ഗുണഭോക്താക്കൾക്ക് കൈമാറാതെ വാഹനങ്ങൾ കിടന്ന് നശിക്കുന്നു; നടപടിക്കായി ആവശ്യം

നെടുമങ്ങാട്, 2026 ജൂൺ 14 –

വനിതാ വികസന പദ്ധതിയുടെ ഭാഗമായി നെടുമങ്ങാട് ബ്ലോക്ക് പഞ്ചായത്ത് സമൃദ്ധി പദ്ധതി പ്രകാരം വാങ്ങിയ നാൽപ്പതിലധികം വാഹനങ്ങൾ ഗുണഭോക്താക്കൾക്ക് കൈമാറാതെ ബ്ലോക്ക് പഞ്ചായത്ത് ഓഫീസിന്റെ പിന്നാമ്പുറത്ത് ഉപയോഗശൂന്യമായി കിടക്കുന്നതായി പരാതി. ബ്ലോക്ക് പഞ്ചായത്ത് ഓഫീസിന് സമീപം ഹരിത കർമ സേനയ്ക്കായി വാങ്ങിയ വാഹനങ്ങളും ഉപയോഗിക്കാതെ കിടന്ന് നശിക്കുന്ന നിലയിലാണ്.

കഴിഞ്ഞ ഭരണസമിതി വനിതകളുടെ ഉന്നമനം ലക്ഷ്യമിട്ട് സമൃദ്ധി പദ്ധതി നടപ്പാക്കി ലക്ഷങ്ങൾ ചെലവഴിച്ചാണ് വാഹനങ്ങൾ വാങ്ങിയത്. എന്നാൽ അർഹരായ പലരെയും ഒഴിവാക്കി ഭരണസമിതിക്ക് താൽപര്യമുള്ളവരെ മാത്രം ഗുണഭോക്താക്കളായി തെരഞ്ഞെടുത്തുവെന്ന വിമർശനം അന്നുമുതൽ ഉയർന്നിരുന്നു. ഇപ്പോൾ വാഹനങ്ങൾ കൈമാറാതെ കിടക്കുന്നതാണ് വീണ്ടും ചർച്ചയാകുന്നത്.

ബ്ലോക്ക് പഞ്ചായത്തിന്റെ കാന്റീനിന് സമീപം കിടക്കുന്ന ഓട്ടോകൾ അർഹരായ ഗുണഭോക്താക്കളെ കണ്ടെത്തി വിതരണം ചെയ്യണമെന്നാണ് വനിതാ അംഗങ്ങൾ ഉൾപ്പെടെയുള്ളവരുടെ ആവശ്യം. വിവിധ പദ്ധതികൾക്കായി വാങ്ങിയ കാർഷിക ഉപകരണങ്ങൾ, നിലം ഉഴുതെടുക്കാനുള്ള ടില്ലർ ഉൾപ്പെടെയുള്ള യന്ത്രസാമഗ്രികളും ബ്ലോക്ക് പഞ്ചായത്ത് ഓഫീസിന് ചുറ്റും ഉപയോഗിക്കാതെ കിടക്കുന്നതായി പരാതിയുണ്ട്. ഇവ അടിയന്തരമായി ഗുണഭോക്തൃ സമിതികൾക്കോ ഉപഭോക്താക്കൾക്കോ കൈമാറാൻ നടപടി സ്വീകരിക്കണമെന്ന ആവശ്യവും ശക്തമായിട്ടുണ്ട്.