കൊച്ചി, 2026 ജൂൺ 24 –

വീര്യം കുറഞ്ഞ മദ്യത്തിന് നികുതി ഇളവ് നൽകിയ വിഷയത്തിൽ മുഖ്യമന്ത്രിക്ക് പിന്തുണ പ്രഖ്യാപിച്ച് മന്ത്രി സി പി ജോൺ രംഗത്തെത്തി. ഈ വിഷയത്തിൽ പാർട്ടിക്ക് വ്യത്യസ്ത നിലപാടില്ലെന്നും മുഖ്യമന്ത്രി പറഞ്ഞ നിലപാടിനൊപ്പമാണ് തങ്ങളെന്നും അദ്ദേഹം കൊച്ചിയിൽ പ്രതികരിച്ചു.

വാഹന മോഡിഫിക്കേഷനുമായി ബന്ധപ്പെട്ട വിവാദങ്ങളിലും മന്ത്രി വിശദീകരണം നൽകി. അപകടസാധ്യത സൃഷ്ടിക്കാത്ത മാറ്റങ്ങളെയാണ് അനുവദിക്കാനുദ്ദേശിക്കുന്നതെന്നും റോഡുകളിൽ വലിയതോ ചെറിയതോ എന്ന വ്യത്യാസമില്ലാതെ എല്ലാ നിയമലംഘനങ്ങളും ഗൗരവത്തോടെ കാണുമെന്നും വ്യക്തമാക്കി. വാഹനത്തിൽ ബമ്പർ ഘടിപ്പിച്ചതിന് പിഴ ഈടാക്കിയ സംഭവത്തെ കുറിച്ചും പ്രതികരിച്ച അദ്ദേഹം, അത് അപകടകരമായ നടപടിയാണെന്ന് ചൂണ്ടിക്കാട്ടി.

ടിപ്പർ ഡ്രൈവർമാർ കൂടുതൽ ഉത്തരവാദിത്തത്തോടെ പെരുമാറണമെന്നും അമിതവേഗം ഒഴിവാക്കണമെന്നും മന്ത്രി ആവശ്യപ്പെട്ടു. നിയമലംഘനം നടത്തുന്നവർക്കെതിരെ കർശന നടപടി സ്വീകരിക്കുമെന്നും ഇതിനായി പരിശോധനകൾ ശക്തമാക്കുമെന്നും അറിയിച്ചു. പ്രധാന ജംഗ്ഷനുകളിൽ സീബ്രാ ക്രോസിങ് വരകളുടെ വീതി വർധിപ്പിക്കുമെന്നും കാൽനടയാത്രക്കാർക്കായി ബോധവൽക്കരണ പരിപാടികൾ സംഘടിപ്പിക്കുമെന്നും അദ്ദേഹം വ്യക്തമാക്കി.