വാഷിംഗ്ടൺ, ജൂലൈ 4:
അഫ്ഗാനിസ്ഥാനുമായുള്ള അതിർത്തി സംഘർഷം കടുക്കുന്നതിനിടെ പാകിസ്താന് അനുകൂല നിലപാടുമായി അമേരിക്ക. അഫ്ഗാൻ താലിബാന്റെ ഭാഗത്തുനിന്നുണ്ടാകുന്ന ആക്രമണങ്ങളിൽ നിന്ന് സ്വയം പ്രതിരോധിക്കാനുള്ള പൂർണ്ണ അവകാശം പാകിസ്താനുണ്ടെന്ന് അമേരിക്കൻ സ്റ്റേറ്റ് ഡിപ്പാർട്മെന്റ് വ്യക്തമാക്കി. ഇരുരാജ്യങ്ങളും തമ്മിലുള്ള സായുധ ഏറ്റുമുട്ടലിൽ വിലപ്പെട്ട ജീവനുകൾ നഷ്ടമായതിൽ അമേരിക്ക കടുത്ത ദുഃഖവും രേഖപ്പെടുത്തിയിട്ടുണ്ട്.
അമേരിക്കൻ സ്റ്റേറ്റ് ഡിപ്പാർട്മെന്റും രാഷ്ട്രീയകാര്യ അണ്ടർസെക്രട്ടറി ആലിസൺ ഹൂക്കറും, പാകിസ്താൻ വിദേശകാര്യ സെക്രട്ടറി അമ്ന ബലോച്ചുമായി നടത്തിയ നയതന്ത്ര ആശയവിനിമയത്തിന് പിന്നാലെയാണ് യു.എസ് ഔദ്യോഗിക നിലപാട് വ്യക്തമാക്കിയത്. ഭീകരവാദ വിരുദ്ധ കരാറുകൾ പാലിക്കുന്നതിൽ അഫ്ഗാൻ താലിബാൻ തുടർച്ചയായി പരാജയപ്പെടുകയാണെന്നും, ഭീകരാക്രമണങ്ങൾ ആസൂത്രണം ചെയ്യാൻ അഫ്ഗാൻ മണ്ണ് ദുരുപയോഗം ചെയ്യപ്പെടുന്നുണ്ടെന്നും അമേരിക്ക ആരോപിച്ചു. അതേസമയം, നിലവിലെ സംഘർഷങ്ങൾക്ക് വിരാമമിടാൻ സമാധാന ചർച്ചകൾക്ക് തയ്യാറാണെന്ന് അഫ്ഗാൻ താലിബാൻ നേതൃത്വം അറിയിച്ചിട്ടുണ്ട്.
അഫ്ഗാൻ അതിർത്തി മേഖലകളിൽ പാകിസ്താൻ നടത്തിയ വ്യോമാക്രമണവും, അതിന് പിന്നാലെ അഫ്ഗാന്റെ ഭാഗത്തുനിന്നുണ്ടായ ശക്തമായ തിരിച്ചടിയുമാണ് അതിർത്തിയിലെ സ്ഥിതിഗതികൾ വഷളാക്കിയത്. പാകിസ്താൻ താലിബാൻ (TTP) അഫ്ഗാനിസ്ഥാൻ കേന്ദ്രമാക്കിയാണ് പ്രവർത്തിക്കുന്നതെന്നാണ് ഇസ്ലാമാബാദിന്റെ പ്രധാന ആരോപണം. എന്നാൽ അഫ്ഗാൻ ഭരണകൂടം ഈ ആരോപണം ശക്തമായി നിഷേധിക്കുകയാണ്. ഇരുരാജ്യങ്ങളും തമ്മിലുള്ള സൈനിക നീക്കങ്ങൾ ശക്തമായ സാഹചര്യത്തിൽ മേഖലയിൽ സമാധാനവും സംയമനവും പാലിക്കണമെന്ന് അന്താരാഷ്ട്ര സമൂഹവും ആവശ്യപ്പെടുന്നു.
പൊതുവായ നിരാകരണം: ഈ വെബ്സൈറ്റിൽ പ്രസിദ്ധീകരിക്കുന്ന വാർത്തകൾ, ലേഖനങ്ങൾ, അഭിപ്രായങ്ങൾ, ചിത്രങ്ങൾ, വീഡിയോകൾ എന്നിവ പൊതുജനങ്ങൾക്ക് വിവരങ്ങൾ നൽകുന്നതിനുള്ളതാണ്. പ്രസിദ്ധീകരിച്ചിരിക്കുന്ന വിവരങ്ങൾ ലഭ്യമായ ഉറവിടങ്ങളിൽ നിന്ന് ശേഖരിച്ചതും പരമാവധി കൃത്യത ഉറപ്പാക്കാൻ ശ്രമിച്ചതുമാണ്. എന്നിരുന്നാലും, വിവരങ്ങളുടെ സമ്പൂർണ്ണ കൃത്യത, പൂർണ്ണത, കാലികത എന്നിവ സംബന്ധിച്ച് ഞങ്ങൾ യാതൊരു ഉറപ്പും നൽകുന്നില്ല.
