തിരുവഞ്ചൂരിന് മുഖ്യമന്ത്രിയുടെയും പിണറായിയുടെയും അഭിനന്ദനം

“നിഷ്പക്ഷമായി സഭ നയിക്കുമെന്ന പ്രതീക്ഷ” എന്ന് പിണറായി വിജയൻ

തിരുവനന്തപുരം | മേയ് 22

കേരള നിയമസഭയുടെ പുതിയ സ്പീക്കറായി തെരഞ്ഞെടുത്ത തിരുവഞ്ചൂർ രാധാകൃഷ്ണനെെ അഭിനന്ദിച്ച് മുഖ്യമന്ത്രി വി. ഡി. സതീശനും പ്രതിപക്ഷ നേതാവ് പിണറായി വിജയനും . ദീർഘകാല രാഷ്ട്രീയവും നിയമസഭാ പ്രവർത്തനപരിചയവും ഉള്ള നേതാവാണ് തിരുവഞ്ചൂരെന്നും സഭയെ കാര്യക്ഷമമായി നയിക്കുമെന്ന വിശ്വാസമുണ്ടെന്നും ഇരുവരും പറഞ്ഞു.

സ്പീക്കർ തെരഞ്ഞെടുപ്പിന് പിന്നാലെ നിയമസഭയിലാണ് അഭിനന്ദന പ്രസംഗങ്ങൾ നടന്നത്. തിരുവനന്തപുരത്ത് ചേർന്ന സഭാസമ്മേളനത്തിനിടെയായിരുന്നു മുഖ്യമന്ത്രിയും പ്രതിപക്ഷ നേതാവും തിരുവഞ്ചൂരിനെ കുറിച്ചുള്ള അഭിപ്രായങ്ങൾ പങ്കുവെച്ചത്.

തിരുവഞ്ചൂർ രാധാകൃഷ്ണനെ ഏറെ പ്രിയങ്കരനായ ജ്യേഷ്ഠ സഹോദരനെന്നാണു മുഖ്യമന്ത്രി വിശേഷിപ്പിച്ചത്. ഒരു നിയമസഭാംഗം മണ്ഡലത്തിലും സഭയിലും എങ്ങനെ പ്രവർത്തിക്കണം എന്നതിന് മികച്ച മാതൃകയാണ് അദ്ദേഹം എന്നും മുഖ്യമന്ത്രി പറഞ്ഞു. കഴിഞ്ഞ മൂന്നര പതിറ്റാണ്ടായി സഭാംഗമായിരുന്ന തിരുവഞ്ചൂരിന് എല്ലാ വകുപ്പുകളെയും കുറിച്ചും വ്യക്തമായ അറിവുണ്ടെന്നും ജനഹിതം മുൻനിർത്തി തീരുമാനമെടുക്കുന്ന നേതാവാണെന്നും വി. ഡി. സതീശൻ പറഞ്ഞു.

യുവജന രാഷ്ട്രീയകാലത്ത് തീപ്പൊരി നേതാവായിരുന്ന തിരുവഞ്ചൂരിന് വേണ്ടി വിദ്യാർഥിയായിരിക്കെ മുദ്രാവാക്യം വിളിച്ച ഓർമ്മ ഇന്നും മനസിലുണ്ടെന്നും മുഖ്യമന്ത്രി കൂട്ടിച്ചേർത്തു. അതേസമയം ദീർഘകാല ഭരണ-നിയമസഭാ പരിചയമാണ് തിരുവഞ്ചൂരിന്റെ ശക്തിയെന്ന് പിണറായി വിജയൻ പറഞ്ഞു. വിവിധ വകുപ്പുകളുടെ ചുമതല വഹിച്ച അനുഭവം അദ്ദേഹത്തിനുണ്ടെന്നും വിദ്യാർഥി രാഷ്ട്രീയകാലം മുതൽ സമ്പാദിച്ച അനുഭവങ്ങൾ സഭയിലെ ഇടപെടലുകൾക്ക് ഗുണകരമാകട്ടെയെന്നും പിണറായി ആശംസിച്ചു.

സ്പീക്കർ സ്ഥാനത്ത് ഇരിക്കുമ്പോൾ നിഷ്പക്ഷത ഏറ്റവും പ്രധാനമാണെന്നും “ബാറ്റിംഗ് സൈഡ് നിയമിച്ച അമ്പയർ” എന്ന വിമർശനം വരാത്ത രീതിയിൽ പ്രവർത്തിക്കുമെന്നാണ് പ്രതീക്ഷയെന്നും പിണറായി വിജയൻ വ്യക്തമാക്കി. പുതിയ രാഷ്ട്രീയ സാഹചര്യത്തിൽ ഭരണപക്ഷവും പ്രതിപക്ഷവും ഒരുപോലെ ശ്രദ്ധിക്കുന്ന നിലപാടായാണ് ഈ പരാമർശത്തെ രാഷ്ട്രീയ വൃത്തങ്ങൾ കാണുന്നത്.