ന്യൂഡൽഹി, 2026 ഒക്ടോബർ 19 –

2027ൽ രാജ്യാന്തര നാണയനിധിയുടെയും ലോകബാങ്കിന്റെയും വാർഷിക യോഗത്തിൽ അധ്യക്ഷപദവി ലഭിക്കുന്നത് ചരിത്രനേട്ടമാണെന്ന പാകിസ്ഥാന്റെ അവകാശവാദത്തെ തള്ളി മുൻ ഐഎംഎഫ് എക്സിക്യൂട്ടീവ് ഡയറക്ടർ കൃഷ്ണമൂർത്തി വി. സുബ്രഹ്മണ്യൻ. ഈ പദവി ആഗോള സാമ്പത്തിക തീരുമാനങ്ങളിൽ അധികാരം നൽകുന്നതല്ലെന്നും നടപടിക്രമങ്ങളുടെ ഭാഗമായി ലഭിക്കുന്ന ആചാരപരമായ ചുമതല മാത്രമാണെന്നും അദ്ദേഹം വ്യക്തമാക്കി. സമൂഹമാധ്യമത്തിലൂടെയാണ് സുബ്രഹ്മണ്യൻ പാകിസ്ഥാന്റെ അവകാശവാദത്തെ ചോദ്യം ചെയ്തത്. 1953ന് ശേഷം ആദ്യമായാണ് പാകിസ്ഥാന് ഈ പദവി ലഭിക്കുന്നത്. ഇതിനെ ചരിത്രപരമായ നേട്ടമെന്നാണ് പാകിസ്ഥാൻ സാമ്പത്തികകാര്യ മന്ത്രാലയം വിശേഷിപ്പിച്ചത്.

അധികാരമല്ല, നടപടിക്രമം മാത്രമെന്ന് സുബ്രഹ്മണ്യൻ

ഐഎംഎഫിന്റെയും ലോകബാങ്കിന്റെയും വാർഷിക പൊതുയോഗത്തിന്റെ അധ്യക്ഷപദവി അംഗരാജ്യങ്ങൾക്കിടയിൽ ഓരോ വർഷവും മാറിവരുന്നതാണെന്ന് സുബ്രഹ്മണ്യൻ ചൂണ്ടിക്കാട്ടി. 2025ൽ കാബോ വെർഡെയ്ക്കും 2026ൽ പരാഗ്വെയ്ക്കുമായിരുന്നു അധ്യക്ഷസ്ഥാനം. 2027ൽ പാകിസ്ഥാന് ലഭിക്കുന്നതും ഇതേ ചുമതലയാണ്. ഇത് അധികാരത്തിന്റെ അടയാളമല്ലെന്നും പതിവ് നടപടിക്രമം മാത്രമാണെന്നും അദ്ദേഹം പറഞ്ഞു.

ഇന്ത്യയുടെ ജി20, ബ്രിക്സ് അധ്യക്ഷപദവികളുമായി പാകിസ്ഥാന്റെ പുതിയ ചുമതലയെ താരതമ്യം ചെയ്യുന്നതും ശരിയല്ലെന്ന് സുബ്രഹ്മണ്യൻ അഭിപ്രായപ്പെട്ടു. ആഗോള സാമ്പത്തിക സഹകരണത്തിന്റെ അജണ്ട രൂപപ്പെടുത്തുന്നതിൽ ഇന്ത്യയുടെ ജി20 അധ്യക്ഷപദവിക്ക് പങ്കുണ്ടായിരുന്നു. എന്നാൽ പാകിസ്ഥാന്റെ ചുമതല വാർഷിക യോഗത്തിന്റെ നടപടികൾക്ക് അധ്യക്ഷത വഹിക്കുക എന്നതാണെന്നും അദ്ദേഹം വിശദീകരിച്ചു.

73 വർഷത്തിന് ശേഷം അധ്യക്ഷപദവി

2026 ഒക്ടോബറിൽ ബാങ്കോക്കിൽ നടന്ന ഐഎംഎഫ്, ലോകബാങ്ക് വാർഷിക യോഗത്തിലാണ് 2027ലെ അധ്യക്ഷപദവിയിലേക്ക് പാകിസ്ഥാനെ പ്രഖ്യാപിച്ചത്. പാകിസ്ഥാന്റെ സാമ്പത്തികകാര്യ മന്ത്രി അഹദ് ഖാൻ ചീമയാണ് ചുമതല ഏറ്റെടുക്കുക. ലോകബാങ്കിലെ പാകിസ്ഥാന്റെ ഗവർണർ കൂടിയാണ് അദ്ദേഹം.

1953ന് ശേഷം ആദ്യമായി ലഭിക്കുന്ന അവസരം രാജ്യത്തിന്റെ അന്താരാഷ്ട്ര സാമ്പത്തിക പങ്കാളിത്തത്തിലെ സുപ്രധാന നാഴികക്കല്ലാണെന്നാണ് പാകിസ്ഥാൻ സർക്കാരിന്റെ നിലപാട്. വികസ്വര രാജ്യങ്ങളുടെ അഭിപ്രായങ്ങൾ കൂടുതൽ ശക്തമായി അവതരിപ്പിക്കാനും അംഗരാജ്യങ്ങൾക്കിടയിൽ സാമ്പത്തിക സഹകരണം വളർത്താനും അധ്യക്ഷപദവി സഹായിക്കുമെന്നും പാകിസ്ഥാൻ അറിയിച്ചു.

ഐഎംഎഫ് വായ്പകളെ ആശ്രയിച്ച് പാകിസ്ഥാൻ

ആഗോള സാമ്പത്തിക നേതൃത്വത്തെക്കുറിച്ച് പാകിസ്ഥാൻ അവകാശവാദം ഉന്നയിക്കുമ്പോഴും രാജ്യം ഐഎംഎഫിന്റെ സാമ്പത്തിക സഹായത്തെ ആശ്രയിക്കുന്നുണ്ട്. സാമ്പത്തിക പരിഷ്കാരങ്ങൾക്കും വിദേശ പണമിടപാട് ആവശ്യങ്ങൾക്കുമായി 700 കോടി ഡോളറിന്റെ വായ്പാപദ്ധതിയിലാണ് പാകിസ്ഥാൻ ഉൾപ്പെട്ടിരിക്കുന്നത്. കാലാവസ്ഥാ വെല്ലുവിളികൾ നേരിടുന്നതിനായി 140 കോടി ഡോളറിന്റെ മറ്റൊരു ധനസഹായ പദ്ധതിയും നിലവിലുണ്ട്.

ഇതിനുപുറമേ ഏകദേശം 120 കോടി ഡോളറിന്റെ അടുത്ത ഗഡു അനുവദിക്കുന്നതിനുള്ള നടപടികളും പുരോഗമിക്കുകയാണ്. ഐഎംഎഫ് എക്സിക്യൂട്ടീവ് ബോർഡിന്റെ അംഗീകാരം ലഭിച്ചാൽ മാത്രമേ ഈ തുക അനുവദിക്കൂ. ഈ സാഹചര്യത്തിലാണ് പാകിസ്ഥാന്റെ ആഗോള സാമ്പത്തിക നേതൃത്വത്തെക്കുറിച്ചുള്ള അവകാശവാദത്തെ സുബ്രഹ്മണ്യൻ ചോദ്യം ചെയ്തത്.