കോഴിക്കോട്: ജില്ലയില് ഷിഗെല്ല രോഗ ലക്ഷണങ്ങള് റിപ്പോര്ട്ട് ചെയ്തവരുടെ എണ്ണം അന്പത് കവിഞ്ഞു. രോഗം പടരാതിരിക്കാന് അതീവ ജാഗ്രതയാണ് ആരോഗ്യ വകുപ്പ് പുലർത്തുന്നത്. വീടുകള് കയറിയുള്ള പ്രതിരോധ പ്രവര്ത്തനങ്ങൾക്കാണ് മുൻതൂക്കം . കോഴിക്കോട് കോട്ടാംപറമ്പില് പതിനൊന്ന് വയസുള്ള കുട്ടി ഷിഗെല്ല ബാധിച്ച് മരിച്ചതിനെ തുടര്ന്നാണ് ആരോഗ്യവകുപ്പ് അതീവ ജാഗ്രത പ്രഖ്യാപിച്ചത്.
മനുഷ്യ വിസര്ജ്ജ്യത്തില് നിന്നാണ് രോഗവാഹകരായ ബാക്ടീരിയ കൂടി വെള്ളത്തില് കലരുന്നത്.
രോഗ ബാധ കണ്ടെത്തിയ പ്രദേശങ്ങളിലെ 120 കിണറുകളില് സൂപ്പര് ക്ലോറിനേഷന് നടത്തി. കടലുണ്ടി, ഫറോക്ക്, പെരുവയല്, വാഴൂര് പ്രദേശങ്ങളിലും ഷിഗെല്ല കേസുകള് റിപ്പോര്ട്ട് ചെയ്തിട്ടുണ്ട്. ഇവിടങ്ങളിലെല്ലാം ഒരാഴ്ച തുടര്ച്ചയായി ആരോഗ്യ പ്രവര്ത്തകരുടെ നേതൃത്വത്തില് പ്രതിരോധ പ്രവര്ത്തനങ്ങള് നടത്തും.
19-12-2020 ശനിയാഴ്ച കോട്ടാംപറമ്പില് പ്രത്യേക മെഡിക്കല് ക്യാമ്പും സംഘടിപ്പിച്ചിരുന്നു.
മുതിര്ന്നവരേക്കാള് കുട്ടികളെയാണ് രോഗം ഗുരുതരമായി ബാധിക്കുന്നത്. രോഗബാധിതരുമായുള്ള സമ്പര്ക്കത്തിലൂടെ വളരെ വേഗം ഷിഗെല്ല പടരും. ഛര്ദ്ദി, പനി, വയറിളക്കം, വിസര്ജ്ജ്യത്തില് രക്തം എന്നിവയാണ് പ്രധാന രോഗ ലക്ഷണങ്ങള്. വ്യക്തി ശുചിത്യം പാലിക്കുകയാണ് ഏറ്റവും നല്ല പ്രതിരോധ മാർഗം. രോഗലക്ഷണങ്ങള് കണ്ടാല് എത്രയും വേഗം ചികിത്സ തേടണമെന്ന് ആരോഗ്യവിദഗ്ധര് മുന്നറിയിപ്പ് നല്കുന്നു.
