പ്രധാന വിവരങ്ങൾ
- പേറ്റന്റുള്ളവ ഉൾപ്പെടെ 137 കാൻസർ മരുന്നുകളുടെ വ്യാപാര മാർജിൻ 30 ശതമാനമായി നിയന്ത്രിച്ചു.
- പുതുക്കിയ കുറഞ്ഞ മരുന്നുവില 2026 നവംബർ ഒൻപത് മുതൽ രാജ്യവ്യാപകമായി പ്രാബല്യത്തിൽ വരും.
- കമ്പനികൾ അറിയിച്ച വിലക്കുറവ് ശരാശരി 20 മുതൽ 70 ശതമാനം വരെയാണ്.
- ഏറ്റവും ഉയർന്ന വിലക്കുറവ് 96.45 ശതമാനവും കണക്കാക്കിയ ലാഭം 3,357.49 കോടി രൂപയുമാണ്.
- നവംബർ നാലുവരെ 70 കമ്പനികൾ 120 മരുന്നുകളുടെ പുതുക്കിയ വില അറിയിച്ചിട്ടുണ്ട്.
ന്യൂഡൽഹി / 2026 / നവംബർ 07
രാജ്യത്ത് പേറ്റന്റുള്ളവ ഉൾപ്പെടെ 137 കാൻസർ മരുന്നുകളുടെ വ്യാപാര മാർജിൻ പരമാവധി ചില്ലറവിൽപ്പന വിലയുടെ 30 ശതമാനമായി ദേശീയ ഔഷധ വിലനിർണയ അതോറിറ്റി നിയന്ത്രിച്ചു. പതിവ് വിലനിയന്ത്രണ പട്ടികയിൽ ഉൾപ്പെടാത്ത മരുന്നുകൾക്കാണ് നടപടി ബാധകമാകുന്നത്. 2026 ഒക്ടോബർ 17ന് പുറത്തിറക്കിയ ഉത്തരവനുസരിച്ചുള്ള പുതിയ വില നവംബർ ഒൻപത് മുതൽ പ്രാബല്യത്തിൽ വരും. നവംബർ നാലുവരെ 70 കമ്പനികൾ 120 മരുന്നുകളുടെ പുതുക്കിയ വില അറിയിച്ചിട്ടുണ്ട്. ഇവയുടെ 1,136 വ്യത്യസ്ത വിൽപ്പന പതിപ്പുകളാണ് ഇതിൽ ഉൾപ്പെടുന്നത്. കമ്പനികൾ അറിയിച്ച വിലക്കുറവ് ശരാശരി 20 മുതൽ 70 ശതമാനം വരെയാണ്. ഏറ്റവും ഉയർന്ന വിലക്കുറവ് 96.45 ശതമാനമാണ്. ഇതിലൂടെ രോഗികൾക്ക് 3,357.49 കോടി രൂപയുടെ ലാഭമുണ്ടാകുമെന്നാണ് കണക്ക്. 2025 ഏപ്രിൽ മുതൽ 2026 മാർച്ച് വരെ വിറ്റ മരുന്നുകളുടെ അളവിൽ പഴയ വിലയും പുതുക്കിയ വിലയും തമ്മിലുള്ള വ്യത്യാസം കണക്കാക്കിയാണ് ഈ തുക കണ്ടെത്തിയത്.
എല്ലാ കുടുംബങ്ങൾക്കും ഗുണമേന്മയുള്ള കാൻസർ ചികിത്സ താങ്ങാനാകുന്ന ചെലവിൽ ലഭ്യമാക്കുകയാണ് കേന്ദ്രസർക്കാരിന്റെ ലക്ഷ്യം. രാജ്യത്തെ ചില്ലറ മരുന്നുകടകളിലും ആശുപത്രി ഫാർമസികളിലും മരുന്നുവിതരണ ശൃംഖലയിലുടനീളമുള്ള അമിത വിലവർധന നിയന്ത്രിച്ചാണ് ചികിത്സാച്ചെലവ് കുറയ്ക്കുന്നത്. മരുന്ന് വാങ്ങുന്ന വിലയും രോഗികളിൽനിന്ന് ഈടാക്കുന്ന പരമാവധി ചില്ലറവിൽപ്പന വിലയും തമ്മിലുള്ള വലിയ വ്യത്യാസത്തെക്കുറിച്ച് സംസ്ഥാന അധികൃതരും രോഗികളും പൊതുസമൂഹ സംഘടനകളും ആശങ്ക അറിയിച്ചിരുന്നു. നിർമ്മാതാവ് വിതരണക്കാരനോ സ്റ്റോക്കിസ്റ്റിനോ മരുന്ന് നൽകുന്ന വിലയും രോഗി നൽകേണ്ട പരമാവധി വിലയും തമ്മിലുള്ള, ചരക്കുസേവന നികുതി ഒഴിവാക്കിയുള്ള വ്യത്യാസമാണ് വ്യാപാര മാർജിൻ. ഇത് അമിതമാകുമ്പോൾ വിതരണത്തിന്റെ വിവിധ ഘട്ടങ്ങളിൽ വലിയ ലാഭം കൂട്ടിച്ചേർക്കപ്പെടുകയും രോഗിയുടെ ചെലവ് കുത്തനെ ഉയരുകയും ചെയ്യുന്നു. പുതിയ വില കണക്കാക്കുന്നത് 2026 മാർച്ചിലെ ശരാശരി വിതരണവില അടിസ്ഥാനമാക്കിയാണ്. അങ്ങനെ നിശ്ചയിക്കുന്ന വിലയ്ക്കുള്ളിലെ വ്യാപാര മാർജിൻ 30 ശതമാനത്തിൽ കൂടരുത്. ചരക്കുസേവന നികുതി ഇതിനുപുറമേ ചേർക്കും. രോഗികൾക്ക് ദേശീയ ഔഷധ വിലനിർണയ അതോറിറ്റിയുടെ വെബ്സൈറ്റിലൂടെയും ഔദ്യോഗിക ഫാർമ സഹി ദാം മൊബൈൽ ആപ്പിലൂടെയും വില പരിശോധിക്കാം.
വില നിയന്ത്രിക്കുന്ന നിയമവും അവശ്യമരുന്നുകളുടെ പട്ടികയും
ജീവൻരക്ഷാ മരുന്നുകൾ രോഗികൾക്ക് താങ്ങാനാകുന്ന വിലയിൽ ലഭ്യമാക്കാൻ 2013ലെ ഔഷധ വിലനിയന്ത്രണ ഉത്തരവിലൂടെയാണ് കേന്ദ്രസർക്കാർ വില നിയന്ത്രിക്കുന്നത്. അവശ്യവസ്തു നിയമത്തിന്റെ അധികാരത്തിലാണ് ഈ സംവിധാനം പ്രവർത്തിക്കുന്നത്. മരുന്നുവില നിയന്ത്രിക്കുക, അമിതലാഭം തടയുക, അനിവാര്യ ചികിത്സ താങ്ങാനാകുന്ന ചെലവിൽ ഉറപ്പാക്കുക എന്നിവയാണ് ലക്ഷ്യം. ഉത്തരവിന്റെ ഒന്നാം പട്ടികയിൽ ഉൾപ്പെട്ട മരുന്നുകൾക്ക് സർക്കാർ പരമാവധി വില നിശ്ചയിക്കുന്നു. 2022ലെ ദേശീയ അവശ്യമരുന്ന് പട്ടികയാണ് ഈ പട്ടികയുടെ അടിസ്ഥാനം. ഇതിൽ 388 മരുന്നുകളുണ്ട്. അവയിൽ 63 എണ്ണം കാൻസർ മരുന്നുകളാണ്. ഒന്നാം പട്ടികയിൽ ഉൾപ്പെടാത്ത മരുന്നുകൾക്ക് വില നിരീക്ഷണമാണ് ബാധകം. ഉത്തരവിന്റെ ഇരുപതാം ഖണ്ഡികപ്രകാരം ഇത്തരം മരുന്നുകളുടെ പരമാവധി ചില്ലറവിൽപ്പന വില പന്ത്രണ്ട് മാസത്തിനുള്ളിൽ പത്ത് ശതമാനത്തിലധികം ഉയർത്താൻ നിർമ്മാതാവിന് കഴിയില്ല. വർധന പത്ത് ശതമാനം കടന്നാൽ വില ആ പരിധിയിലേക്ക് കുറയ്ക്കുകയും തുടർന്നുള്ള പന്ത്രണ്ട് മാസം ആ നിയന്ത്രണം പാലിക്കുകയും വേണം. പട്ടികയ്ക്ക് പുറത്തുള്ള കാൻസർ മരുന്നുകളുടെ ഉയർന്ന വില നേരിടാൻ 2019ൽ 42 മരുന്നുകളിൽ വ്യാപാര മാർജിൻ ക്രമീകരണം പരീക്ഷിച്ചിരുന്നു. ഇതിലൂടെ രോഗികളുടെ ചെലവ് കുറഞ്ഞു. തുടർന്ന് ലഭിച്ച വിപണി വിവരങ്ങളിൽ അമിത മാർജിനും ആശുപത്രികളിലെയും ചില്ലറവിൽപ്പന കേന്ദ്രങ്ങളിലെയും വിലവ്യത്യാസവും വ്യക്തമായി. ഇതിന്റെ അടിസ്ഥാനത്തിൽ പൊതുതാൽപര്യത്തിനായി അസാധാരണ സാഹചര്യങ്ങളിൽ ഇടപെടാൻ അനുവദിക്കുന്ന പത്തൊൻപതാം ഖണ്ഡികയിലെ അധികാരം സർക്കാർ ഉപയോഗിച്ചു. ആരോഗ്യസേവന ഡയറക്ടറേറ്റ് ജനറലിന് കീഴിൽ രൂപീകരിച്ച വിദഗ്ധസമിതിയുടെ ശുപാർശയോടെയാണ് പേറ്റന്റുള്ളവ ഉൾപ്പെടെ 137 മരുന്നുകളിലേക്ക് നിയന്ത്രണം വ്യാപിപ്പിച്ചത്. ഒക്ടോബർ 17ലെ എസ് ഒ 5690 ഇ ഉത്തരവിലൂടെയാണ് നടപടി.
രാജ്യത്തിന് അനിവാര്യവും മുൻഗണന നൽകേണ്ടതുമായ മരുന്നുകളുടെ ഔദ്യോഗിക പട്ടികയാണ് ദേശീയ അവശ്യമരുന്ന് പട്ടിക. എല്ലാവർക്കും മരുന്ന്, കുറഞ്ഞ വിലയ്ക്ക് മരുന്ന് എന്ന സർക്കാർ കാഴ്ചപ്പാടിന്റെ ഭാഗമായി 2022 സെപ്റ്റംബർ 13ന് അന്നത്തെ കേന്ദ്ര ആരോഗ്യമന്ത്രി ഡോക്ടർ മൻസുഖ് മാണ്ഡവ്യയാണ് ഏറ്റവും പുതിയ പട്ടിക പുറത്തിറക്കിയത്. 1996ൽ ആദ്യമായി തയ്യാറാക്കിയ പട്ടിക 2003, 2011, 2015, 2022 വർഷങ്ങളിൽ പുതുക്കി. മരുന്നുകൾക്കായുള്ള സ്ഥിരം ദേശീയ സമിതിയാണ് ഡോക്ടർമാർ, ശാസ്ത്രജ്ഞർ, വ്യവസായ വിദഗ്ധർ എന്നിവരുമായി ചർച്ച നടത്തിയും ലോകാരോഗ്യ സംഘടനയുടെ മാനദണ്ഡങ്ങൾ പരിശോധിച്ചും പട്ടിക തയ്യാറാക്കിയത്. കുടുംബങ്ങൾ സ്വന്തം കൈയിൽനിന്ന് നൽകേണ്ട ചികിത്സാച്ചെലവ് കുറയ്ക്കാനും സുരക്ഷിതവും ഫലപ്രദവും ഗുണമേന്മയുള്ളതുമായ മരുന്നുകൾ ഉറപ്പാക്കാനും പട്ടിക സഹായിക്കുന്നു. സർക്കാർ മരുന്നുവാങ്ങൽ, ആശുപത്രി ബജറ്റ്, ആരോഗ്യ ഇൻഷുറൻസ്, മെഡിക്കൽ വിദ്യാർഥികളുടെ പരിശീലനം എന്നിവയ്ക്കും ഇത് മാർഗനിർദേശം നൽകുന്നു. ഔഷധ വിലനിയന്ത്രണ ഉത്തരവിന്റെ പത്തൊൻപതാം ഖണ്ഡികപ്രകാരം അസാധാരണ സാഹചര്യങ്ങളിൽ പൊതുതാൽപര്യത്തിനായി സാധാരണ ചട്ടങ്ങൾക്ക് പുറത്തും സർക്കാരിന് ഇടപെടാം. ആവശ്യമായ കാലയളവിലേക്ക് ഏത് മരുന്നിന്റെയും പരമാവധി വിലയോ ചില്ലറവിൽപ്പന വിലയോ നിശ്ചയിക്കാം. നേരത്തേ നിശ്ചയിച്ച വില ഉയർത്താനോ കുറയ്ക്കാനോ കഴിയും. ഇതിനായി മൊത്തവില സൂചികയുമായി ബന്ധിപ്പിച്ച പതിവ് വാർഷിക പരിഷ്കാരം വരെ കാത്തിരിക്കേണ്ടതില്ല.
നിയന്ത്രണം ബാധകമായ 137 മരുന്നുകളും കമ്പനികളുടെ ബാധ്യതകളും
പട്ടികയിലുള്ള മരുന്നുകളുടെ എല്ലാ ഡോസുകൾക്കും ഗുളിക, കുത്തിവയ്പ് തുടങ്ങിയ എല്ലാ രൂപങ്ങൾക്കും നിയന്ത്രണം ബാധകമാണ്. ഒറ്റ മരുന്നായോ സംയുക്തമായോ വിൽക്കുന്നവയും ഇതിൽപ്പെടും. നിയന്ത്രണത്തിലുള്ള മരുന്നുകൾ ഇവയാണ്: അബെമാസിക്ലിബ്, അബിറാറ്ററോൺ അസറ്റേറ്റ്, അകാലാബ്രൂട്ടിനിബ്, അഫാറ്റിനിബ്, അലെക്ടിനിബ്, ആൽപെലിസിബ്, അമിവാന്റമാബ്, അനാസ്ട്രോസോൾ, അപാലൂട്ടമൈഡ്, അസിമിനിബ്, അറ്റെസോളിസുമാബ്, അവെലുമാബ്, ആക്സിറ്റിനിബ്, അസാസിറ്റിഡിൻ, ബെലാന്റമാബ് മഫോഡോട്ടിൻ, ബെവാസിസുമാബ്, ബോസൂട്ടിനിബ്, ബ്രെന്റുക്സിമാബ് വെഡോട്ടിൻ, ബ്രിഗാറ്റിനിബ്, ബുസൾഫാൻ, കബാസിറ്റാക്സൽ, കബോസാന്റിനിബ് എസ് മാലിയേറ്റ്, കാപ്മാറ്റിനിബ്, കാർഫിൽസോമിബ്, കാർമസ്റ്റിൻ, സെറിറ്റിനിബ്, സെറ്റുക്സിമാബ്, ക്ലാഡ്രിബിൻ, ക്ലോഫാരബിൻ, ക്രിസോട്ടിനിബ്, സൈറ്റാരബിൻ, ഡാബ്രാഫെനിബ്, ഡാക്കോമിറ്റിനിബ്, ഡാരാറ്റുമുമാബ്, ഡാരോളൂട്ടമൈഡ്, ഡാസാറ്റിനിബ്, ഡാറ്റോപോട്ടമാബ് ഡെറക്സ്റ്റീക്കാൻ, ഡെസിറ്റാബിൻ, ഡെഗാറെലിക്സ്, ഡെനോസുമാബ്, ഡോസ്റ്റാർലിമാബ്, ഡുർവാലുമാബ്, എൽറാനാറ്റമാബ്, എൻഫോർട്ടുമാബ് വെഡോട്ടിൻ, എൻട്രെക്ടിനിബ്, എൻസാലൂട്ടമൈഡ്, എപിറൂബിസിൻ, എർഡാഫിറ്റിനിബ്, എറിബുലിൻ മെസിലേറ്റ്, എർലോട്ടിനിബ്, എസ്ട്രാമസ്റ്റിൻ, എവറോളിമസ്, എക്സെമെസ്റ്റെയ്ൻ, ഫ്ലൂഡാരബിൻ, ഫുൾവെസ്ട്രാന്റ്, ഗിൽറ്റെറിറ്റിനിബ്, ഗോസെറെലിൻ അസറ്റേറ്റ്, ഇബ്രിറ്റുമോമാബ്, ഇബ്രൂട്ടിനിബ്, ഐഡെലാലിസിബ്, ഐഫോസ്ഫമൈഡും മെസ്നയും, നിവോളുമാബും റെലാറ്റിമാബും, പെഗിലേറ്റഡ് ലിപ്പോസോമൽ ഇറിനോട്ടീക്കാൻ, ഇനോട്ടുസുമാബ് ഒസോഗാമിസിൻ, ഇന്റർഫെറോൺ ആൽഫ ടു ബി, ഇപിലിമുമാബ്, ഐവോസിഡെനിബ്, ലാപാറ്റിനിബ്, ലാസെർട്ടിനിബ്, ലെൻവാറ്റിനിബ്, ലോമസ്റ്റിൻ, ലോർലാറ്റിനിബ്, ലിംഫോസീക്ക് കിറ്റ്, മെജെസ്ട്രോൾ, മിഡോസ്റ്റോറിൻ, മിർവെറ്റുക്സിമാബ് സൊറാവ്റ്റാൻസിൻ, മൈറ്റോമൈസിൻ, മൈറ്റോക്സാൻട്രോൺ, നെലാരബിൻ, നെറ്റുപിറ്റന്റ്, നിലോട്ടിനിബ്, നിമോട്ടുസുമാബ്, നിന്റഡാനിബ്, നിരാപാരിബ്, നിവോളുമാബ്, ഒബിനുട്ടുസുമാബ്, ഒഫാറ്റുമുമാബ്, ഒലാപാരിബ്, ഒസിമെർട്ടിനിബ്, പാൽബോസിക്ലിബ്, പാനിറ്റുമുമാബ് വെക്ടിബിക്സ്, പാസോപാനിബ് ഹൈഡ്രോക്ലോറൈഡ്, പെഗാസ്പാർഗിനേസ്, പെഗ്ഫിൽഗ്രാസ്റ്റിം, പെഗിലേറ്റഡ് ഇന്റർഫെറോൺ ആൽഫ ടു ബി, പെംബ്രോളിസുമാബ്, പെമെട്രെക്സെഡ്, പെർട്ടുസുമാബ്, പെർട്ടുസുമാബും ട്രാസ്റ്റുസുമാബും, പ്ലെറിക്സാഫോർ, പൊളാറ്റുസുമാബ് വെഡോട്ടിൻ, പൊമാലിഡോമൈഡ്, റാമുസിറുമാബ്, റെഗോറാഫെനിബ്, റെലുഗോളിക്സ്, റൈബോസിക്ലിബ്, റൂക്കാപാരിബ്, റക്സോളിറ്റിനിബ്, സെൽപെർകാറ്റിനിബ്, സെലുമെറ്റിനിബ്, സെർപ്ലുലിമാബ്, സോട്ടോറാസിബ്, സുനിറ്റിനിബ്, ടാൽക്വെറ്റമാബ്, ടെക്ലിസ്റ്റമാബ്, ടെഗാഫറും യുറാസിലും, ടെഗാഫറും ഗിമെറാസിലും ഒട്ടെറാസിലും, ടെംസിറോളിമസ്, ടെപോട്ടിനിബ്, തയോട്ടെപ്പ, ടിസ്ലെലിസുമാബ്, ടോസിലിസുമാബ്, ടോപോട്ടീക്കാൻ, ടോറിപാലിമാബ്, ട്രാബെക്ടെഡിൻ, ട്രാമെറ്റിനിബ്, ട്രെമെലിമുമാബ്, ട്രിയോസൾഫാൻ, ട്രൈഫ്ലൂറിഡിനും ടിപിറാസിലും, ട്രിപ്റ്റോറെലിൻ, ടുക്കാറ്റിനിബ്, വെമുറാഫെനിബ്, വെനെറ്റോക്ലാക്സ്, വിനോറെൽബിൻ ടാർട്രേറ്റ്, വോറാസിഡെനിബ്, സാനുബ്രൂട്ടിനിബ്, സോൾബെറ്റുക്സിമാബ്.
നിർമ്മാതാക്കൾ 2026 മാർച്ചിലെ ശരാശരി വിതരണവില അടിസ്ഥാനമാക്കി പരമാവധി ചില്ലറവിൽപ്പന വില വീണ്ടും കണക്കാക്കണം. രോഗിസഹായ പദ്ധതികളിലൂടെ സൗജന്യമായി നൽകുന്ന മരുന്നുകളും സർക്കാരിന് നേരിട്ട് വിൽക്കുന്നവയും ഈ കണക്കിൽ ഉൾപ്പെടുത്തരുത്. പുതിയ പരിധിയേക്കാൾ കുറഞ്ഞ വിലയിൽ നിലവിൽ വിൽക്കുന്ന മരുന്നുകളുടെ വില ഉയർത്താൻ പാടില്ല. കമ്പനികൾ പുതുക്കിയ വില ദേശീയ ഔഷധ വിലനിർണയ അതോറിറ്റിയെ അറിയിക്കണം. വിലക്കുറവ് പത്രങ്ങളിൽ പ്രസിദ്ധീകരിക്കണം. സ്വന്തം വെബ്സൈറ്റിൽ നൽകുകയും എല്ലാ ചില്ലറവിൽപ്പനക്കാർക്കും ആശുപത്രികൾക്കും അറിയിക്കുകയും വേണം. കമ്പനികൾ പുതുക്കിയ വില സമർപ്പിക്കുന്നതിന് അനുസരിച്ച് അതോറിറ്റി വെബ്സൈറ്റിലെ പട്ടിക പുതുക്കുന്നുണ്ട്. അനുമതിയില്ലാതെ മരുന്ന് ഉൽപ്പാദനം കുറയ്ക്കാൻ കമ്പനികൾക്ക് കഴിയില്ല. ഒരു മരുന്നിന്റെ ഉൽപ്പാദനം പൂർണമായി നിർത്തുന്നതിന് ആറുമാസം മുമ്പ് അറിയിപ്പ് നൽകണം. ആശുപത്രികളും മരുന്നുകടകളും പുതിയ വില വ്യക്തമായി പ്രദർശിപ്പിക്കണം. വില കുറയ്ക്കാത്ത കമ്പനികൾ അധികമായി ഈടാക്കിയ തുക പലിശസഹിതം അടയ്ക്കണം.
ചികിത്സാസഹായം മുതൽ പരിശോധനയും പ്രതിരോധ കുത്തിവയ്പും വരെ
കാൻസർ ചികിത്സയും പരിശോധനയും മരുന്നുകളും കുറഞ്ഞ ചെലവിൽ ലഭ്യമാക്കാൻ വിവിധ സർക്കാർ ആരോഗ്യപദ്ധതികളും പ്രവർത്തിക്കുന്നുണ്ട്. ആയുഷ്മാൻ ഭാരത് പ്രധാനമന്ത്രി ജൻ ആരോഗ്യ യോജനയിലൂടെ സമൂഹത്തിലെ സാമ്പത്തികമായി ഏറ്റവും പിന്നിലുള്ള 40 ശതമാനം കുടുംബങ്ങൾക്കും എഴുപത് വയസ്സും അതിനുമുകളിലും പ്രായമുള്ള എല്ലാ മുതിർന്ന പൗരന്മാർക്കും കുടുംബത്തിന് വർഷം അഞ്ചുലക്ഷം രൂപയുടെ ചികിത്സാപരിരക്ഷ ലഭിക്കുന്നു. 2026 ജൂൺ മുപ്പതുവരെ 1.92 ലക്ഷം കോടി രൂപ മൂല്യമുള്ള 12.69 കോടി ആശുപത്രി പ്രവേശനങ്ങൾക്ക് അനുമതി നൽകിയിട്ടുണ്ട്. പദ്ധതിയിൽ അംഗമായ സർക്കാർ, സ്വകാര്യ ആശുപത്രികളിലൂടെ 27 ചികിത്സാവിഭാഗങ്ങളിലെ 1,961 ചികിത്സാനടപടികൾക്ക് പണരഹിത സേവനം ലഭിക്കും. മരുന്നുപയോഗിച്ചുള്ള കാൻസർ ചികിത്സ, ശസ്ത്രക്രിയ, റേഡിയേഷൻ ചികിത്സ എന്നിവയും ഇതിൽപ്പെടും. നവംബർ നാലുവരെ മരുന്നുപയോഗിച്ചുള്ള കാൻസർ ചികിത്സയ്ക്കായി ഏകദേശം 2,926 കോടി രൂപ മൂല്യമുള്ള 19.5 ലക്ഷം ആശുപത്രി പ്രവേശനങ്ങൾക്ക് അനുമതി നൽകിയിട്ടുണ്ട്. ദേശീയ ആരോഗ്യദൗത്യത്തിന്റെ ഭാഗമായ സാംക്രമികേതര രോഗങ്ങളുടെ പ്രതിരോധത്തിനും നിയന്ത്രണത്തിനുമുള്ള ദേശീയ പരിപാടിയും കാൻസർ പരിചരണത്തിന് പിന്തുണ നൽകുന്നു. അടിസ്ഥാനസൗകര്യം, ജീവനക്കാരുടെ പരിശീലനവും ശേഷിവികസനവും, പരിശോധന, നേരത്തേയുള്ള രോഗനിർണയം, വിദഗ്ധചികിത്സയ്ക്കുള്ള റഫറൽ, ചികിത്സ, ആരോഗ്യബോധവൽക്കരണം എന്നിവ ശക്തിപ്പെടുത്തുകയാണ് ലക്ഷ്യം. പരിപാടിയുടെ ഭാഗമായി 770 ജില്ലാ സാംക്രമികേതര രോഗ ക്ലിനിക്കുകളും സാമൂഹികാരോഗ്യ കേന്ദ്രങ്ങളിൽ 6,410 ക്ലിനിക്കുകളും 524 ഡേ കെയർ കാൻസർ കേന്ദ്രങ്ങളും സ്ഥാപിച്ചിട്ടുണ്ട്. എല്ലാവർക്കും ഗുണമേന്മയുള്ള ചികിത്സ ലഭ്യമാക്കാൻ സംസ്ഥാന കാൻസർ ഇൻസ്റ്റിറ്റ്യൂട്ടുകൾക്കും ഉന്നതതല കാൻസർ ചികിത്സാകേന്ദ്രങ്ങൾക്കും ഡേ കെയർ കേന്ദ്രങ്ങൾക്കും സർക്കാർ പിന്തുണ നൽകുന്നു. രാജ്യത്ത് 19 സംസ്ഥാന കാൻസർ ഇൻസ്റ്റിറ്റ്യൂട്ടുകൾക്കും 20 ഉന്നതതല കാൻസർ ചികിത്സാകേന്ദ്രങ്ങൾക്കും അംഗീകാരം നൽകിയിട്ടുണ്ട്. ടാറ്റ മെമ്മോറിയൽ സെന്റർ വാരാണസി, വിശാഖപട്ടണം, ന്യൂ ചണ്ഡീഗഢ്, ഗുവാഹത്തി, സംഗ്രൂർ, മുസഫർപുർ എന്നിവിടങ്ങളിൽ ആറു ആശുപത്രികൾ സ്ഥാപിച്ചു. പുതിയ 22 എയിംസുകളിലും രോഗനിർണയം, മരുന്നുചികിത്സ, ശസ്ത്രക്രിയ എന്നിവ ഉൾപ്പെടെയുള്ള കാൻസർ സേവനങ്ങൾ വ്യാപിപ്പിച്ചിട്ടുണ്ട്. ഝജ്ജറിലെ ദേശീയ കാൻസർ ഇൻസ്റ്റിറ്റ്യൂട്ടിലും കൊൽക്കത്തയിലെ ചിത്തരഞ്ജൻ ദേശീയ കാൻസർ ഇൻസ്റ്റിറ്റ്യൂട്ടിന്റെ രണ്ടാം ക്യാമ്പസിലും ആധുനിക രോഗനിർണയവും ചികിത്സയും ലഭ്യമാണ്. ജനസംഖ്യയെ അടിസ്ഥാനമാക്കിയുള്ള പരിശോധനകൾക്കും രോഗസാധ്യത വർധിപ്പിക്കുന്ന ഘടകങ്ങളെക്കുറിച്ചുള്ള ബോധവൽക്കരണത്തിനും പരിപാടി പിന്തുണ നൽകുന്നു. ഇന്ത്യൻ കൗൺസിൽ ഓഫ് മെഡിക്കൽ റിസർച്ചിന്റെ ദേശീയ കാൻസർ രജിസ്ട്രി പരിപാടിയിലൂടെ രോഗനിരീക്ഷണവും ശക്തിപ്പെടുത്തുന്നു.
പ്രാഥമികാരോഗ്യ കേന്ദ്രങ്ങളായ ആയുഷ്മാൻ ആരോഗ്യ മന്ദിറുകളും പ്രദേശവാസികൾക്ക് കാൻസർ പരിശോധന നൽകുന്നുണ്ട്. 2026 ഓഗസ്റ്റ് പന്ത്രണ്ടിലെ കണക്കനുസരിച്ച് രാജ്യത്ത് 1.86 ലക്ഷത്തിലധികം കേന്ദ്രങ്ങൾ പ്രവർത്തിക്കുന്നു. മറ്റ് പ്രാഥമികാരോഗ്യ സേവനങ്ങൾക്കൊപ്പം മുപ്പത് വയസ്സിന് മുകളിലുള്ളവരിൽ വായിലെ കാൻസർ, സ്തനാർബുദം, ഗർഭാശയമുഖ കാൻസർ എന്നിവ കണ്ടെത്താനുള്ള പരിശോധനയും നടത്തുന്നു. പരിശീലനം ലഭിച്ച ആശാ പ്രവർത്തകരും ഓക്സിലറി നഴ്സ് മിഡ്വൈഫുമാരും പ്രതിരോധ, നിയന്ത്രണ, പരിശോധനാ സേവനങ്ങൾ നൽകുന്നു. 2026 ജൂലൈ വരെയുള്ള കണക്കനുസരിച്ച് വായിലെ കാൻസറിനായി 36.11 കോടി പരിശോധനകളും സ്തനാർബുദത്തിനായി 16.94 കോടി പരിശോധനകളും ഗർഭാശയമുഖ കാൻസറിനായി 9.31 കോടി പരിശോധനകളും നടത്തി. ഗർഭാശയമുഖ കാൻസർ തടയാനുള്ള ഹ്യൂമൻ പാപ്പിലോമ വൈറസ് പ്രതിരോധ കുത്തിവയ്പ് പ്രചാരണം 2026 ഫെബ്രുവരി 28ന് രാജ്യവ്യാപകമായി ആരംഭിച്ചു. എല്ലാ 36 സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും പതിനാലു വയസ്സുള്ള ഏകദേശം 1.2 കോടി അർഹരായ പെൺകുട്ടികളെയാണ് ലക്ഷ്യമിടുന്നത്. സെപ്റ്റംബർ പതിനൊന്നുവരെ 80 ലക്ഷത്തിലധികം ഡോസ് വാക്സിൻ സൗജന്യമായി നൽകിയിട്ടുണ്ട്.
കുറഞ്ഞ വിലയ്ക്ക് മരുന്നുകളും ദൂരപ്രദേശങ്ങളിൽ വിദഗ്ധോപദേശവും
കാൻസർ മരുന്നുകൾ ഉൾപ്പെടെയുള്ള അവശ്യമരുന്നുകൾ പൊതുജനങ്ങൾക്ക് കുറഞ്ഞ വിലയിൽ ലഭ്യമാക്കാൻ ജൻ ഔഷധി, അമൃത് പദ്ധതികളും സർക്കാർ നടപ്പാക്കുന്നു. മരുന്നുകൾ, സ്റ്റെന്റുകൾ, ശരീരത്തിൽ സ്ഥാപിക്കുന്ന ചികിത്സാ ഉപകരണങ്ങൾ എന്നിവയുടെ ലഭ്യത മെച്ചപ്പെടുത്തുന്നതിലൂടെ സ്വന്തം കൈയിൽനിന്നുള്ള ചെലവ് കുറയ്ക്കാനും ദീർഘകാല ചികിത്സ തുടർന്നുകൊണ്ടുപോകാനും ഇവ സഹായിക്കുന്നു. പ്രധാനമന്ത്രി ഭാരതീയ ജൻ ഔഷധി പരിയോജനയിൽ കാൻസർ ഉൾപ്പെടെ പ്രധാന ചികിത്സാവിഭാഗങ്ങളിലായി 2,110 മരുന്നുകളും ശസ്ത്രക്രിയാ സാമഗ്രികൾ, ചികിത്സയ്ക്ക് ഉപയോഗിച്ചുതീരുന്ന വസ്തുക്കൾ, ഉപകരണങ്ങൾ എന്നിവയിലായി 315 ഉൽപ്പന്നങ്ങളും ഉൾപ്പെടുന്നു. 2026 ജൂൺ മുപ്പതിലെ കണക്കനുസരിച്ച് രാജ്യത്ത് 20,149 ജൻ ഔഷധി കേന്ദ്രങ്ങളുണ്ട്. 2021–22 മുതൽ 2025–26 വരെയുള്ള അഞ്ച് സാമ്പത്തിക വർഷങ്ങളിൽ ഈ കേന്ദ്രങ്ങളിലൂടെ 7,873.85 കോടി രൂപയുടെ വിൽപ്പന നടന്നു. ഇതിലൂടെ പൗരന്മാർക്ക് ഏകദേശം 37,200 കോടി രൂപ ലാഭിക്കാനായെന്നാണ് 2026 മാർച്ച് മുപ്പത്തിയൊന്നിലെ കണക്ക്. കാൻസർ, ഹൃദ്രോഗങ്ങൾ, മറ്റ് ഗുരുതര രോഗങ്ങൾ എന്നിവയ്ക്കുള്ള മരുന്നുകൾ കുറഞ്ഞ വിലയിൽ നൽകുകയാണ് അമൃത് ഫാർമസികളുടെ ലക്ഷ്യം. 6,500ലധികം മരുന്നുകളും ശരീരത്തിൽ സ്ഥാപിക്കുന്ന ചികിത്സാ ഉപകരണങ്ങളും ശസ്ത്രക്രിയാ ഉൽപ്പന്നങ്ങളും മറ്റ് ആരോഗ്യസാമഗ്രികളും പരമാവധി ചില്ലറവിൽപ്പന വിലയിൽ ശരാശരി 50 ശതമാനം വരെ ഇളവിൽ ലഭ്യമാക്കുന്നു. 24 സംസ്ഥാനങ്ങളിലും നാല് കേന്ദ്രഭരണ പ്രദേശങ്ങളിലുമായി 285 അമൃത് വിൽപ്പനകേന്ദ്രങ്ങൾ പ്രവർത്തിക്കുന്നു. ആരംഭിച്ചതുമുതൽ 8.13 കോടിയിലധികം രോഗികൾക്ക് സേവനം നൽകിയിട്ടുണ്ട്. 2026 സെപ്റ്റംബർ ഇരുപത്തിനാലുവരെ പരമാവധി ചില്ലറവിൽപ്പന വിലയിൽ ഏകദേശം 22,323 കോടി രൂപ മൂല്യമുള്ള മരുന്നുകളും ആരോഗ്യ ഉൽപ്പന്നങ്ങളും വിതരണം ചെയ്തു. ഇതിലൂടെ രോഗികൾക്ക് ഏകദേശം 10,969 കോടി രൂപ ലാഭിക്കാനായി.
വിദൂരപ്രദേശങ്ങളിലും സേവനലഭ്യത കുറഞ്ഞ മേഖലകളിലും കാൻസർ ഉൾപ്പെടെയുള്ള രോഗങ്ങൾക്ക് വിദഗ്ധോപദേശം ലഭ്യമാക്കാൻ ഇ സഞ്ജീവനി സംവിധാനത്തിലൂടെ ടെലികൺസൾട്ടേഷൻ നൽകുന്നു. 2026 ഒക്ടോബർ ഇരുപത്തിയൊന്നുവരെ കാൻസർ പരിചരണം ഉൾപ്പെടെ വിവിധ ആരോഗ്യസേവനങ്ങൾക്കായി അമ്പത് കോടിയിലധികം രോഗികൾ ഈ സേവനം ഉപയോഗിച്ചിട്ടുണ്ട്. ആയുഷ്മാൻ ആരോഗ്യ മന്ദിറുകളിലെ പരിശോധന, പെൺകുട്ടികൾക്കുള്ള സൗജന്യ പ്രതിരോധ കുത്തിവയ്പ്, ആയുഷ്മാൻ ഭാരത് പദ്ധതിയിലെ പണരഹിത ആശുപത്രി ചികിത്സ, ജൻ ഔഷധി കേന്ദ്രങ്ങളിലെയും അമൃത് ഫാർമസികളിലെയും കുറഞ്ഞ വിലയുള്ള മരുന്നുകൾ എന്നിവയ്ക്കൊപ്പമാണ് പുതിയ വ്യാപാര മാർജിൻ നിയന്ത്രണവും വരുന്നത്. കാൻസർ പരിചരണത്തിന്റെ വിവിധ ഘട്ടങ്ങളിലെ ഈ സഹായങ്ങൾ കൂടുതൽ കുടുംബങ്ങൾക്ക് താമസസ്ഥലത്തിന് സമീപം ഗുണമേന്മയുള്ള ചികിത്സ ലഭ്യമാക്കുകയാണ് ലക്ഷ്യമിടുന്നത്.
.
Disclaimer: The information published on Samadarsi.com is provided for general news, informational, educational, and public awareness purposes only. While every reasonable effort is made to ensure the accuracy, reliability, and timeliness of the content, Samadarsi Communication LLP does not guarantee that all published information is free from errors, omissions, or inaccuracies. The views and opinions expressed in opinion articles, guest columns, interviews, and reader comments are solely those of the respective authors and do not necessarily reflect the views of Samadarsi Communication LLP. Readers are encouraged to independently verify any information before making financial, legal, medical, political, or personal decisions based on the content published on this website. Samadarsi.com reserves the right to update, modify, correct, or remove any content at any time without prior notice. Any links to external websites are provided solely for the convenience of users, and we do not endorse or accept responsibility for the content, security, accuracy, or privacy practices of such third-party websites. All trademarks, logos, images, and other copyrighted materials appearing on this website remain the property of their respective owners.
