മുംബൈ: കൊവിഡ് വാക്സിൻ 2021 ജനുവരിയിൽ തന്നെ രാജ്യത്ത് ലഭ്യമാകുമെന്ന് സെറം ഇൻസ്റ്റിറ്റ്യൂട്ട്. പൂനെ ആസ്ഥാനമായുള്ള ഫാർമസ്യൂട്ടിക്കൽ കമ്പനിയായ സെറം ഇൻസ്റ്റിറ്റ്യൂട്ട് ഓഫ് ഇന്ത്യ ചീഫ് എക്സിക്യൂട്ടീവ് ഓഫീസർ അദർ പൂനവാലയാണ് 04/11/20 ബുധനാഴ്ച ഇക്കാര്യം വ്യക്തമാക്കിയത്.
“ഇന്ത്യയിലെയും ഇംഗ്ലണ്ടിലെയും പരീക്ഷണങ്ങളുടെ വിജയത്തെ അടിസ്ഥാനമാക്കി, റെഗുലേറ്ററി ബോഡികളിൽ നിന്നുള്ള അംഗീകാരങ്ങൾ യഥാസമയം ലഭ്യമായാൽ 2021 ജനുവരിയിൽ വാക്സിൻ ഇന്ത്യയിൽ വിതരണം ചെയ്യാനാകുമെന്ന് പ്രതീക്ഷിക്കാം.” അദ്ദേഹം പറഞ്ഞു.
കോവിഡ് -19 വാക്സിനായ കോവിഷീൽഡ് നിർമ്മിക്കാൻ ബ്രിട്ടീഷ്-സ്വീഡിഷ് ഫാർമ കമ്പനിയായ ആസ്ട്രാസെനെക്കയുമായി സഹകരിച്ചാണ് സെറം ഇൻസ്റ്റിറ്റ്യൂട്ട് പ്രവർത്തിക്കുന്നത്.
ഓക്സ്ഫോർഡ് യൂണിവേഴ്സിറ്റി വികസിപ്പിച്ചെടുത്ത കോവിഷീൽഡ് നിലവിൽ രാജ്യത്ത് 2-3 ഘട്ടങ്ങളിലെ ക്ലിനിക്കൽ ട്രയലിലാണ്, താഴ്ന്നതും ഇടത്തരവുമായ വരുമാനമുള്ള രാജ്യങ്ങൾക്കായാണ് സെറം ഇത് നിർമ്മിക്കുന്നത്.
ഇന്ത്യയിലും വിദേശത്തുമുള്ള ആയിരക്കണക്കിന് ആളുകൾക്ക് ഇതുവരെ സുരക്ഷാ പ്രശ്നങ്ങളൊന്നുമില്ലാതെ വാക്സിൻ നൽകിയിട്ടുണ്ടെന്ന് പൂനവാല പറഞ്ഞു. എന്നിരുന്നാലും, വാക്സിനിലെ ദീർഘകാല ഫലങ്ങൾ കണ്ടെത്താൻ രണ്ട് മൂന്ന് വർഷം എടുക്കുമെന്ന് അദ്ദേഹം കൂട്ടിച്ചേർത്തു.
ബ്രിട്ടീഷ് മെഡിക്കൽ ജേണലായ ദി ലാൻസെറ്റിൽ പ്രസിദ്ധീകരിച്ച ഒരു റിപ്പോർട്ട് അനുസരിച്ച്, കോവിഡ് -19 വാക്സിൻ 18 നും 55 നും ഇടയിൽ പ്രായമുള്ളവരിൽ ഇരട്ട രോഗപ്രതിരോധ ശേഷി ഉളവാക്കിയിട്ടുണ്ട്. പരീക്ഷണങ്ങളിൽ ഡോസ് ഇഞ്ചക്ഷനും പരിശോധിക്കുന്നുണ്ട്.
