ഭക്ഷ്യധാന്യ മാനേജ്മെന്റിൽ കാര്യക്ഷമതയും സാങ്കേതികവിദ്യയും ശക്തിപ്പെടുത്താൻ ഡിഎഫ്പിഡി–എഫ്സിഐ ധാരണാപത്രം

ന്യൂഡൽഹി /  2026  / സെപ്റ്റംബർ 09

ഭക്ഷ്യധാന്യങ്ങളുടെ സംഭരണം, ഗതാഗതം, വിതരണം എന്നിവ കൂടുതൽ കാര്യക്ഷമവും സുതാര്യവുമാക്കാൻ ഭക്ഷ്യ-പൊതുവിതരണ വകുപ്പും ഫുഡ് കോർപ്പറേഷൻ ഓഫ് ഇന്ത്യയും 2026–27 സാമ്പത്തിക വർഷത്തേക്കുള്ള ധാരണാപത്രത്തിൽ ഒപ്പുവച്ചു. സെപ്റ്റംബർ എട്ടിന് ന്യൂഡൽഹിയിലാണ് ധാരണാപത്രം ഒപ്പുവച്ചത്. എഫ്സിഐയുടെ പ്രവർത്തനക്ഷമത ഉയർത്തുക, ഉത്തരവാദിത്തം ശക്തിപ്പെടുത്തുക, ഭക്ഷ്യധാന്യ മാനേജ്മെന്റിലെ നവീകരണം വേഗത്തിലാക്കുക എന്നിവ ലക്ഷ്യമിട്ട് വ്യക്തമായ വാർഷിക പ്രകടന മാനദണ്ഡങ്ങളാണ് ധാരണാപത്രത്തിൽ നിശ്ചയിച്ചിരിക്കുന്നത്.

സംഭരണ നഷ്ടം കുറയ്ക്കാൻ പ്രത്യേക ശ്രദ്ധ

സംഭരണത്തിനിടെ ഉണ്ടാകുന്ന നഷ്ടം കുറയ്ക്കുക, ലഭ്യമായ സംഭരണശേഷി പരമാവധി പ്രയോജനപ്പെടുത്തുക, ചരക്കുനീക്കവും വിതരണ ശൃംഖലാ സംവിധാനവും മെച്ചപ്പെടുത്തുക, ഗുണനിലവാര നിയന്ത്രണ സംവിധാനങ്ങൾ ശക്തിപ്പെടുത്തുക തുടങ്ങിയ മേഖലകൾക്കാണ് ധാരണാപത്രത്തിൽ പ്രധാന പരിഗണന. എഫ്സിഐയുടെ പ്രവർത്തനങ്ങളിൽ കൂടുതൽ കാര്യക്ഷമതയും സുതാര്യതയും നിരീക്ഷണവും ഉറപ്പാക്കാൻ പ്രവർത്തന നടപടികൾ കൂടുതൽ ഡിജിറ്റൽ രീതിയിലാക്കാനും ആധുനിക വിവരസാങ്കേതിക സംവിധാനങ്ങൾ ഉപയോഗിക്കാനും തീരുമാനിച്ചിട്ടുണ്ട്.

ജീവനക്കാർക്ക് പുതിയ സാങ്കേതികവിദ്യയിൽ പരിശീലനം

നവീകരണ പദ്ധതിയുടെ ഭാഗമായി എഫ്സിഐ ജീവനക്കാരുടെ ശേഷി വർധിപ്പിക്കാനും നൈപുണ്യ വികസന പരിപാടികൾ നടപ്പാക്കാനും ധാരണാപത്രത്തിൽ വ്യവസ്ഥയുണ്ട്. പുതിയ സാങ്കേതികവിദ്യകളും ആധുനിക ഭക്ഷ്യധാന്യ മാനേജ്മെന്റ് സംവിധാനങ്ങളും സ്ഥാപനത്തിന് ഫലപ്രദമായി സ്വീകരിക്കാൻ ജീവനക്കാരെ പ്രാപ്തരാക്കുകയാണ് ഇതിലൂടെ ലക്ഷ്യമിടുന്നത്.

1964ലെ ഫുഡ് കോർപ്പറേഷൻസ് നിയമപ്രകാരം 1965ലാണ് എഫ്സിഐ സ്ഥാപിതമായത്. കേന്ദ്ര സർക്കാരിനുവേണ്ടി ഭക്ഷ്യധാന്യങ്ങളുടെ സംഭരണം, സംഭരണശാലകളിലെ പരിപാലനം, ചരക്കുനീക്കം, വിതരണം എന്നിവയാണ് എഫ്സിഐ നിർവഹിക്കുന്നത്. രാജ്യത്തിന്റെ ഭക്ഷ്യസുരക്ഷ നിലനിർത്തുന്നതിൽ സ്ഥാപനത്തിന് നിർണായക പങ്കുണ്ട്. വലിയ തോതിലുള്ള പൊതുവിഭവങ്ങളും ഭക്ഷ്യസബ്സിഡി തുകയും ഉപയോഗിക്കുന്ന സാഹചര്യത്തിൽ ചെലവ് കാര്യക്ഷമമായി നിയന്ത്രിക്കുകയും പ്രവർത്തനരീതികൾ തുടർച്ചയായി മെച്ചപ്പെടുത്തുകയും ചെയ്യുന്നത് പ്രധാന മുൻഗണനകളാണ്.

പ്രകടനം ഇനി വ്യക്തമായ വാർഷിക മാനദണ്ഡങ്ങളുമായി ബന്ധിപ്പിക്കും

എഫ്സിഐയുടെ പ്രവർത്തനഫലം വ്യക്തമായി അളക്കാൻ കഴിയുന്ന രീതിയിലാണ് പുതിയ ധാരണാപത്രം തയ്യാറാക്കിയിരിക്കുന്നത്. സ്ഥാപനത്തിന്റെ പ്രകടനത്തെ മുൻകൂട്ടി നിശ്ചയിച്ച വാർഷിക മാനദണ്ഡങ്ങളുമായി ബന്ധിപ്പിക്കും. ലഭ്യമായ വിഭവങ്ങൾ കൂടുതൽ കാര്യക്ഷമമായി ഉപയോഗിക്കുക, പ്രവർത്തനങ്ങളിൽ സുതാര്യത വർധിപ്പിക്കുക, സാങ്കേതികവിദ്യ അധിഷ്ഠിത പരിഹാരങ്ങൾ കൂടുതൽ വ്യാപകമായി സ്വീകരിക്കുക എന്നിവയാണ് ഇതിലൂടെ ലക്ഷ്യമിടുന്നത്.

ധാരണാപത്രത്തിലെ ചില ലക്ഷ്യങ്ങൾ എഫ്സിഐ ഡിപ്പോകളുടെ പ്രകടനവുമായി ബന്ധിപ്പിച്ചിട്ടുണ്ട്. ഡിപ്പോകളുടെ അടിസ്ഥാനസൗകര്യവും പ്രവർത്തനക്ഷമതയും വിലയിരുത്തുന്ന വെബ് അധിഷ്ഠിത സംവിധാനമായ ഡിപ്പോ ദർപ്പൺ പോർട്ടലാണ് ഇതിനായി ഉപയോഗിക്കുന്നത്. അടിസ്ഥാനസൗകര്യം ശക്തിപ്പെടുത്തുക, പ്രവർത്തന പ്രകടനം മെച്ചപ്പെടുത്തുക, എഫ്സിഐ ഡിപ്പോകളിൽ തുടർച്ചയായ പുരോഗതി ഉറപ്പാക്കുക എന്നിവയ്ക്കായി ഫലവും ലക്ഷ്യവും അടിസ്ഥാനമാക്കിയ മാനദണ്ഡങ്ങളും ഉൾപ്പെടുത്തിയിട്ടുണ്ട്.

ഭക്ഷ്യസുരക്ഷാ സംവിധാനം കൂടുതൽ ശക്തമാക്കും

രാജ്യത്തിന്റെ ഭക്ഷ്യധാന്യ മാനേജ്മെന്റ് സംവിധാനം നവീകരിക്കാനും ഭക്ഷ്യസുരക്ഷാ സംവിധാനത്തിന്റെ കാര്യക്ഷമതയും പ്രതിരോധശേഷിയും ഉയർത്താനുമുള്ള സർക്കാരിന്റെ തുടർച്ചയായ പ്രതിബദ്ധതയാണ് ധാരണാപത്രം വ്യക്തമാക്കുന്നത്. പ്രകടനത്തെ അടിസ്ഥാനമാക്കിയ ഈ ചട്ടക്കൂടിലൂടെ ഭക്ഷ്യസബ്സിഡിക്കായി ചെലവഴിക്കുന്ന വിഭവങ്ങൾ ചെലവ് കുറഞ്ഞതും സുതാര്യവുമായ രീതിയിൽ ഉപയോഗിക്കുമെന്ന് ഭക്ഷ്യ-പൊതുവിതരണ വകുപ്പും എഫ്സിഐയും വ്യക്തമാക്കുന്നു. ഇതിലൂടെ രാജ്യത്തിന് കൂടുതൽ മൂല്യം ലഭ്യമാക്കുകയാണ് ലക്ഷ്യം.

.