ന്യൂഡൽഹി  /  2026  / നവംബർ 11

പട്ടികജാതി പട്ടികവർഗ വിഭാഗങ്ങളുടെ ഉടമസ്ഥതയിലുള്ള സൂക്ഷ്മ, ചെറുകിട സംരംഭങ്ങളിൽനിന്നുള്ള വാങ്ങൽ വർധിപ്പിക്കാൻ കേന്ദ്ര പൊതുമേഖലാ സ്ഥാപനങ്ങളുമായി സൂക്ഷ്മ, ചെറുകിട, ഇടത്തരം സംരംഭ മന്ത്രാലയം വട്ടമേശ ചർച്ച നടത്തി. നവംബർ അഞ്ചിന് ന്യൂഡൽഹിയിലെ ഡോ. അംബേദ്കർ അന്താരാഷ്ട്ര കേന്ദ്രത്തിലായിരുന്നു യോഗം. സർക്കാർ പൊതുസംഭരണ നയപ്രകാരം ഈ സംരംഭങ്ങളിൽനിന്ന് നിർബന്ധമായും നടത്തേണ്ട നാല് ശതമാനം വാങ്ങലിന്റെ പുരോഗതി വിലയിരുത്തുകയായിരുന്നു ലക്ഷ്യം. മന്ത്രാലയം ജോയിന്റ് സെക്രട്ടറി മേഴ്സി ഇപാവോ യോഗത്തിൽ അധ്യക്ഷത വഹിച്ചു. ഗവൺമെന്റ് ഇ മാർക്കറ്റ്പ്ലേസായ ജെമ്മിന്റെ അഡീഷണൽ ചീഫ് എക്സിക്യൂട്ടീവ് ഓഫീസർ അജിത് ചവാൻ, ദേശീയ ചെറുകിട വ്യവസായ കോർപ്പറേഷനായ എൻഎസ്ഐസിയുടെ ചെയർമാനും മാനേജിങ് ഡയറക്ടറുമായ ഡോ. എസ്. എസ്. ആചാര്യ എന്നിവർ പങ്കെടുത്തു. മന്ത്രാലയം, പൊതുമേഖലാ സംരംഭ വകുപ്പ്, എൻഎസ്ഐസി എന്നിവയിലെ മുതിർന്ന ഉദ്യോഗസ്ഥരും പങ്കെടുത്ത് പട്ടികജാതി പട്ടികവർഗ സംരംഭങ്ങളെ സഹായിക്കാൻ നടത്തുന്ന ഇടപെടലുകൾ വിശദീകരിച്ചു.

വെല്ലുവിളികളും മികച്ച മാതൃകകളും പങ്കുവെച്ച് മുപ്പത് സ്ഥാപനങ്ങൾ

ഭെൽ, ബിഇഎൽ, എൻടിപിസി, എയർപോർട്ട്സ് അതോറിറ്റി ഓഫ് ഇന്ത്യ, ബിഇഎംഎൽ, കോൾ ഇന്ത്യ ലിമിറ്റഡ് എന്നിവ ഉൾപ്പെടെ മുപ്പത് കേന്ദ്ര പൊതുമേഖലാ സ്ഥാപനങ്ങൾ ചർച്ചയിൽ പങ്കെടുത്തു. വാങ്ങലുമായി ബന്ധപ്പെട്ട് സ്ഥാപനങ്ങൾ നേരിടുന്ന വെല്ലുവിളികളും ഫലപ്രദമായി നടപ്പാക്കിയ പ്രവർത്തനരീതികളും ചർച്ചയായി. ദേശീയ പട്ടികജാതി പട്ടികവർഗ ഹബ്ബിന്റെ ഓഫീസുകൾ, ജെം, കേന്ദ്ര പൊതുമേഖലാ സ്ഥാപനങ്ങൾ എന്നിവ തമ്മിലുള്ള ഏകോപനം കൂടുതൽ ശക്തമാക്കാനുള്ള വഴികളും വിലയിരുത്തി.

പദ്ധതി തുടങ്ങിയതിനുശേഷം വാങ്ങലിൽ മുപ്പത്തിയാറ് മടങ്ങിലേറെ വർധന

ദേശീയ പട്ടികജാതി പട്ടികവർഗ ഹബ് പദ്ധതിയിലൂടെ ഈ വിഭാഗങ്ങളിലെ സൂക്ഷ്മ, ചെറുകിട സംരംഭങ്ങളെ പ്രോത്സാഹിപ്പിക്കാനും കൈപിടിച്ചുയർത്താനും നടപ്പാക്കിയ വിവിധ നടപടികൾ മേഴ്സി ഇപാവോ വിശദീകരിച്ചു. ഇതിലൂടെ സർക്കാർ വാങ്ങലിൽ ഈ സംരംഭങ്ങളുടെ പങ്ക് തുടർച്ചയായി വർധിച്ചു. പദ്ധതി ആരംഭിച്ച സമയത്തെ അപേക്ഷിച്ച് 2025–26 സാമ്പത്തിക വർഷത്തിൽ ഇവയിൽനിന്നുള്ള പൊതുസംഭരണത്തിൽ മുപ്പത്തിയാറ് മടങ്ങിലേറെ വർധനയുണ്ടായതായി അവർ അറിയിച്ചു. സംരംഭകർക്ക് അവബോധം നൽകാനും കേന്ദ്ര പൊതുമേഖലാ സ്ഥാപനങ്ങളുമായി ബന്ധം സ്ഥാപിക്കാനുമായി പുതുതായി തുടങ്ങിയ സംരംഭക ബോധവത്കരണ, പ്രത്യേക വിതരണക്കാരുടെ വികസന പരിപാടിയും അവർ പരിചയപ്പെടുത്തി. വാങ്ങൽ ലക്ഷ്യം കൈവരിക്കാൻ പൊതുമേഖലാ സ്ഥാപനങ്ങൾ ആഭ്യന്തര പ്രവർത്തനപദ്ധതി തയ്യാറാക്കണമെന്ന് അവർ ആവശ്യപ്പെട്ടു. വിതരണക്കാരുടെ രജിസ്ട്രേഷനും പട്ടികയിൽ ഉൾപ്പെടുത്തുന്നതിനുമുള്ള നടപടികളിൽ സഹായിക്കണം. ആവശ്യമായ ഉൽപ്പന്നങ്ങളും സേവനങ്ങളും നൽകുന്ന സംരംഭങ്ങളെ കണ്ടെത്തി ബന്ധിപ്പിക്കണം. പ്രാദേശികതലത്തിൽ ഈ സംരംഭങ്ങളുമായുള്ള ബന്ധം ശക്തമാക്കുകയും തുടർസഹായം നൽകുകയും വേണമെന്നും അവർ നിർദേശിച്ചു.

ടെൻഡറിൽ പങ്കെടുക്കാൻ ജെമ്മിലൂടെ കൂടുതൽ സഹായം

ചെറുകിട സംരംഭങ്ങളെ ശക്തിപ്പെടുത്താനും പൊതുസംഭരണ സംവിധാനത്തിൽ പ്രധാന നേട്ടങ്ങൾ കൈവരിക്കാനും മന്ത്രാലയം നൽകിയ സംഭാവന അജിത് ചവാൻ എടുത്തുപറഞ്ഞു. പട്ടികജാതി പട്ടികവർഗ സംരംഭങ്ങൾക്ക് ടെൻഡറുകളിൽ പങ്കെടുക്കാൻ സഹായിക്കുന്ന വിവിധ നടപടികളും അദ്ദേഹം വിശദീകരിച്ചു. ഈ വിഭാഗങ്ങളിലെ വിൽപ്പനക്കാരെ പ്രത്യേക ഫിൽട്ടറുകൾ ഉപയോഗിച്ച് ജെം വിപണിയിൽ കണ്ടെത്താനുള്ള സൗകര്യവും ഇതിലുണ്ട്. വാങ്ങൽ അവസരങ്ങളിൽ തുല്യപ്രവേശനം ഉറപ്പാക്കാൻ വിവിധ മേഖലകളിലെ വിൽപ്പനക്കാരെ പങ്കാളികളാക്കണമെന്ന് അദ്ദേഹം പറഞ്ഞു. സേവനമേഖലയിലും വിവിധ വ്യവസായ മേഖലകളിലും പ്രത്യേക ശ്രദ്ധ നൽകണം. തുടർസഹായത്തിനായി ജെം നിയോഗിച്ച നോഡൽ ഓഫീസറുടെ സേവനം പൊതുമേഖലാ സ്ഥാപനങ്ങൾ ഉപയോഗപ്പെടുത്തണമെന്നും അദ്ദേഹം ആവശ്യപ്പെട്ടു.

വനിതാ സംരംഭങ്ങളിൽനിന്നുള്ള വാങ്ങലും ശക്തമാക്കും

മികച്ച പ്രകടനം കാഴ്ചവെച്ച പൊതുമേഖലാ സ്ഥാപനങ്ങളുമായി ആശയവിനിമയം നടത്താനും സ്വന്തം പ്രവർത്തനങ്ങളിലെ പോരായ്മകൾക്കും വെല്ലുവിളികൾക്കും പരിഹാരം കണ്ടെത്താനും യോഗം മറ്റ് സ്ഥാപനങ്ങൾക്ക് അവസരമൊരുക്കി. വിതരണക്കാരുടെ വികസന പരിപാടികൾ, ശേഷിവികസന പ്രവർത്തനങ്ങൾ, ഡിജിറ്റൽ സഹായം എന്നിവയിലൂടെ കേന്ദ്ര പൊതുമേഖലാ സ്ഥാപനങ്ങളും ദേശീയ പട്ടികജാതി പട്ടികവർഗ ഹബ്ബും തമ്മിലുള്ള സഹകരണം വർധിപ്പിക്കുന്നതും ചർച്ചയായി. പട്ടികജാതി പട്ടികവർഗ വിഭാഗങ്ങളുടെയും വനിതകളുടെയും ഉടമസ്ഥതയിലുള്ള സൂക്ഷ്മ, ചെറുകിട സംരംഭങ്ങളിൽനിന്നുള്ള വാങ്ങൽ ശക്തമാക്കുകയാണ് ഈ പ്രവർത്തനങ്ങളുടെ ലക്ഷ്യം.

.