ന്യൂഡൽഹി  /  2026  / ഒക്ടോബർ 24

ആഗോളതലത്തിലെ അനിശ്ചിതത്വങ്ങൾക്കിടെ ഇന്ത്യയുടെ സാമ്പത്തിക സ്ഥിരത ഉറപ്പാക്കാനുള്ള മുന്നൊരുക്കങ്ങൾ വിലയിരുത്തി ധനകാര്യ സ്ഥിരതാ വികസന കൗൺസിൽ. കേന്ദ്ര ധനകാര്യ, കോർപ്പറേറ്റ് കാര്യ മന്ത്രി നിർമല സീതാരാമന്റെ അധ്യക്ഷതയിൽ ഒക്ടോബർ 23ന് ന്യൂഡൽഹിയിൽ ചേർന്ന മുപ്പതാമത് യോഗത്തിലാണ് വിലയിരുത്തൽ നടന്നത്. ഭൗമരാഷ്ട്രീയ അനിശ്ചിതത്വങ്ങൾ, നിർമിതബുദ്ധി മേഖലയിലെ കുതിപ്പ്, ആഗോള കടപ്പത്രങ്ങളിൽനിന്നുള്ള വരുമാനനിരക്കിലെ കുത്തനെയുള്ള വർധന എന്നിവ കണക്കിലെടുത്ത് കൂടുതൽ ജാഗ്രത വേണമെന്ന് കൗൺസിൽ ആവശ്യപ്പെട്ടു. രാജ്യത്തിനകത്തും പുറത്തുമുള്ള സാമ്പത്തിക പ്രവണതകളും അവ നേരിടാനുള്ള ഇന്ത്യയുടെ സജ്ജീകരണങ്ങളും യോഗം പരിശോധിച്ചു. സാമ്പത്തിക സ്ഥിരതയ്ക്ക് ഭീഷണിയാകാവുന്ന കാര്യങ്ങൾ നേരത്തേ തിരിച്ചറിഞ്ഞ് നടപടിയെടുക്കണം. ധനകാര്യ സംവിധാനത്തിന് ആഘാതങ്ങളെ ചെറുക്കാനുള്ള ശേഷി ഉറപ്പാക്കാൻ മതിയായ സുരക്ഷാസംവിധാനങ്ങളും വേണം. ധനകാര്യ മേഖലയുടെ വിപുലമായ വികസനത്തിനായി നിയന്ത്രണ സ്ഥാപനങ്ങൾ തമ്മിലുള്ള ഏകോപനം ശക്തമാക്കാനും അംഗങ്ങൾ തീരുമാനിച്ചു.

ഡിജിറ്റൽ നവീകരണത്തിനൊപ്പം സൈബർ സുരക്ഷയും

ധനകാര്യ മേഖലയിലെ നിയന്ത്രണസംവിധാനങ്ങൾ മെച്ചപ്പെടുത്തേണ്ടതിന്റെയും ഡിജിറ്റൽ നവീകരണത്തിന്റെയും പ്രാധാന്യം യോഗം ചർച്ച ചെയ്തു. ധനകാര്യ സാങ്കേതികവിദ്യാ മേഖലയിൽ പുതുമകൾ പ്രോത്സാഹിപ്പിക്കാനുള്ള നടപടികളും പരിശോധിച്ചു. ധനകാര്യ ആസ്തികളെയും മറ്റ് യഥാർഥ ആസ്തികളെയും ഡിജിറ്റൽ ടോക്കണുകളായി പ്രതിനിധീകരിക്കുന്ന ടോക്കണൈസേഷന്റെ സാധ്യതകളും ചർച്ചയായി. ഇന്ത്യൻ ധനകാര്യ മേഖലയ്ക്ക് സൈബർ ആക്രമണങ്ങളെ ചെറുക്കാനുള്ള ശേഷിയും കൗൺസിൽ വിലയിരുത്തി. സാമ്പത്തികകാര്യ വകുപ്പ്, ധനകാര്യ സേവന വകുപ്പ്, ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം എന്നിവയുടെ ഏകോപനത്തിൽ തയ്യാറാക്കിയ ധനകാര്യ മേഖലാ സൈബർ സുരക്ഷാ തന്ത്രം യോഗം പരിഗണിച്ചു. ധനകാര്യ നിയന്ത്രണ സ്ഥാപനങ്ങളും സൈബർ സുരക്ഷാ ഏജൻസികളും ഉൾപ്പെട്ട മന്ത്രാലയാന്തര സംഘമാണ് ഇത് തയ്യാറാക്കിയത്. തന്ത്രം നടപ്പാക്കുന്നതിലൂടെ ഇന്ത്യൻ ധനകാര്യ മേഖലയ്ക്ക് പ്രതിസന്ധികളെ ചെറുക്കാനുള്ള മൊത്തത്തിലുള്ള ശേഷി വർധിക്കുമെന്നാണ് പ്രതീക്ഷ. നിർണായക വിവരസാങ്കേതിക അടിസ്ഥാനസൗകര്യങ്ങൾ സംരക്ഷിക്കാനുള്ള രാജ്യത്തിന്റെ തയ്യാറെടുപ്പും സുരക്ഷാസംവിധാനങ്ങളുടെ പ്രതിരോധശേഷിയും ചർച്ച ചെയ്തു. പ്രാദേശിക ഗ്രാമീണ ബാങ്കുകളുടെ സൈബർ സുരക്ഷാ മുന്നൊരുക്കങ്ങൾ മെച്ചപ്പെടുത്തുന്നതും യോഗം പരിഗണിച്ചു.

നിക്ഷേപം കൂട്ടാനും ധനകാര്യ സേവനങ്ങൾ ലളിതമാക്കാനും പരിഷ്കാരങ്ങൾ

മുൻ തീരുമാനങ്ങളും ബജറ്റ് പ്രഖ്യാപനങ്ങളും നടപ്പാക്കാനുള്ള തന്ത്രം രൂപപ്പെടുത്തുന്നതിനെക്കുറിച്ചും കൗൺസിൽ ചർച്ച ചെയ്തു. ആഭ്യന്തര നിക്ഷേപാന്തരീക്ഷം ശക്തമാക്കുന്നതും ഗിഫ്റ്റ് അന്താരാഷ്ട്ര ധനകാര്യ സേവന കേന്ദ്രത്തിലടക്കം നിക്ഷേപത്തിനുള്ള ധനലഭ്യത മെച്ചപ്പെടുത്തുന്നതും ഇതിൽ ഉൾപ്പെടുന്നു. ഉപഭോക്താവിനെ തിരിച്ചറിയുന്ന കെവൈസി നടപടികൾ ലളിതമാക്കുകയും ഡിജിറ്റലാക്കുകയും വേണം. പ്രവാസി ഇന്ത്യക്കാർക്കും വിദേശ പോർട്ട്ഫോളിയോ നിക്ഷേപകർക്കും ഡിജിറ്റലായി ധനകാര്യ സേവനങ്ങളിൽ ചേരാനുള്ള നടപടികളും ചർച്ച ചെയ്തു. സൂക്ഷ്മ, ചെറുകിട, ഇടത്തരം സംരംഭങ്ങൾക്ക് പ്രത്യേക പരിഗണന നൽകി രാജ്യത്തെ ഡിജിറ്റൽ പൊതു അടിസ്ഥാനസൗകര്യങ്ങൾ വിപുലപ്പെടുത്താനുള്ള പരിഷ്കാരങ്ങളും പരിഗണിച്ചു. അക്കൗണ്ട് അഗ്രിഗേറ്റർ സംവിധാനവും ഏകീകൃത വായ്പാ ഇന്റർഫേസ് ചട്ടക്കൂടും ഇതിൽ ഉൾപ്പെടുന്നു. ധനകാര്യ മേഖലയിലെ ഇടനിലച്ചെലവ് കുറയ്ക്കുക, ആവശ്യങ്ങൾക്കനുസരിച്ച് നിയന്ത്രണങ്ങൾ കൂടുതൽ വേഗത്തിൽ പ്രതികരിക്കുന്നതാക്കുക, രാജ്യത്തെ വായ്പാ ഗ്യാരന്റി പദ്ധതികൾ യുക്തിസഹമായി ക്രമീകരിക്കുക എന്നിവയും ചർച്ചയായി.

അവകാശികളെത്താത്ത പണം തിരികെ നൽകണം; യോഗങ്ങൾ കൂടുതൽ ഇടവേളകളിൽ

അവകാശികൾ ആവശ്യപ്പെടാതെ കിടക്കുന്ന ആസ്തികൾ യഥാർഥ ഉടമകൾക്ക് തിരികെ നൽകുന്ന നടപടികൾ വേഗത്തിലാക്കണമെന്ന് നിർമല സീതാരാമൻ നിയന്ത്രണ സ്ഥാപനങ്ങളോടും ബന്ധപ്പെട്ടവരോടും ആവശ്യപ്പെട്ടു. ബാങ്ക് നിക്ഷേപങ്ങൾ, ലാഭവിഹിതം, ഓഹരികൾ, പോസ്റ്റ് ഓഫീസ് അക്കൗണ്ടുകളിലെ തുക, ഇൻഷുറൻസ്, പെൻഷൻ ഫണ്ടുകൾ തുടങ്ങിയവ ഇതിൽ ഉൾപ്പെടുന്നു. ഇത്തരം ധനകാര്യ ആസ്തികൾ തിരികെ നൽകാനായി ജില്ലാതലത്തിൽ നടത്തിയ ‘നിങ്ങളുടെ പണം, നിങ്ങളുടെ അവകാശം’ പ്രചാരണത്തിന്റെ വിജയവും കൗൺസിൽ വിലയിരുത്തി. യഥാർഥ ഉടമകൾക്ക് സമയബന്ധിതമായി പണം തിരികെ ലഭിക്കാൻ കൂടുതൽ ശ്രമങ്ങൾ നടത്തണമെന്ന് മന്ത്രാലയങ്ങൾക്കും നിയന്ത്രണ സ്ഥാപനങ്ങൾക്കും നിർദേശം നൽകി. ഭൗമരാഷ്ട്രീയ വെല്ലുവിളികളും ആഗോള അനിശ്ചിതത്വവും വർധിക്കുന്ന സാഹചര്യത്തിൽ മുൻകൂട്ടി നിശ്ചയിച്ച സമയക്രമപ്രകാരം കൗൺസിൽ യോഗങ്ങൾ കൂടുതൽ തവണ നടത്തണമെന്നും മന്ത്രി ആവശ്യപ്പെട്ടു. റിസർവ് ബാങ്ക് ഗവർണറുടെ അധ്യക്ഷതയിലുള്ള കൗൺസിലിന്റെ ഉപസമിതി നടത്തിയ പ്രവർത്തനങ്ങളും യോഗം പരിഗണിച്ചു. നടപ്പാക്കാൻ ശേഷിക്കുന്ന മുൻ തീരുമാനങ്ങളിൽ സ്വീകരിച്ച നടപടികളും പരിശോധിച്ചു.

റിസർവ് ബാങ്ക് ഗവർണറും നിയന്ത്രണ സ്ഥാപന മേധാവികളും പങ്കെടുത്തു

റിസർവ് ബാങ്ക് ഗവർണർ സഞ്ജയ് മൽഹോത്ര; കേന്ദ്ര ധനമന്ത്രാലയത്തിലെ സാമ്പത്തികകാര്യ സെക്രട്ടറി അനുരാധ ഠാക്കൂർ, ധനകാര്യ സേവന സെക്രട്ടറി സഞ്ജയ് ലോഹിയ, റവന്യൂ സെക്രട്ടറി അരവിന്ദ് ശ്രീവാസ്തവ; ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയ സെക്രട്ടറി എസ്. കൃഷ്ണൻ; കോർപ്പറേറ്റ് കാര്യ മന്ത്രാലയ സെക്രട്ടറി ഡോ. പല്ലവി ജെയിൻ ഗോവിൽ; ധനമന്ത്രാലയത്തിലെ മുഖ്യ സാമ്പത്തിക ഉപദേഷ്ടാവ് ഡോ. വി. അനന്ത നാഗേശ്വരൻ എന്നിവർ യോഗത്തിൽ പങ്കെടുത്തു. സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ അധ്യക്ഷൻ തുഹിൻ കാന്ത പാണ്ഡെ; ഇൻഷുറൻസ് റെഗുലേറ്ററി ആൻഡ് ഡെവലപ്മെന്റ് അതോറിറ്റി ഓഫ് ഇന്ത്യ അധ്യക്ഷൻ അജയ് സേത്ത്; ഇന്റർനാഷണൽ ഫിനാൻഷ്യൽ സർവീസസ് സെന്റേഴ്സ് അതോറിറ്റി അധ്യക്ഷൻ കെ. രാജാരാമൻ; പെൻഷൻ ഫണ്ട് റെഗുലേറ്ററി ആൻഡ് ഡെവലപ്മെന്റ് അതോറിറ്റി അധ്യക്ഷൻ എസ്. രമണൻ; ഇൻസോൾവൻസി ആൻഡ് ബാങ്ക്റപ്റ്റ്സി ബോർഡ് ഓഫ് ഇന്ത്യ ആക്ടിങ് അധ്യക്ഷൻ ജയന്തി പ്രസാദ് എന്നിവരും പങ്കെടുത്തു. ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീം ഡയറക്ടർ ജനറൽ ഡോ. സഞ്ജയ് ബഹലും ധനമന്ത്രാലയത്തിലെ സാമ്പത്തികകാര്യ വകുപ്പിൽ കൗൺസിൽ സെക്രട്ടറിയായ അപർണ സിൻഹയും യോഗത്തിലുണ്ടായിരുന്നു.

.