കോഴിക്കോട്: മെഡിക്കല് കോളജില് അഞ്ചു വര്ഷം മുമ്പ് ശസ്ത്രക്രിയയ്ക്കിടെ കത്രിക കുടുങ്ങിയെന്ന പരാതിയില് അടിയന്തര അന്വേഷണം നടത്തി റിപ്പോര്ട്ട് സമര്പ്പിക്കാന് അന്വേഷണ സംഘത്തെ ചുമതലപ്പെടുത്തി ഉത്തരവിട്ടതായി മന്ത്രി വീണാ ജോര്ജ്. മെഡിക്കല് വിദ്യാഭ്യാസ ഡയറക്ടറേറ്റ് സ്പെഷ്യൽ ഓഫീസര് ഡോ. അബ്ദുള്റഷീദ് കോര്ഡിനേറ്ററായ അന്വേഷണ സംഘത്തില് ജോയിന്റ് ഡയറക്ടര് നഴ്സിങ് ഡോ. സലീന ഷാ, കൊല്ലം മെഡിക്കല് കോളജ് ഫോറന്സിക് മെഡിസിന് വിഭാഗം മേധാവി ഡോ. രഞ്ജു രവീന്ദ്രന് എന്നിവരാണുള്ളത്. വിഷയത്തിന്റെ പ്രാധാന്യം മനസിലാക്കി പരാതിയിന്മേല് അടിയന്തരമായി അനേ്വഷണം നടത്തി ഉടന് റിപ്പോര്ട്ട് നല്കാനാണ് നിര്ദേശം നല്കിയിരിക്കുന്നത്. സംഭവം ശ്രദ്ധയില്പ്പെട്ടയുടനെ ആരോഗ്യ വകുപ്പ് അഡീ. ചീഫ് സെക്രട്ടിയോട് അന്വേഷിച്ച് റിപ്പോര്ട്ട് നല്കാന് മന്ത്രി നിര്ദേശിച്ചിരുന്നു. ഇതിന്റെയടിസ്ഥാനത്തിലാണ് പ്രത്യേക അന്വേഷണ സംഘം രൂപീകരിച്ചത്.
ശസ്ത്രക്രിയയ്ക്കിടെ കത്രിക കുടുങ്ങിയ സംഭവം: പ്രത്യേക അന്വേഷണ സംഘം രൂപീകരിച്ചു
