തിരുവനന്തപുരം: കേരള കോണ്ഗ്രസ് എമ്മിന്റെ തെരഞ്ഞെടുപ്പു ചിഹ്നമായ രണ്ടില ജോസ് കെ മാണി വിഭാഗത്തിന് നല്കിയ കേന്ദ്ര തെരഞ്ഞെടുപ്പു കമ്മിഷന്റെ തീരുമാനത്തിന് ഹൈക്കോടതിയുടെ സ്റ്റേ. ഒരു മാസത്തേയ്ക്കാണ് സ്റ്റേ ചെയ്തത്. പി.ജെ ജോസഫ് വിഭാഗം നല്കിയ ഹര്ജിയിലാണ് ഹൈക്കോടതി നടപടി. ജോസ് കെ മാണി വിഭാഗത്തിന് അനുകൂലമായുളള തെരഞ്ഞെടുപ്പ് കമ്മീഷന്റെ ഉത്തരവിനെതിരെ പി.ജെ. ജോസഫ് കോടതിയെ സമീപിച്ചിരുന്നു.
കെഎം മാണിയുടെ മരണത്തെത്തുടര്ന്ന് യഥാര്ഥ കേരള കോണ്ഗ്രസ് ആരെന്ന തര്ക്കം നിലനില്ക്കെ കഴിഞ്ഞയാഴ്ചയാണ് രണ്ടില ചിഹ്നം ജോസ് കെ മാണി പക്ഷത്തിനു നല്കാന് കേന്ദ്ര തെരഞ്ഞെടുപ്പു കമ്മിഷന് തീരുമാനിച്ചത്.
തുടർന്ന് വസ്തുതകള് പരിശോധിക്കാതെയാണ് തെരഞ്ഞെടുപ്പു കമ്മിഷന് തീരുമാനത്തിലെത്തിയതെന്ന് ആരോപിച്ച് ജോസഫ് ഹര്ജി നല്കി. കമ്മീഷണര് അശോക് ലവാസയുടെ വിയോജനക്കുറിപ്പോടെയായിരുന്നു തീരുമാനം.
ഒക്ടോബര് ഒന്നിന് കേസ് വീണ്ടും കോടതി പരിഗണിക്കും. ഇരു വിഭാഗത്തിന്റെ വിശദമായ വാദം കോടതി കേട്ട ശേഷം അന്തിമ തീരുമാനം ഉണ്ടാകും.
