വയനാട്ടിൽ ഷിഗെല്ല സ്ഥിരീകരിച്ചു; കർശന നിരീക്ഷണവും ക്ലോറിനേഷൻ നടപടികളും ശക്തമാക്കും

കൽപ്പറ്റ, 2026 ജൂൺ 9 –

വയനാട്ടിൽ രണ്ടുപേർക്ക് ഷിഗെല്ല രോഗബാധ സ്ഥിരീകരിച്ചതിനെ തുടർന്ന് ആരോഗ്യ വകുപ്പ് കൂടുതൽ ജാഗ്രതാ നടപടികൾ സ്വീകരിച്ചു. പഞ്ചായത്ത് തലത്തിൽ അവലോകന യോഗങ്ങൾ ചേരാനും കിണറുകളിൽ ക്ലോറിനേഷൻ ഡ്രൈവ് നടത്താനും നിർദേശം നൽകിയതായി മന്ത്രി ടി സിദ്ദിഖ് അറിയിച്ചു. കോളിയാടിക്ക് സമീപ പഞ്ചായത്തുകളിലും മുനിസിപ്പാലിറ്റികളിലും പ്രത്യേക പരിശോധന നടത്തും. 12 വിദ്യാഭ്യാസ സ്ഥാപനങ്ങളെ പ്രത്യേക നിരീക്ഷണത്തിലാക്കുകയും ആരോഗ്യസംഘങ്ങൾ സന്ദർശനം നടത്തുകയും ചെയ്യും.

നിലവിൽ സ്ഥിതി നിയന്ത്രണവിധേയമാണെന്ന് മന്ത്രി ടി സിദ്ദിഖ് വ്യക്തമാക്കി. സ്കൂളുകളിൽ പ്രത്യേക മെഡിക്കൽ സംഘത്തിന്റെ പരിശോധന നടത്തും. ഡിസ്ചാർജ് ചെയ്ത ചില കുട്ടികൾക്കും രോഗലക്ഷണങ്ങൾ തുടരുന്ന സാഹചര്യത്തിൽ സ്കൂളുകളിൽ നിന്നുള്ള സാമ്പിളുകൾ വീണ്ടും പരിശോധനയ്ക്ക് അയക്കും. ആദിവാസി ഉന്നതികളിലും പരിശോധന നടത്തും. പരിശോധനകൾ കൂടുതൽ സമഗ്രമാക്കാൻ ആരോഗ്യ പ്രവർത്തകർക്ക് നിർദേശം നൽകുമെന്നും മന്ത്രി പറഞ്ഞു. ഷിഗെല്ല രോഗബാധയിൽ അതീവ ജാഗ്രത പാലിക്കണമെന്ന് ആരോഗ്യ വകുപ്പ് മന്ത്രി കെ മുരളീധരനും മുന്നറിയിപ്പ് നൽകി.

മന്ത്രി ടി സിദ്ദിഖിന്റെ നേതൃത്വത്തിൽ നടന്ന യോഗത്തിൽ, 21 സാമ്പിളുകൾ പരിശോധനയ്ക്ക് അയച്ചതിൽ രണ്ടെണ്ണത്തിലാണ് ഷിഗെല്ല സ്ഥിരീകരിച്ചതെന്ന് ജില്ലാ മെഡിക്കൽ ഓഫീസർ അറിയിച്ചു. ഇതുവരെ 443 പേർ രോഗലക്ഷണങ്ങളുമായി ചികിത്സ തേടിയിട്ടുണ്ട്. നിലവിൽ 68 പേർ ആശുപത്രികളിൽ ചികിത്സയിലാണ്. ഇതിൽ 26 പേർ ബത്തേരി താലൂക്ക് ആശുപത്രിയിലും 42 പേർ മറ്റ് ആശുപത്രികളിലുമാണ്. 14 പേർക്ക് പുതുതായി രോഗലക്ഷണങ്ങൾ കണ്ടെത്തിയിട്ടുണ്ട്. ആരോഗ്യ പ്രവർത്തകരുൾപ്പെടെ 163 പേർ നിരീക്ഷണത്തിലാണ്. മാർ ബസേലിയോസ് എ യു പി സ്കൂളിലെ മുഴുവൻ വിദ്യാർത്ഥികളെയും നിരീക്ഷണത്തിലാക്കിയിട്ടുണ്ട്. മലിനജലത്തിലൂടെയും മലിനമായ ഭക്ഷണത്തിലൂടെയുമാണ് ഷിഗെല്ല ബാക്ടീരിയ പകരുന്നത്. വയറിളക്കം, പനി, വയറുവേദന, ഛർദ്ദി എന്നിവയാണ് പ്രധാന രോഗലക്ഷണങ്ങൾ. രോഗലക്ഷണങ്ങൾ കണ്ടാൽ ഉടൻ സമീപ ആരോഗ്യ കേന്ദ്രത്തിൽ ചികിത്സ തേടണമെന്നും ആരോഗ്യ വകുപ്പ് നിർദേശിച്ചു.