വാഷിംഗ്ടൺ: കൊവിഡ് സൃഷ്ടിക്കുന്ന പ്രതിസന്ധിയിൽ പ്രതിമാസം 10,000 കുട്ടികൾ പോഷകാഹാരക്കുറവ് മൂലം മരിക്കാനിടയുണ്ടെന്ന് ലോകാരോഗ്യ സംഘടന മേധാവി മുന്നറിയിപ്പ് നൽകി.
ബുധനാഴ്ച (14/10/20 ) ഐക്യരാഷ്ട്രസംഘടനയുടെ ഫുഡ് ആൻഡ് അഗ്രികൾച്ചർ സമ്മേളനത്തിൽ സംസാരിക്കവെയാണ് ലോകാരോഗ്യ സംഘടനയുടെ തലവൻ ടെഡ്രോസ് അദാനോം ഗെബ്രിയേസസ് ഇക്കാര്യം പറഞ്ഞത്.
‘ഈ വർഷം കുട്ടികളിലെ പോഷകാഹാരക്കുറവ് 14% വർദ്ധിക്കുമെന്നാണ് ആശങ്കപ്പെടുന്നത്. സബ് സഹാറൻ ആഫ്രിക്കയിലും ദക്ഷിണേഷ്യയിലുമായിരിക്കും കൂടുതൽ ഗുരുതരമായ സ്ഥിതി വിശേഷം ഉണ്ടാവുക.
“ദരിദ്രർ അവശേഷിക്കുമ്പോൾ സമ്പന്നർക്ക് ആരോഗ്യകരമായ ഭക്ഷണരീതി ലഭ്യമാകുന്ന ഒരു ലോകം ഞങ്ങൾക്ക് അംഗീകരിക്കാൻ കഴിയില്ല, സമ്പന്നർക്ക് വീട്ടിൽ താമസിക്കാൻ കഴിയും, ദരിദ്രർ ജോലിക്ക് പോകണം,” അദ്ദേഹം പറഞ്ഞു.
അവശ്യ സേവനങ്ങൾ, രോഗപ്രതിരോധം, മാതൃ സേവനങ്ങൾ, കുട്ടികളുടെ പോഷകാഹാരം, കുടുംബാസൂത്രണം തുടങ്ങിയവയ്ക്ക് പാൻഡെമിക് ഗുരുതരമായ തടസ്സങ്ങൾ സൃഷ്ടിച്ചു. മഹാമാരി സൃഷ്ടിച്ച സാമ്പത്തിക നാശത്തിന് ശേഷം, സുസ്ഥിര ഭക്ഷ്യ സംവിധാനങ്ങളെ പിന്തുണയ്ക്കുന്നതിനും അനാരോഗ്യകരമായ ഭക്ഷണസാധനങ്ങൾ ഉൽപാദിപ്പിക്കുന്നവർക്കുള്ള സബ്സിഡി അവസാനിപ്പിക്കുന്നതിനും സർക്കാരുകൾ തയ്യാറാകണമെന്ന് സംഘടനയുടെ ഡയറക്ടർ ജനറൽ കൂട്ടിച്ചേർത്തു.
“ജീവിതം ദുർബലമാണെന്നും ആരോഗ്യം വിലപ്പെട്ടതാണെന്നും ആരോഗ്യകരമായ ഭക്ഷണരീതി സമ്പന്നർക്ക് മാത്രമുള്ളതല്ലെന്നും അവ മനുഷ്യാവകാശമാണെന്നുമാണ് കോവിഡ് നമ്മെ ഓർമ്മിപ്പിക്കുന്നത് ” അദ്ദേഹം പറഞ്ഞു.
