തിരുവനന്തപുരം : സംസ്ഥാനത്ത് കൊവിഡ് വാക്സിനേഷന് വേണ്ടിയുള്ള കേന്ദ്രങ്ങളുടെ ഒരുക്കങ്ങള് പൂര്ത്തിയായതായി ആരോഗ്യ മന്ത്രി കെ കെ ശൈലജ അറിയിച്ചു. 8062 ആരോഗ്യ പ്രവര്ത്തകർ ആദ്യ ദിനം വാക്സിനേഷന് സ്വീകരിച്ചു. ആദ്യ ദിനത്തിലെ വിജയത്തെ തുടര്ന്ന് അതേ രീതിയില് വാക്സിനേഷന് തുടരാന് സംസ്ഥാനം തീരുമാനിച്ചിട്ടുണ്ടെന്നും മന്ത്രി പറഞ്ഞു.
വാക്സിന് കൊണ്ടുള്ള പാര്ശ്വഫലങ്ങളൊന്നും തന്നെ ഇതുവരെ ആരിലും റിപ്പോര്ട്ട് ചെയ്തിട്ടില്ല. വാക്സിൻ സംബന്ധിച്ചുള്ള ആശങ്കകള് മാറ്റാനായി ആരോഗ്യ വകുപ്പ് ഡയറക്ടര്, ആരോഗ്യ വിദ്യാഭ്യാസ ഡയറക്ടര്, മലബാര് ക്യാന്സര് സെന്റര് ഡയറക്ടര്, ഹൃദയ ശസ്ത്രക്രിയ വിദഗ്ധര് എന്നിവര് ഉള്പ്പെടെയുള്ള ആരോഗ്യ പ്രവര്ത്തകര് വാക്സിന് എടുത്തിരുന്നു.
20-1-2021 ബുധനാഴ്ച കുട്ടികള്ക്കുള്ള പ്രതിരോധ കുത്തിവയ്പ്പ് ദിവസമായതിനാല് അതിന് തടസം ഉണ്ടാകാതിരിക്കാൻ സംസ്ഥാനത്ത് 18-1-2021 തിങ്കള്, ചൊവ്വ, വ്യാഴം, വെള്ളി എന്നീ നാല് ദിവസങ്ങളിലാണ് വാക്സിന് കുത്തിവയ്പ്പ് എടുക്കുന്നത് എന്നും മന്ത്രി പറഞ്ഞു
ദിനംപ്രതി 100 പേരെ വച്ച് 133 കേന്ദ്രങ്ങളില് വാക്സിനേഷന് നല്കാനാണ് ഉദ്ദേശിക്കുന്നത്. ചില ചെറിയ കേന്ദ്രങ്ങളില് രജിസ്റ്റര് ചെയ്തവരുടെ വാക്സിനേഷന് പൂര്ത്തിയായതിനാല് ജില്ലകളുടെ മേല്നോട്ടത്തില് പുതിയ കേന്ദ്രങ്ങള് ആരംഭിക്കും.
തിങ്കളാഴ്ച മുതല് തിരുവനന്തപുരം മെഡിക്കല് കോളേജിലും ചൊവ്വാഴ്ച മുതല് തിരുവനന്തപുരം ജനറല് ആശുപത്രിയിലും വാക്സിനേഷന് കേന്ദ്രങ്ങള് ആരംഭിക്കുന്നതാണ്. തിരുവനന്തപുരം ജില്ലയില് പൂഴനാട്, മണമ്പൂര്, വര്ക്കല എന്നിവിടങ്ങളിലെ ആശുപത്രികളില് വാക്സിനേഷന് പൂര്ത്തിയായിട്ടുണ്ടെന്നും മന്ത്രി അറിയിച്ചു.
പുല്ലുവിള പ്രാഥമികാരോഗ്യ കേന്ദ്രത്തിലും അഞ്ചുതെങ്ങ് സാമൂഹികാരോഗ്യ കേന്ദ്രത്തിലും ഉടന് വാക്സിനേഷന് കേന്ദ്രങ്ങളാരംഭിക്കുന്നതാണ്.
