെബ്രുവരി 12-ാം തീയതി നേപ്പാളിലെ കാഠ്മണ്ഡുവിനടുത്ത് വളരെ സാഹസികമായി പ്രതിയെ അന്വേഷണ സംഘം കണ്ടെത്തുകയും കസ്റ്റഡിയിലെടുക്കുകയും ചെയ്തു. ഇന്നലെ (ഫെബ്രുവരി 16)രാത്രിയോടെ സ്റ്റേഷനിൽ എത്തിച്ച പ്രതിയെ കോടതിയിൽ ഹാജരാക്കി റിമാൻഡ് ചെയ്തു
