കോഴിക്കോട്, 2026 ജൂൺ 6 –
കോഴിക്കോട് മെഡിക്കൽ കോളജിൽ പ്രസവസമയത്ത് കുഞ്ഞിനെ പുറത്തെടുക്കുന്നതിനിടെ നവജാത ശിശുവിന്റെ കൈ ഒടിഞ്ഞെന്ന് കുടുംബത്തിന്റെ പരാതി. കുഞ്ഞിനെ മാതാപിതാക്കൾക്ക് കാണിക്കുന്നതിന് മുമ്പുതന്നെ കൈയിൽ പ്ലാസ്റ്റർ ഇട്ടിരുന്നുവെന്നും കുടുംബം ആരോപിച്ചു. കഴിഞ്ഞ മേയ് 14നാണ് പ്രസവം നടന്നത്. കുഞ്ഞിനെ പുറത്തെടുക്കുന്നതിനിടെയുണ്ടായ പിഴവാണ് കൈയിലെ എല്ല് പൊട്ടാൻ കാരണമായതെന്നാണ് കുടുംബത്തിന്റെ ആരോപണം.
“ഷോൾഡർ” എന്ന് പറഞ്ഞുകൊണ്ടാണ് കുഞ്ഞിനെ പുറത്തെടുത്തതെന്ന് അമ്മ പ്രതികരിച്ചു. കുഞ്ഞിനെ പുറത്തെടുത്ത ഉടൻ തന്നെ പീഡിയാട്രിക് ഡോക്ടറുടെ അടുത്തേക്ക് കൊണ്ടുപോയതായും കുടുംബം പറയുന്നു. തുടർന്ന് അടുത്ത ദിവസം മാത്രമാണ് കുഞ്ഞിന്റെ മുഖം പോലും കാണാൻ കഴിഞ്ഞത്. അപ്പോഴാണ് കുഞ്ഞിന്റെ കൈയിൽ പ്ലാസ്റ്റർ ഇട്ടിരിക്കുന്നതും ശ്രദ്ധയിൽപ്പെട്ടതെന്നാണ് കുടുംബത്തിന്റെ വിശദീകരണം.
സംഭവത്തിൽ ആശുപത്രി അധികൃതർക്കും പോലീസിനും കുടുംബം പരാതി നൽകിയിട്ടുണ്ട്. പ്രസവസമയത്ത് എന്താണ് സംഭവിച്ചതെന്നും കുഞ്ഞിന് പരിക്കേറ്റ സാഹചര്യം എന്താണെന്നും സംബന്ധിച്ച് അന്വേഷണം ആവശ്യപ്പെട്ടാണ് പരാതി നൽകിയിരിക്കുന്നത്. സംഭവത്തിൽ ആശുപത്രി അധികൃതരുടെ പ്രതികരണം ലഭ്യമായിട്ടില്ല.
