കൊച്ചി: നടിയെ ആക്രമിച്ചക്കേസില് വിചാരണ കോടതി മാറ്റണമെന്ന നടിയുടെയും സര്ക്കാരിന്റെയും ആവശ്യം ഹൈക്കോടതി തള്ളി. തിങ്കളാഴ്ച (23/11/20) മുതല് വിചാരണ ആരംഭിക്കണമെന്നും ഹൈക്കോടതി ഉത്തരവിട്ടു.
പ്രോസിക്യൂഷനും ജഡ്ജിയും ഒരുമിച്ച് പോയാല് മാത്രമേ നീതി നടപ്പാകുകയുള്ളൂവെന്നും ഹൈക്കോടതി നിരീക്ഷിച്ചു. നിലവിലെ ജഡ്ജിയുടെ ഭാഗത്ത് നിന്ന് കേസ് മാറ്റാനുള്ള കാരണങ്ങള് വ്യക്തമായി ബോധിപ്പിക്കാന് സര്ക്കാരിനോ നടിക്കോ കഴിഞ്ഞില്ലെന്നും കോടതി പറഞ്ഞു.
ഇതിന് പിന്നാലെ സിംഗിള് ബെഞ്ചിന്റെ വിധിക്കെതിരെ അപ്പീല് പോകണമെന്നും ഒരാഴ്ച വിധിയില് സ്റ്റേ വേണമെന്നും സര്ക്കാര് പറഞ്ഞെങ്കിലും ആവശ്യം തള്ളുകയായിരുന്നു.
കോടതിക്കെതിരെ ഗുരുതര ആരോപണങ്ങളാണ് സംസ്ഥാന സര്ക്കാരും നടിയും ഉന്നയിച്ചിരുന്നത്. നടിയുടെ മൊഴി പോലും കോടതി കൃത്യമായി രേഖപ്പെടുത്തിയില്ലെന്ന് സര്ക്കാര് പറഞ്ഞിരുന്നു.
ആറ് മാസം കൊണ്ട് വിചാരണ പൂര്ത്തിയാക്കാനാണ് സുപ്രീംകോടതിയുടെ നിര്ദ്ദേശം. ഇതുപ്രകാരം 2021 ഫെബ്രുവരിയോടെ വിചാരണ പൂര്ത്തിയാക്കണം.
