ഡൽഹി / 2026 / നവംബർ 11
ജൈവസാങ്കേതികവിദ്യ നയിക്കുന്ന അടുത്ത വ്യവസായ വിപ്ലവത്തിന് നേതൃത്വം നൽകാനുള്ള ശേഷി ഇന്ത്യക്കുണ്ടെന്ന് കേന്ദ്രമന്ത്രി ഡോ. ജിതേന്ദ്ര സിങ് പറഞ്ഞു. ബയോടെക്നോളജി റിസർച്ച് ആൻഡ് ഇന്നൊവേഷൻ കൗൺസിലിന്റെ, അഥവാ ബ്രിക്കിന്റെ, മൂന്നാം സ്ഥാപകദിനാഘോഷത്തിൽ സംസാരിക്കുകയായിരുന്നു അദ്ദേഹം. നവംബർ പത്തിന് ബ്രിക്കിന് കീഴിലുള്ള നാഷണൽ ഇൻസ്റ്റിറ്റ്യൂട്ട് ഓഫ് ഇമ്യൂണോളജിയിലായിരുന്നു പരിപാടി. ഗവേഷണ സ്ഥാപനങ്ങൾ തമ്മിലുള്ള ഏകോപനവും വ്യവസായ മേഖലയുടെ പങ്കാളിത്തവും വർധിപ്പിക്കണമെന്ന് മന്ത്രി ആവശ്യപ്പെട്ടു. സ്ഥാപനങ്ങളുടെ സ്വാതന്ത്ര്യം നിലനിർത്തി വിഭവങ്ങൾ പങ്കിടുന്ന ബ്രിക്കിന്റെ മാതൃക ശാസ്ത്ര സഹകരണം വേഗത്തിലാക്കുന്നുവെന്നും അദ്ദേഹം പറഞ്ഞു.
ശാസ്ത്രസാങ്കേതികവിദ്യ, ഭൗമശാസ്ത്ര വകുപ്പുകളുടെ സ്വതന്ത്ര ചുമതലയുള്ള കേന്ദ്ര സഹമന്ത്രിയാണ് ജിതേന്ദ്ര സിങ്. പ്രധാനമന്ത്രിയുടെ ഓഫീസ്, പേഴ്‌സണൽ, പൊതുപരാതി, പെൻഷൻ, ആണവോർജം, ബഹിരാകാശം എന്നിവയുടെ സഹമന്ത്രി ചുമതലയും അദ്ദേഹത്തിനുണ്ട്. ശാസ്ത്ര സ്ഥാപനങ്ങൾ ഒറ്റപ്പെട്ട് പ്രവർത്തിക്കുന്ന സാഹചര്യം ഒഴിവാക്കാനും ഏകോപനം മെച്ചപ്പെടുത്താനും സർക്കാർ നടപടികൾ സ്വീകരിച്ചിട്ടുണ്ടെന്ന് അദ്ദേഹം പറഞ്ഞു. സ്ഥാപനങ്ങൾ സ്വന്തം വ്യക്തിത്വവും സ്വാതന്ത്ര്യവും സ്വയംഭരണവും നിലനിർത്തിക്കൊണ്ട് വിഭവങ്ങൾ പങ്കിടുന്ന ‘കൂട്ടുകുടുംബം’ എന്നാണ് ബ്രിക്കിനെ മന്ത്രി വിശേഷിപ്പിച്ചത്. ഒന്നിലധികം ഡയറക്ടറേറ്റുകളെയും അനുമതികളെയും ആശ്രയിക്കുന്നതിലൂടെ ഉണ്ടായിരുന്ന നടപടിക്രമങ്ങളിലെ കാലതാമസം ഇതിലൂടെ കുറഞ്ഞു. ശാസ്ത്ര സഹകരണത്തിന് കൂടുതൽ അവസരങ്ങളും തുറന്നു. മറ്റു വകുപ്പുകളും മന്ത്രാലയങ്ങളും ഈ മാതൃക സ്വീകരിച്ചിട്ടുണ്ടെന്നും അദ്ദേഹം പറഞ്ഞു.
ജൈവ സമ്പദ്‌വ്യവസ്ഥ 195 ബില്യൺ ഡോളർ കടന്നു
സർക്കാർ അധികാരത്തിലെത്തിയപ്പോൾ ഏകദേശം 10 ബില്യൺ ഡോളറായിരുന്ന ഇന്ത്യയുടെ ജൈവ സമ്പദ്‌വ്യവസ്ഥ ഇപ്പോൾ 195 ബില്യൺ ഡോളറിന് മുകളിലെത്തിയതായി ജിതേന്ദ്ര സിങ് പറഞ്ഞു. ജൈവസാങ്കേതിക മേഖലയിലെ സ്റ്റാർട്ടപ്പുകളുടെ എണ്ണം ഏകദേശം 50–60 എന്ന നിലയിൽനിന്ന് 11,000 കടന്നു. ഇവയിൽ പലതിനും ആഗോളതലത്തിൽ വളരാനുള്ള ശേഷിയുണ്ടെന്നും അദ്ദേഹം പറഞ്ഞു. ബയോമാനുഫാക്ചറിങ് കേന്ദ്രങ്ങൾ, ബയോഫൗണ്ടറികൾ, നിർമിതബുദ്ധി സംയോജിപ്പിച്ച ജൈവ ഉൽപ്പാദന സംവിധാനങ്ങൾ എന്നിവയിലൂടെ ഉയർന്ന കാര്യക്ഷമതയുള്ള ഉൽപ്പാദനം ശക്തിപ്പെടുത്താനുള്ള ശ്രമങ്ങളും മന്ത്രി വിശദീകരിച്ചു.
മൊഹാലി, ഹൈദരാബാദ്, പുണെ, തിരുവനന്തപുരം എന്നിവിടങ്ങളിലെ ബയോഫൗണ്ടറി കേന്ദ്രങ്ങളെ അദ്ദേഹം പരാമർശിച്ചു. ബ്രിട്ടനിലെ സെന്റർ ഫോർ പ്രോസസ് ഇന്നൊവേഷനുമായുള്ള സഹകരണം ഉൾപ്പെടെയുള്ള അന്താരാഷ്ട്ര പങ്കാളിത്തങ്ങൾ കൂടുതൽ മുന്നേറ്റത്തിന് സഹായിക്കുമെന്ന് മന്ത്രി പറഞ്ഞു. ജീനോമിക്സ് സെന്റർ ഓഫ് എക്സലൻസിൽ എയിംസ് ഉൾപ്പെടെയുള്ള ചികിത്സാ സ്ഥാപനങ്ങൾ താൽപ്പര്യം പ്രകടിപ്പിച്ചിട്ടുണ്ട്. വ്യക്തികളുടെ ജനിതക സവിശേഷതകൾക്കനുസരിച്ച് ചികിത്സ നിശ്ചയിക്കുന്ന രീതിയിലേക്കുള്ള മാറ്റത്തിന് ജീനോമിക്സ് സഹായിക്കും. സ്ഥാപനങ്ങൾ ഈ സമീപനം സ്വീകരിക്കാനും പരസ്പരം സഹകരിക്കാനും തുടങ്ങിയിട്ടുണ്ടെന്നും അദ്ദേഹം പറഞ്ഞു.
വിദ്യാർഥികൾക്ക് ഗവേഷണാവസരം; പെൺകുട്ടികൾക്ക് മാർഗനിർദേശം
ഗവേഷണത്തിൽ ആഴത്തിൽ പ്രവർത്തിക്കാനും പുതിയ ആശയങ്ങൾ വികസിപ്പിക്കാനും സഹകരിക്കാനും വിദ്യാർഥികൾക്ക് അവസരം നൽകുന്നതാണ് ഐ ത്രീ സി പി.എച്ച്.ഡി. പരിപാടിയെന്ന് ജിതേന്ദ്ര സിങ് പറഞ്ഞു. ആരോഗ്യ, കാർഷിക മേഖലകളിൽ പ്രവർത്തിച്ചുള്ള പഠനാവസരങ്ങളും ഇതിലുണ്ട്. ഏകദേശം 200 വിദ്യാർഥികൾക്ക് പരിപാടിയുടെ പ്രയോജനം ലഭിച്ചു. ജൈവസാങ്കേതികവിദ്യയിലെ പുതിയ അവസരങ്ങൾ കണ്ടെത്താൻ യുവാക്കളോട് പ്രധാനമന്ത്രി സ്വാതന്ത്ര്യദിനത്തിൽ നടത്തിയ ആഹ്വാനം മേഖലയിലാകെ ആവേശമുണ്ടാക്കിയെന്നും മന്ത്രി പറഞ്ഞു. സ്കൂൾ വിദ്യാർഥികൾക്കും പൊതുജനങ്ങൾക്കുമായി നടത്തുന്ന പരിചയപ്പെടുത്തൽ പരിപാടികളും അദ്ദേഹം പരാമർശിച്ചു. പെൺകുട്ടികളെ ശാസ്ത്രപഠനത്തിലേക്ക് പ്രോത്സാഹിപ്പിക്കാൻ പ്രത്യേക മാർഗനിർദേശ പരിപാടി നിർദേശിച്ച കാര്യവും അദ്ദേഹം ഓർമിപ്പിച്ചു.
ശാസ്ത്രത്തിലും ഗവേഷണത്തിലും സ്വകാര്യ മേഖലയുടെ പങ്കാളിത്തത്തിന് സർക്കാർ കൂടുതൽ വഴികൾ തുറക്കുകയാണെന്ന് മന്ത്രി പറഞ്ഞു. ആണവമേഖലയിലെ പരിഷ്കാരങ്ങളിൽനിന്നുള്ള അനുഭവവും ഇതിനായി ഉപയോഗിക്കുന്നുണ്ട്. റിസർച്ച്, ഡെവലപ്മെന്റ് ആൻഡ് ഇന്നൊവേഷൻ ഫണ്ട്, അനുസന്ധാൻ നാഷണൽ റിസർച്ച് ഫൗണ്ടേഷൻ, ബിറാക് എന്നിവ വിപുലമായ ഗവേഷണ–നവീകരണ സംവിധാനത്തിന്റെ ഭാഗങ്ങളാണെന്നും അദ്ദേഹം പറഞ്ഞു. ജൈവസാങ്കേതികവിദ്യയും നിർമിതബുദ്ധിയും ജീനോമിക്സും നയിക്കാൻ സാധ്യതയുള്ള അടുത്ത വ്യവസായ വിപ്ലവത്തിന്റെ കേന്ദ്രസ്ഥാനത്ത് ഇന്ത്യ ഉണ്ടാകണം. മുൻ വ്യവസായ വിപ്ലവങ്ങൾ മറ്റിടങ്ങളിൽ രൂപപ്പെട്ടശേഷമാണ് ഇന്ത്യ അവയുടെ സാങ്കേതികവിദ്യ സ്വീകരിച്ചത്. എന്നാൽ അടുത്ത വിപ്ലവത്തിന്റെ മുൻനിരയിൽ എത്താൻ ഇന്ത്യയിലെ ജൈവസാങ്കേതിക സമൂഹത്തിന് അവസരമുണ്ടെന്നും മന്ത്രി പറഞ്ഞു.
21.7 കോടി രൂപ വരെ സഹായം; ബ്രിട്ടനുമായി സഹകരണം
ഐബ്രിക് പ്ലസ് പി.എച്ച്.ഡി. ഗവേഷകരായ 250-ലധികം പേർക്ക് അഞ്ചുവർഷത്തെ തീവ്രപരിശീലന പരിപാടിക്കായി 21.7 കോടി രൂപ വരെ ധനസഹായം നൽകുമെന്ന് വെൽക്കം ട്രസ്റ്റ് ചടങ്ങിൽ പ്രഖ്യാപിച്ചു. ബയോമാനുഫാക്ചറിങ് മേഖലയിലെ ഇന്ത്യ–ബ്രിട്ടൻ സഹകരണം ശക്തിപ്പെടുത്താനും ബയോഫൗണ്ടറികളുടെ വികസനത്തെ പിന്തുണയ്ക്കാനും ബ്രിക്കും ബ്രിട്ടനിലെ സെന്റർ ഫോർ പ്രോസസ് ഇന്നൊവേഷനും ഉദ്ദേശ്യപത്രത്തിൽ ഒപ്പുവച്ചു.
ഫെസ്റ്റിവൽ ഓഫ് സ്പോർട്സിലെ വിജയികളെയും ചടങ്ങിൽ ആദരിച്ചു. ഐബ്രിക് പ്ലസ് സ്പോട്ട്‌ലൈറ്റ് സയന്റിസ്റ്റ് ഓഫ് ദ ഇയർ–2026 പുരസ്കാരങ്ങൾ ബ്രിക്–ഇൻസ്റ്റെമിലെ ഡോ. സുനിൽ ലക്ഷ്മൺ, ബ്രിക്–സി.ഡി.എഫ്.ഡിയിലെ ഡോ. റഷ്ന ഭണ്ഡാരി, ബ്രിക്–ടി.എച്ച്.എസ്.ടി.ഐയിലെ പ്രൊഫസർ ഭബതോഷ് ദാസ് എന്നിവർക്ക് സമ്മാനിച്ചു.
11 നഗരങ്ങളിലെ 13 സ്ഥാപനങ്ങളെ ബന്ധിപ്പിക്കുന്ന ഗവേഷണ ശൃംഖല
സ്ഥാപനങ്ങൾ ഒറ്റയ്ക്ക് മികവ് കൈവരിക്കുന്നതിനപ്പുറം, രാജ്യത്തെ 11 നഗരങ്ങളിലുള്ള 13 പ്രമുഖ ജൈവസാങ്കേതിക സ്ഥാപനങ്ങളെ വികേന്ദ്രീകൃത ദേശീയ ശൃംഖലയായി ഒന്നിപ്പിക്കുകയാണ് ബ്രിക്കിന്റെ അടിസ്ഥാന കാഴ്ചപ്പാടെന്ന് ജൈവസാങ്കേതിക വകുപ്പ് സെക്രട്ടറിയും ബ്രിക് ഡയറക്ടർ ജനറലുമായ ഡോ. രാജേഷ് എസ്. ഗോഖലെ പറഞ്ഞു. മനുഷ്യവിഭവം, പ്രവർത്തനസംസ്കാരം, വിശ്വാസം, വിഭവവിനിയോഗം എന്നിവയാണ് ഇതിന്റെ അടിത്തറ. ചെറിയൊരു സെക്രട്ടേറിയറ്റും ഗവേഷണഫലങ്ങളെ പ്രായോഗിക ഉപയോഗത്തിലേക്ക് എത്തിക്കുന്ന പദ്ധതികളും ഇതിന് പിന്തുണ നൽകുന്നു. ഐ ത്രീ സി പി.എച്ച്.ഡി. പാഠ്യപദ്ധതിയും ബ്രിക്–ബിറാക് സംരംഭകത്വ പരിപാടികളും ഇതിൽ ഉൾപ്പെടുന്നു. പരീക്ഷണശാലകളിലെ പുതിയ കണ്ടെത്തലുകളെ വിപണിയിലെ ഉപയോഗങ്ങളുമായി ബന്ധിപ്പിക്കുക, രാജ്യത്തിന് സ്വന്തമായ സാങ്കേതികവിദ്യകൾ വികസിപ്പിക്കുക, ഭക്ഷ്യ–ആരോഗ്യ സുരക്ഷ ശക്തിപ്പെടുത്തുക എന്നിവയാണ് ലക്ഷ്യങ്ങൾ. സമ്പദ്‌വ്യവസ്ഥയിലും സമൂഹത്തിലും ദീർഘകാല നേട്ടമുണ്ടാക്കുന്ന ആഗോള ജൈവസാങ്കേതിക ശക്തിയായി ഇന്ത്യയെ വളർത്താനും കൗൺസിൽ ലക്ഷ്യമിടുന്നു.
പ്രധാനമന്ത്രിയുടെ ശാസ്ത്ര, സാങ്കേതികവിദ്യ, നവീകരണ ഉപദേശകസമിതി അംഗവും മഹാരാഷ്ട്ര ആരോഗ്യശാസ്ത്ര സർവകലാശാല മുൻ വൈസ് ചാൻസലറുമായ റിട്ടയേഡ് ലെഫ്റ്റനന്റ് ജനറൽ ഡോ. മാധുരി കനിത്കറും ചടങ്ങിൽ പങ്കെടുത്തു. ജൈവസാങ്കേതിക വകുപ്പിലെ ഭരണവിഭാഗം ജോയിന്റ് സെക്രട്ടറിയും ഇന്ത്യൻ റവന്യൂ സർവീസ് ഉദ്യോഗസ്ഥയുമായ ഏക്ത വിഷ്ണോയി, ബ്രിക്–നാഷണൽ ഇൻസ്റ്റിറ്റ്യൂട്ട് ഓഫ് ഇമ്യൂണോളജി ഡയറക്ടർ ഡോ. പുഷ്കർ ശർമ എന്നിവരും പങ്കെടുത്തു.
.
