കേരളത്തിൽ പുതിയ ജില്ലകളും താലൂക്കുകളും രൂപീകരിക്കാൻ സാധ്യത

തിരുവനന്തപുരം, 2026 ജൂൺ 20 –

കേരളത്തിൽ നിലവിലുള്ള ചില ജില്ലകൾ വിഭജിച്ച് പുതിയ ജില്ലകളും താലൂക്കുകളും രൂപീകരിക്കാൻ സാധ്യതയുണ്ടെന്ന സൂചന. ദേശീയ ശരാശരിയേക്കാൾ കൂടുതൽ ജനസംഖ്യയുള്ള ജില്ലകളെ വിഭജിക്കുന്ന കാര്യം പരിഗണിക്കുമെന്നാണ് വിവരം. ഇതുസംബന്ധിച്ച് പഠനം നടത്താൻ കമ്മീഷനെ നിയമിക്കുമെന്ന ബജറ്റ് പ്രഖ്യാപനമാണ് ചർച്ചകൾക്ക് വഴിവെച്ചിരിക്കുന്നത്.

പുതിയ സെൻസസ് വിവരങ്ങൾ പുറത്തുവന്നതിന് ശേഷം ജനസംഖ്യാ പ്രാതിനിധ്യവും മറ്റ് ഘടകങ്ങളും പരിഗണിച്ചാകും സർക്കാർ അന്തിമ തീരുമാനമെടുക്കുക. 1984-ൽ കാസർകോട് ജില്ല രൂപീകരിച്ചതാണ് കേരളത്തിൽ അവസാനമായി നടന്ന ജില്ലാ രൂപീകരണം. പുതിയ താലൂക്കുകൾ അവസാനമായി രൂപീകരിച്ചത് 12 വർഷം മുമ്പാണ്.

മൂവാറ്റുപുഴ ജില്ല, തിരൂർ ജില്ല, മഞ്ചേരി ആസ്ഥാനമായുള്ള ജില്ല, ഷൊർണൂർ ജില്ല, കോഴിക്കോട് ജില്ലയിലെ ചില ഭാഗങ്ങൾ ഉൾപ്പെടുത്തി പുതിയ ജില്ല, തിരുവനന്തപുരം ജില്ലയിലെ കാട്ടാക്കടയും നെയ്യാറ്റിൻകരയും ഉൾപ്പെടുന്ന ജില്ല എന്നിവയ്ക്കായുള്ള നിവേദനങ്ങൾ വിവിധ കാലഘട്ടങ്ങളിൽ സർക്കാരിന് മുന്നിലെത്തിയിട്ടുണ്ട്. ഇതിനുപുറമേ പുതിയ താലൂക്കുകൾ രൂപീകരിക്കണമെന്ന ആവശ്യവും വിവിധ മേഖലകളിൽ നിന്ന് ഉയരുന്നുണ്ട്. കമ്മീഷന്റെ പഠന റിപ്പോർട്ടും പുതിയ സെൻസസ് വിവരങ്ങളുമാകും തുടർനടപടികളിൽ നിർണായകമാകുക.