അരുവിക്കര ശിവ പാർക്ക് കാടുകയറി നശിക്കുന്നു; നവീകരണം ആവശ്യപ്പെട്ട് നാട്ടുകാർ

നെടുമങ്ങാട്, 2026 ജൂൺ 14 –

അരുവിക്കര ഡാം സൈറ്റിലെ ശിവ പാർക്ക് സംരക്ഷണമില്ലാതെ കാടുകയറി നശിക്കുന്നതായി പരാതി. അരുവിക്കരയിലെത്തുന്ന കുടുംബങ്ങൾക്ക് വിനോദവും വിശ്രമവും ഒരുക്കിയിരുന്ന പാർക്കാണ് ഇപ്പോൾ ഉപയോഗശൂന്യമായ നിലയിലേക്ക് മാറിയിരിക്കുന്നത്. 2016-ൽ എം.പി സമ്പത്തിന്റെ ആസ്തി വികസന ഫണ്ടിൽ നിന്ന് 15 ലക്ഷം രൂപ വിനിയോഗിച്ച് കളിക്കോപ്പുകൾ സ്ഥാപിക്കുകയും പാർക്ക് നവീകരിക്കുകയും ചെയ്തിരുന്നു.

പാർക്കിന്റെ സംരക്ഷണ ചുമതല വാട്ടർ അതോറിറ്റിക്കായിരുന്നു. ഗ്രാമപഞ്ചായത്തും തുടക്കത്തിൽ പാർക്കിന്റെ പരിപാലനത്തിൽ ശ്രദ്ധ ചെലുത്തിയിരുന്നു. പാർക്ക് നിയന്ത്രിക്കാൻ സുരക്ഷാ ജീവനക്കാരനെയും നിയോഗിച്ചിരുന്നു. എന്നാൽ പിന്നീട് പാർക്കിന്റെ സംരക്ഷണവുമായി ബന്ധപ്പെട്ട് പഞ്ചായത്തും വാട്ടർ അതോറിറ്റിയും തമ്മിൽ തർക്കമുണ്ടായതോടെയാണ് പരിപാലനം മുടങ്ങിയത്. നിലവിൽ പാർക്ക് പൂർണമായും കാടുകയറിയ നിലയിലാണ്. ലക്ഷങ്ങൾ ചെലവഴിച്ച് സ്ഥാപിച്ച കളിക്കോപ്പുകൾ തുരുമ്പെടുത്ത് നശിച്ചുകിടക്കുകയാണ്.

പാർക്കിനുള്ളിലെ നടപ്പാതകൾ തകർന്ന നിലയിലാണ്. വൈദ്യുതി മെയിൻ സ്വിച്ച് ബോർഡ് തുറന്നുകിടക്കുന്നതും സുരക്ഷാ ആശങ്ക ഉയർത്തുന്നുണ്ട്. ഇഴജന്തുക്കളും തെരുവുനായ്ക്കളും ഇവിടെ സാന്നിധ്യമറിയിക്കുന്നതായി നാട്ടുകാർ പറയുന്നു. സാമൂഹ്യവിരുദ്ധരുടെ താവളമായും ചിലപ്പോൾ പ്രദേശം മാറുന്നതായി പരാതിയുണ്ട്. പാർക്ക് നവീകരിച്ച് സംരക്ഷണ ചുമതല വ്യക്തമായി നിശ്ചയിച്ച് പഴയ പ്രതാപം വീണ്ടെടുക്കാൻ നടപടി സ്വീകരിക്കണമെന്നാണ് നാട്ടുകാരുടെ ആവശ്യം.