പത്തനാപുരം താലൂക്ക് ആശുപത്രി ഡിസംബറിൽ പൂർത്തിയാക്കുമെന്ന് ഇൻകൽ അധികൃതർ

പത്തനാപുരം, 2026 ജൂൺ 14 –

പത്തനാപുരം താലൂക്ക് ആശുപത്രിയുടെ നിർമാണം ഈ വർഷം ഡിസംബറിൽ പൂർത്തിയാകുമെന്ന് ഇൻകൽ അധികൃതർ അറിയിച്ചു. ആശുപത്രിയുടെ നിർമാണപുരോഗതി വിലയിരുത്താൻ ജ്യോതികുമാർ ചാമക്കാല എം.എൽ.എ വിളിച്ചുചേർത്ത ആരോഗ്യ വകുപ്പ് ഉദ്യോഗസ്ഥരുടെയും ജനപ്രതിനിധികളുടെയും യോഗത്തിലാണ് തീരുമാനം അറിയിച്ചത്. നിർമാണപുരോഗതി വിലയിരുത്താൻ എല്ലാ മാസവും യോഗം ചേരാനും തീരുമാനമായി.

എം.എൽ.എയും സംഘവും മഞ്ചള്ളൂരിലെ ആശുപത്രി നിർമാണസ്ഥലം സന്ദർശിച്ചു. ആശുപത്രി നിർമാണവുമായി ബന്ധപ്പെട്ട വിവരങ്ങൾ ജില്ലാ മെഡിക്കൽ ഓഫീസർ ഉൾപ്പെടെയുള്ള ഉദ്യോഗസ്ഥർക്ക് പോലും പൂർണമായി ലഭിച്ചിരുന്നില്ലെന്ന വിമർശനവും യോഗത്തിൽ ഉയർന്നു. ആശുപത്രിയുടെ ഉടമസ്ഥാവകാശമുള്ള ബ്ലോക്ക് പഞ്ചായത്തിനുപോലും നിർമാണപുരോഗതിയെക്കുറിച്ച് വ്യക്തമായ ധാരണയില്ലായിരുന്നുവെന്ന ആക്ഷേപവും യോഗത്തിലുണ്ടായി. ആശുപത്രിയിലേക്കുള്ള പ്രവേശനപാതയുടെ ക്രമീകരണം സംബന്ധിച്ചും പൊതുമരാമത്ത് വകുപ്പ് റോഡ്സ് ആൻഡ് ബ്രിഡ്ജസ് വിഭാഗം ആശങ്ക അറിയിച്ചു. നിലവിലെ രൂപത്തിൽ പ്രവേശനപാത ഒരുക്കിയാൽ അപകടസാധ്യത വർധിക്കുമെന്നാണ് ഉദ്യോഗസ്ഥരുടെ വിലയിരുത്തൽ.

2024-ലാണ് ആശുപത്രി കെട്ടിട നിർമാണത്തിനായി മഞ്ചള്ളൂരിൽ രണ്ടേക്കറോളം സ്ഥലം വാങ്ങിയത്. പത്തനാപുരം ബ്ലോക്ക് പഞ്ചായത്തും അതിർത്തിയിലെ ആറു ഗ്രാമപഞ്ചായത്തുകളും സമാഹരിച്ച തുകയാണ് ഇതിനായി വിനിയോഗിച്ചത്. 96 കോടി രൂപയുടെ കിഫ്ബി ഫണ്ട് ഉപയോഗിച്ചാണ് ആശുപത്രി നിർമാണം പുരോഗമിക്കുന്നത്. നിർമാണം വേഗത്തിലാക്കി ഡിസംബറിൽ പൂർത്തിയാക്കാനുള്ള പുതിയ സമയക്രമം പ്രഖ്യാപിച്ചു.