വനസംരക്ഷണത്തിൽ ഇന്ത്യ–ജപ്പാൻ സഹകരണം ശക്തമാക്കും; 2027–31 പ്രവർത്തനരേഖയ്ക്ക് അംഗീകാരം

ബെംഗളൂരു  / 2026  / സെപ്റ്റംബർ 09

വനമേഖലയിലെ സഹകരണം കൂടുതൽ ശക്തമാക്കാൻ ഇന്ത്യയും ജപ്പാനും തീരുമാനിച്ചു. ഇന്ത്യ–ജപ്പാൻ സംയുക്ത പ്രവർത്തകസമിതിയുടെ ഏഴാമത് യോഗം സെപ്റ്റംബർ എട്ടിന് ബെംഗളൂരുവിൽ നടന്നു. കേന്ദ്ര പരിസ്ഥിതി, വനം, കാലാവസ്ഥാ വ്യതിയാന മന്ത്രാലയത്തിലെ അഡീഷണൽ ഡയറക്ടർ ജനറൽ (വനം) രമേഷ് കുമാർ പാണ്ഡെയാണ് ഇന്ത്യൻ സംഘത്തെ നയിച്ചത്. ജപ്പാൻ കാർഷിക, വനം, മത്സ്യബന്ധന മന്ത്രാലയത്തിന് കീഴിലെ ഫോറസ്ട്രി ഏജൻസി ഡെപ്യൂട്ടി ഡയറക്ടർ ജനറൽ ഷിമിസു കൊട്ടാരോ ജപ്പാൻ സംഘത്തിന് നേതൃത്വം നൽകി. വനത്തിന് പുറത്തുള്ള മരങ്ങൾ, വന ജനിതകശാസ്ത്രം, വനവിഭവങ്ങളുടെ ശാസ്ത്രീയ കണക്കെടുപ്പും നിരീക്ഷണവും എന്നിവയിലാണ് പ്രധാന ചർച്ച നടന്നത്.

വനത്തിന് പുറത്തുള്ള മരവിഭവങ്ങളിൽ ശ്രദ്ധ

വനത്തിന് പുറത്തുള്ള മരങ്ങളെ വിലയിരുത്തുന്നതിലും പരിപാലിക്കുന്നതിലും അവയുടെ ജനിതക ഗുണമേന്മ മെച്ചപ്പെടുത്തുന്നതിലും ഇരുരാജ്യങ്ങളും തങ്ങളുടെ അനുഭവങ്ങൾ പങ്കുവച്ചു. കൃഷിയിടങ്ങളും മറ്റ് വനേതര പ്രദേശങ്ങളും ഉൾപ്പെടെയുള്ള സ്ഥലങ്ങളിലെ മരവിഭവങ്ങളുടെ മികച്ച പരിപാലനവുമായി ബന്ധപ്പെട്ട കാര്യങ്ങളാണ് ഇതിൽ പ്രധാനമായി ചർച്ച ചെയ്തത്.

വന ജനിതക വിഭവങ്ങളുടെ സംരക്ഷണം

വന ജനിതകശാസ്ത്രവുമായി ബന്ധപ്പെട്ട ചർച്ചയിൽ ജനിതക വിഭവങ്ങളുടെ സംരക്ഷണം, മികച്ച മരയിനങ്ങളുടെ വികസനം, ഗുണമേന്മയുള്ള നടീൽ വസ്തുക്കൾ ലഭ്യമാക്കൽ, ജെർംപ്ലാസം സംരക്ഷണം എന്നിവയ്ക്ക് പ്രാധാന്യം നൽകി. വനവിഭവങ്ങളുടെ ദീർഘകാല സംരക്ഷണത്തിനും മെച്ചപ്പെടുത്തലിനും ഇത്തരം പ്രവർത്തനങ്ങൾ സഹായകമാകുമെന്ന് യോഗത്തിൽ വിലയിരുത്തി.

വന നിരീക്ഷണത്തിന് പുതിയ സാങ്കേതികവിദ്യകൾ

വനവിഭവങ്ങളുടെ കണക്കെടുപ്പ്, വനത്തിലെ മരസമ്പത്തിന്റെ വിലയിരുത്തൽ, ഭൂമിശാസ്ത്ര വിവര സാങ്കേതികവിദ്യകൾ, നിരീക്ഷണ സംവിധാനങ്ങൾ എന്നിവയിലും ഇന്ത്യയും ജപ്പാനും അഭിപ്രായങ്ങളും അനുഭവങ്ങളും പങ്കുവച്ചു. വനമേഖലയെ കൂടുതൽ കൃത്യമായി നിരീക്ഷിക്കാനും വിവരങ്ങൾ ശാസ്ത്രീയമായി വിലയിരുത്താനും കഴിയുന്ന രീതികളാണ് ചർച്ച ചെയ്തത്.

2027–31 പ്രവർത്തനരേഖയ്ക്ക് അംഗീകാരം

2015ൽ ഒപ്പുവച്ച സഹകരണ ധാരണാപത്രത്തിന്റെ അടിസ്ഥാനത്തിലുള്ള 2027 മുതൽ 2031 വരെയുള്ള പ്രവർത്തനരേഖയ്ക്ക് ഇരുരാജ്യങ്ങളും അംഗീകാരം നൽകി. വനസംരക്ഷണം, ജൈവവൈവിധ്യ സംരക്ഷണം, ഗവേഷണം, ശേഷിവികസനം എന്നീ മേഖലകളിൽ ബന്ധവും സഹകരണവും കൂടുതൽ ആഴത്തിലാക്കാനുള്ള പ്രതിബദ്ധതയും ഇരുപക്ഷവും ആവർത്തിച്ചു. ഏഴാമത് സംയുക്ത പ്രവർത്തകസമിതി യോഗത്തിന്റെ നടപടിവിവര രേഖയിൽ ഒപ്പുവച്ചാണ് യോഗം അവസാനിച്ചത്.

ചന്ദനകൃഷിയും വന്യജീവി സംരക്ഷണവും നേരിൽ പഠിക്കും

പരിപാടിയുടെ ഭാഗമായി ഇരുരാജ്യങ്ങളിലെയും പ്രതിനിധികൾ ബെംഗളൂരുവിലെ ഇൻസ്റ്റിറ്റ്യൂട്ട് ഓഫ് വുഡ് സയൻസ് ആൻഡ് ടെക്നോളജി സന്ദർശിച്ചു. കർണാടക വനംവകുപ്പ് ഉദ്യോഗസ്ഥരുമായും സംഘം ആശയവിനിമയം നടത്തി. സെപ്റ്റംബർ ഒൻപതിന് മൈസൂരുവിലെ ചന്ദന അധിഷ്ഠിത കാർഷികവനവൽക്കരണ കൃഷിയിടങ്ങൾ, ചന്ദന ഡിപ്പോ, സംസ്കരണ യൂണിറ്റ് എന്നിവയും സെപ്റ്റംബർ പത്തിന് നാഗർഹോളെ കടുവാ സങ്കേതവും സന്ദർശിക്കും. സ്വകാര്യ കൃഷിയിടങ്ങളിലെ ചന്ദനകൃഷിയും വന്യജീവി സംരക്ഷണ രീതികളും സംബന്ധിച്ച അനുഭവങ്ങൾ പങ്കുവയ്ക്കുകയാണ് ഈ സന്ദർശനങ്ങളുടെ ലക്ഷ്യം.

.