സെക്രട്ടേറിയറ്റിൽ മാധ്യമ നിയന്ത്രണം തുടരുന്നു; നോർത്ത് ഗേറ്റ് വീണ്ടും അടച്ചു

തിരുവനന്തപുരം, 2026 ജൂൺ 9 –

മുഖ്യമന്ത്രിയുടെ ഓഫീസ് പ്രവർത്തിക്കുന്ന സെക്രട്ടേറിയറ്റിലെ നോർത്ത് ബ്ലോക്കിൽ ഏർപ്പെടുത്തിയ പ്രവേശന നിയന്ത്രണങ്ങൾ മറ്റ് ഓഫീസുകളിലേക്കും വ്യാപിപ്പിച്ചു. സെക്രട്ടേറിയറ്റിലെ പ്രധാന പ്രവേശന കവാടമായ നോർത്ത് ഗേറ്റ് ബാരിക്കേഡ് വെച്ച് അടച്ചിരിക്കുകയാണ്. സർക്കാർ അംഗീകൃത അക്രഡിറ്റേഷനുള്ള മാധ്യമപ്രവർത്തകരെ പോലും പ്രത്യേക അനുമതിയില്ലാതെ അകത്ത് പ്രവേശിപ്പിക്കേണ്ടതില്ലെന്ന നിർദേശമാണ് സുരക്ഷാ ഉദ്യോഗസ്ഥർക്ക് നൽകിയിരിക്കുന്നതെന്ന് റിപ്പോർട്ടുകൾ പറയുന്നു.

പൊതുസന്ദർശകർക്കായി ഏർപ്പെടുത്തിയ നിയന്ത്രണങ്ങളുടെ ഭാഗമായാണ് നിലവിലെ നടപടികൾ നടപ്പാക്കുന്നതെന്നാണ് സർക്കാർ നിലപാട്. ബന്ധപ്പെട്ട വകുപ്പിന്റെ പ്രത്യേക ശുപാർശ ഇല്ലാതെ പ്രവേശനം അനുവദിക്കേണ്ടതില്ലെന്നും നിർദേശമുണ്ട്. സന്ദർശക സമയം വൈകിട്ട് മൂന്ന് മണി മുതൽ അഞ്ച് മണി വരെ മാത്രമായി പരിമിതപ്പെടുത്തിയിട്ടുണ്ട്. പാസ് എടുത്തോ അകത്തുള്ള ഓഫീസുകളിൽ നിന്ന് സുരക്ഷാ ഗേറ്റിലേക്ക് എത്തുന്ന ഫോൺവിളിയുടെ അടിസ്ഥാനത്തിലോ മാത്രമാണ് പ്രവേശനം അനുവദിക്കുന്നത്.

പിണറായി വിജയൻ സർക്കാരിന്റെ കാലത്ത് സെക്രട്ടേറിയറ്റിൽ മാധ്യമങ്ങൾക്ക് നിയന്ത്രണം ഏർപ്പെടുത്തിയതിനെതിരെ അന്നത്തെ പ്രതിപക്ഷ നേതാവായിരുന്ന വി ഡി സതീശൻ ശക്തമായ വിമർശനം ഉന്നയിച്ചിരുന്നു. സമര കവാടം എന്നറിയപ്പെടുന്ന നോർത്ത് ഗേറ്റിലെ നിയന്ത്രണത്തെയും അദ്ദേഹം ചോദ്യം ചെയ്തിരുന്നു. അധികാരത്തിലെത്തിയ ശേഷം നോർത്ത് ഗേറ്റ് തുറന്നതിനെ കുറിച്ച് വി ഡി സതീശൻ സാമൂഹിക മാധ്യമത്തിൽ പ്രതികരിക്കുകയും ചെയ്തിരുന്നു. പത്ത് വർഷത്തിന് ശേഷമാണ് നോർത്ത് ഗേറ്റ് തുറക്കുന്നതെന്ന് മാധ്യമങ്ങൾ പറയുന്നുവെന്നായിരുന്നു അദ്ദേഹത്തിന്റെ കുറിപ്പ്. എന്നാൽ അന്ന് തുറന്ന സമര കവാടം ഇപ്പോൾ വീണ്ടും അടച്ചിരിക്കുന്നതാണ് ശ്രദ്ധേയമായത്.