കോട്ടയം, 2026 ജൂൺ 17 –
പാലാ നഗരസഭയിലെ രാഷ്ട്രീയ പ്രതിസന്ധിക്കുശേഷം ചേർന്ന ആദ്യ കൗൺസിൽ യോഗത്തിൽ കൊട്ടാരമറ്റം ഓട്ടോ സ്റ്റാൻഡ് നിലനിർത്തുന്നതിനുള്ള തീരുമാനം അംഗീകരിച്ചു. സെക്രട്ടറിയെ ഇതിനായി ചുമതലപ്പെടുത്തുകയും ചെയ്തു. എന്നാൽ തീരുമാനം വായിച്ചശേഷം പ്രതിപക്ഷത്തിന് സംസാരിക്കാൻ അവസരം നൽകുന്നതിന് മുമ്പ് തന്നെ ചെയർപേഴ്സൺ ദിയ ബിനു പുളിക്കക്കണ്ടം യോഗത്തിൽ നിന്ന് ഇറങ്ങിപ്പോയി. ആകെ ഒന്നര മിനിറ്റ് മാത്രമാണ് കൗൺസിൽ യോഗം നീണ്ടത്.
കോൺഗ്രസുമായുള്ള ധാരണ പാലിച്ചാണ് സ്വതന്ത്ര മുന്നണി തീരുമാനമെടുത്തത്. കൊട്ടാരമറ്റം ഓട്ടോ സ്റ്റാൻഡുമായി ബന്ധപ്പെട്ട തീരുമാനം ഐകകണ്ഠേന പാസാക്കാൻ കൗൺസിൽ യോഗത്തിന് മുമ്പ് ചേർന്ന പാർലമെന്ററി പാർട്ടി യോഗത്തിൽ തീരുമാനിച്ചിരുന്നു. നേരത്തെ ഓട്ടോ സ്റ്റാൻഡിന് അധിക സ്ഥലം അനുവദിക്കാനാകില്ലെന്ന നിലപാടായിരുന്നു നഗരസഭ ചെയർപേഴ്സണും സെക്രട്ടറിയും സ്വീകരിച്ചിരുന്നത്. ഇതേ ചൊല്ലിയുള്ള തർക്കമാണ് നഗരസഭയിലെ ഭിന്നതയ്ക്ക് വഴിവെച്ചത്.
ചെയർപേഴ്സൺ വിവാദങ്ങളെക്കുറിച്ചുള്ള ചർച്ച ഒഴിവാക്കാനാണ് യോഗത്തിൽ നിന്ന് ഇറങ്ങിപ്പോയതെന്ന് പ്രതിപക്ഷം ആരോപിച്ചു. ധാർമികത ഉണ്ടെങ്കിൽ രാജിവയ്ക്കണമെന്നും അവർ ആവശ്യപ്പെട്ടു. ഓട്ടോ സ്റ്റാൻഡ് വിഷയവുമായി ബന്ധപ്പെട്ട തർക്കത്തിനിടെ കോൺഗ്രസ് കൗൺസിലർ ബിജു മാത്യൂസിനെ ബിനു പുളിക്കക്കണ്ടം കയ്യേറ്റം ചെയ്തുവെന്ന പരാതിയും ഉയർന്നിരുന്നു. പിന്നാലെ ചെയർപേഴ്സൺ ദിയ പുളിക്കക്കണ്ടം, തന്റെ ചേംബറിൽ നിന്ന് വിലപ്പെട്ട വാച്ചും പ്രധാന ഫയലും നഷ്ടമായതായി പരാതി നൽകി. കൗൺസിലർ ബിജു തോമസ് ചേംബറിൽ വന്നുപോയതിന് ശേഷമാണ് സാധനങ്ങൾ കാണാതായതെന്നാണ് പരാതിയിലെ ആരോപണം.
