കൊച്ചി നവംബര് 19: ഇരുചക്രവാഹനങ്ങളില് പിന്സീറ്റിലെ യാത്രക്കാര്ക്കും ഹെല്മെറ്റ് നിര്ബന്ധമാണെന്ന് ഹൈക്കോടതി. സര്ക്കുലര് ഉടന് ഇറക്കുമെന്നും മാധ്യമങ്ങള് വഴി പ്രചാരണം നടത്തുമെന്നും സര്ക്കാര് കോടതിയെ അറിയിച്ചു. പിന്സീറ്റില് ഹെല്മെറ്റ് നിര്ബന്ധമാക്കുന്നതിനെതിരെ നല്കിയിരുന്ന അപ്പീല് സര്ക്കാര് പിന്വലിച്ചു.
കേന്ദ്ര മോട്ടോര് വാഹന നിയമത്തില് ഭേദഗതി വരുത്തികൊണ്ട് കേന്ദ്രസര്ക്കാര് പിന്സീറ്റ് യാത്രക്കാര്ക്കും ഹെല്മെറ്റ് നിര്ബന്ധമാക്കിയിരുന്നു. നിയമം പ്രാബല്യത്തിലുണ്ടായിരുന്ന സംസ്ഥാനത്ത് ഇത് കര്ശനമായി പാലിച്ചിരുന്നില്ല. നാല് വയസ്സിന് മുകളിലുള്ളവര്ക്ക് ഹെല്മെറ്റ് നിര്ബന്ധമാക്കികൊണ്ടാണ് കേന്ദ്ര മോട്ടോര് വാഹന നിയമം ഭേദഗതി ചെയ്തിരുന്നത്. ഈ നിയമം സംസ്ഥാനത്ത് കര്ശനമായി നടപ്പാക്കണമെന്ന് ഹൈക്കോടതി വ്യക്തമാക്കി.
