ഡെറാഡൂൺ, 2026 ജൂൺ 9 –
ഉത്തരാഖണ്ഡിലെ ഖത്തിമ പട്ടണത്തിലെ ഇസ്ലാം നഗർ പ്രദേശത്ത് വിവാഹച്ചടങ്ങിനിടെ സ്ത്രീധനത്തെ ചൊല്ലിയുണ്ടായ തർക്കത്തിനിടെ വധുവിന്റെ പിതാവ് സാദിഖ് ഹൃദയാഘാതത്തെ തുടർന്ന് മരിച്ചു. സംഭവത്തെ തുടർന്ന് വിവാഹവേദി സംഘർഷഭരിതമായി. വധുവിന്റെ ബന്ധുക്കളും നാട്ടുകാരും പ്രതിഷേധവുമായി രംഗത്തെത്തുകയും വരന്റെ സംഘത്തെ തടഞ്ഞുവയ്ക്കുകയും ചെയ്തു.
ഇസ്ലാം നഗറിൽ താമസിക്കുന്ന കോൺട്രാക്ടർ സാദിഖിന്റെ മകളുടെ വിവാഹച്ചടങ്ങിനിടെയാണ് സംഭവം. വിവാഹം ഉറപ്പിച്ചതുമുതൽ വരന്റെ കുടുംബം കൂടുതൽ സ്ത്രീധനം ആവശ്യപ്പെട്ടിരുന്നതായി വധുവിന്റെ കുടുംബം ആരോപിച്ചു. ആദ്യം സ്കൂട്ടർ മതിയെന്ന് പറഞ്ഞ ശേഷം ബൈക്ക് ആവശ്യപ്പെട്ടതായും പിന്നീട് ഒരു ലക്ഷം രൂപ കൂടി ആവശ്യപ്പെട്ടതായും ബന്ധുക്കൾ ആരോപിച്ചു. ഇതിനിടെ മെഹർ തുകയെ ചൊല്ലിയും തർക്കമുണ്ടായി. വധുവിന്റെ കുടുംബം അഞ്ച് ലക്ഷം രൂപ ആവശ്യപ്പെട്ടപ്പോൾ 21,000 രൂപയിൽ കൂടുതൽ നൽകാൻ വരന്റെ കുടുംബം തയ്യാറായില്ലെന്നാണ് വിവരം. ചർച്ചകളും മധ്യസ്ഥ ശ്രമങ്ങളും നടന്നെങ്കിലും പ്രശ്നം പരിഹരിക്കാനായില്ല. ഇതിനിടെയാണ് സാദിഖ് കുഴഞ്ഞുവീണത്. ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. കടുത്ത മാനസിക സമ്മർദമാണ് മരണകാരണമെന്ന് ബന്ധുക്കൾ ആരോപിച്ചു.
സാദിഖിന്റെ മരണവാർത്ത അറിഞ്ഞതോടെ പ്രതിഷേധം ശക്തമായി. പ്രകോപിതരായ നാട്ടുകാരും ബന്ധുക്കളും വരൻ മുഹമ്മദ് ആരിഫ്, സഹോദരൻ മുഹമ്മദ് ഖാലിദ്, സഹോദരി ഭർത്താവ് അതാ ഹുസൈൻ എന്നിവരെയും മറ്റ് അതിഥികളെയും ആക്രമിക്കുകയും തടഞ്ഞുവയ്ക്കുകയും ചെയ്തു. പലരും വിവാഹഹാളിന്റെ മേൽക്കൂരയിലൂടെ രക്ഷപ്പെടാൻ ശ്രമിച്ചു. ഇതിനിടെ മേൽക്കൂരയുടെ ഒരു ഭാഗം തകർന്നുവീണ് നിരവധി പേർക്ക് പരിക്കേറ്റു. വിവരം അറിഞ്ഞ ഖത്തിമ കോട്വാലി പൊലീസ് സ്ഥലത്തെത്തി സ്ഥിതിഗതികൾ നിയന്ത്രണവിധേയമാക്കി. മേഖലയിൽ ക്രമസമാധാനം നിലനിർത്താൻ പൊലീസ് വിന്യസിച്ചിട്ടുണ്ട്.
