ന്യൂഡൽഹി  / 2026  /  നവംബർ 14

നാൽപ്പത്തിയഞ്ചാമത് ഇന്ത്യ അന്താരാഷ്ട്ര വ്യാപാരമേളയ്ക്ക് ന്യൂഡൽഹിയിലെ ഭാരത് മണ്ഡപത്തിൽ തുടക്കമായി. കേന്ദ്ര വാണിജ്യ വ്യവസായ മന്ത്രി പീയൂഷ് ഗോയൽ മേള ഉദ്ഘാടനം ചെയ്തു. ഇന്ത്യയുടെ സ്വതന്ത്ര വ്യാപാര കരാറുകൾ തുറന്നുനൽകുന്ന അവസരങ്ങൾ പ്രയോജനപ്പെടുത്തി അന്താരാഷ്ട്ര വിപണികളിൽ സാന്നിധ്യം വിപുലപ്പെടുത്തണമെന്ന് അദ്ദേഹം ആവശ്യപ്പെട്ടു. വ്യവസായികൾ, ഉൽപ്പാദകർ, കയറ്റുമതിക്കാർ, കരകൗശല തൊഴിലാളികൾ, സംരംഭകർ എന്നിവരോടായിരുന്നു ആഹ്വാനം. വികസിത രാജ്യങ്ങളിലെ വിപണികൾ ഇന്ത്യൻ ഉൽപ്പന്നങ്ങൾക്കും സേവനങ്ങൾക്കുമായി തുറക്കുകയാണ്. ഈ അവസരങ്ങൾ ഉപയോഗപ്പെടുത്തി 2047ഓടെ ഇന്ത്യയെ വികസിത രാജ്യമാക്കാനുള്ള യാത്രയിൽ പങ്കാളികളാകണമെന്നും മന്ത്രി പറഞ്ഞു.

2026 ഒക്ടോബറിൽ ഇന്ത്യയുടെ കയറ്റുമതി ഏകദേശം 9,000 കോടി ഡോളറിലെത്തി സർവകാല റെക്കോഡ് കുറിച്ചതായി ഗോയൽ അറിയിച്ചു. ഇതിൽ ഏകദേശം 5,000 കോടി ഡോളർ ചരക്ക് കയറ്റുമതിയും 4,000 കോടി ഡോളർ സേവന കയറ്റുമതിയുമാണ്. ഇത് ചരിത്രനേട്ടമാണെന്ന് അദ്ദേഹം വിശേഷിപ്പിച്ചു. നടപ്പുവർഷം ഒരു ലക്ഷം കോടി ഡോളറിന്റെ കയറ്റുമതിയെന്ന ലക്ഷ്യത്തിലേക്ക് രാജ്യം മുന്നേറുകയാണ്. ഒക്ടോബർ വരെയുള്ള ആദ്യ ഏഴ് മാസങ്ങളിൽ കയറ്റുമതി 57,000 കോടി ഡോളറിലെത്തി. ഇതും അഭൂതപൂർവമായ നേട്ടമാണെന്ന് മന്ത്രി പറഞ്ഞു.

രണ്ട് യുദ്ധങ്ങൾ തുടരുകയും ആഗോളതലത്തിൽ അസ്ഥിരതയും അനിശ്ചിതത്വവും നിലനിൽക്കുകയും ചെയ്യുന്ന സാഹചര്യത്തിലാണ് ഈ മുന്നേറ്റം. അന്താരാഷ്ട്ര വ്യാപാര വളർച്ച ഏകദേശം 3.5 ശതമാനത്തിൽ ഒതുങ്ങുമെന്നാണ് പ്രതീക്ഷ. എന്നിട്ടും നടപ്പുവർഷം ഇന്ത്യയുടെ അന്താരാഷ്ട്ര വ്യാപാരം 15 മുതൽ 16 ശതമാനം വരെ വളരുമെന്ന് ഗോയൽ ആത്മവിശ്വാസം പ്രകടിപ്പിച്ചു. ഇന്ത്യൻ സമ്പദ്‌വ്യവസ്ഥയുടെ കരുത്തും കയറ്റുമതിക്കാരുടെ ആത്മവിശ്വാസവുമാണ് ഈ പ്രകടനത്തിൽ പ്രതിഫലിക്കുന്നത്. ആഗോള വെല്ലുവിളികളെ നിശ്ചയദാർഢ്യത്തോടെയും ആത്മാഭിമാനത്തോടെയും നേരിടാനുള്ള രാജ്യത്തിന്റെ കഴിവും ഇത് വ്യക്തമാക്കുന്നതായി അദ്ദേഹം പറഞ്ഞു.

സംസ്ഥാനങ്ങളുടെ കരുത്തും അറുനൂറ് സ്റ്റാർട്ടപ്പുകളുടെ പുതുമകളും

ഇന്ത്യയുടെ അഞ്ച് പ്രധാന വശങ്ങളാണ് ഇത്തവണത്തെ വ്യാപാരമേള അവതരിപ്പിക്കുന്നതെന്ന് മന്ത്രി പറഞ്ഞു. സമ്പദ്‌വ്യവസ്ഥ, കയറ്റുമതി, അടിസ്ഥാനസൗകര്യ വളർച്ച, 140 കോടി ജനങ്ങൾ സൃഷ്ടിക്കുന്ന വിപണി ആവശ്യകത, രാജ്യത്തിന്റെ സമ്പന്നമായ വൈവിധ്യം എന്നിവയാണവ. പ്രധാനമായും ഡൽഹിയെ കേന്ദ്രീകരിച്ചിരുന്ന ഒരു പരിപാടി എന്ന നിലയിൽനിന്ന് മേള വളർന്നു. രാജ്യത്തെ സംസ്ഥാനങ്ങളെയും വ്യവസായങ്ങളെയും ഉൽപ്പന്നങ്ങളെയും കഴിവുകളെയും ഒരുമിപ്പിക്കുന്ന വേദിയായി ഇത് മാറിയെന്നും അദ്ദേഹം പറഞ്ഞു.

ഈ വർഷം അവതരിപ്പിച്ച പുതിയ സംരംഭങ്ങളും ഗോയൽ വിശദീകരിച്ചു. മുപ്പതിലധികം സംസ്ഥാനങ്ങളും കേന്ദ്രഭരണ പ്രദേശങ്ങളും തങ്ങളുടെ കരുത്ത് മേളയിൽ പ്രദർശിപ്പിക്കുന്നു. 3,500ലധികം പ്രദർശകരും 11 രാജ്യങ്ങളിൽനിന്നുള്ള പങ്കാളിത്തവുമുണ്ട്. ‘ഒരു ജില്ല, ഒരു ഉൽപ്പന്നം’ പവിലിയനിൽ രാജ്യത്തിന്റെ വിവിധ ഭാഗങ്ങളിൽനിന്നുള്ള ഉൽപ്പന്നങ്ങൾ അവതരിപ്പിക്കും. കല, കരകൗശലം, കൈത്തറി, ഭക്ഷ്യോൽപ്പന്നങ്ങൾ എന്നീ മേഖലകളിലെ ഇന്ത്യയുടെ കരുത്താണ് ഇതിലൂടെ വ്യക്തമാക്കുന്നത്.

മേളയിലെ മറ്റൊരു പ്രധാന ആകർഷണമായ ‘ഹാൾ ഓഫ് ഇൻസ്പിറേഷനി’ൽ 600 സ്റ്റാർട്ടപ്പുകളും അവയുടെ നൂതന ആശയങ്ങളും അവതരിപ്പിക്കും. മേളയെക്കുറിച്ചുള്ള മുഴുവൻ വിവരങ്ങളും സന്ദർശകർക്ക് മൊബൈൽ ആപ്പിലൂടെ ലഭിക്കും. പ്രദർശനവേദികളിലേക്കുള്ള വഴി കണ്ടെത്താനും താൽപ്പര്യമുള്ള പ്രദർശകരെ തിരിച്ചറിയാനും ആപ്പ് സഹായിക്കും. ഭാരത് മണ്ഡപത്തിലുടനീളം വ്യാപിച്ചുകിടക്കുന്ന പ്രദർശനം പൂർണമായി കാണാൻ രണ്ടോ മൂന്നോ ദിവസം മാറ്റിവയ്ക്കേണ്ടിവരുമെന്നും മന്ത്രി പറഞ്ഞു.

ഭാരത് മണ്ഡപത്തിന്റെ അടുത്തഘട്ട വിപുലീകരണം സർക്കാർ ഉടൻ ആരംഭിക്കുമെന്നും ഗോയൽ പ്രഖ്യാപിച്ചു. ഇതോടെ പ്രദർശകർക്ക് ലഭ്യമായ പ്രദർശനസ്ഥലം ഏകദേശം ഇരട്ടിയാകും. ഇന്ത്യ അന്താരാഷ്ട്ര വ്യാപാരമേള ഉൾപ്പെടെയുള്ള സമീപകാല പ്രദർശനങ്ങളുടെ വിജയം വർധിച്ചുവരുന്ന ആവശ്യകത വ്യക്തമാക്കുന്നു. നിലവിൽ ഗണ്യമായി വിപുലീകരിച്ച സൗകര്യങ്ങൾപോലും ഈ ആവശ്യം നിറവേറ്റാൻ മതിയാകാത്ത സ്ഥിതിയാണെന്നും മന്ത്രി പറഞ്ഞു.

ഇന്ത്യ അന്താരാഷ്ട്ര വ്യാപാരമേളയെ ഇനി ലോകത്തിന്റെ വിവിധ ഭാഗങ്ങളിലേക്ക് എത്തിക്കുമെന്നും അദ്ദേഹം അറിയിച്ചു. ഇന്ത്യ ട്രേഡ് പ്രമോഷൻ ഓർഗനൈസേഷൻ ഇതിനായി നിരവധി അന്താരാഷ്ട്ര മേളകൾ ആസൂത്രണം ചെയ്യുകയാണ്. പ്രത്യേക മേഖലകൾക്കായുള്ള മേളകളും വിവിധ മേഖലകളെ ഒരുമിപ്പിക്കുന്ന മേളകളും ഇതിലുണ്ടാകും. ഇന്ത്യൻ ഉൽപ്പന്നങ്ങൾക്കും സേവനങ്ങൾക്കും സ്റ്റാർട്ടപ്പുകൾക്കും കഴിവുകൾ അവതരിപ്പിക്കാനും വിദേശ വിപണികളുമായി ബന്ധപ്പെടാനും ഇവ അവസരമൊരുക്കും. വികസിത രാജ്യങ്ങൾക്കും മറ്റു അന്താരാഷ്ട്ര വിപണികൾക്കും പുറമേ, ഇന്ത്യ സ്വതന്ത്ര വ്യാപാര കരാറുകളിൽ ഏർപ്പെട്ട രാജ്യങ്ങൾക്ക് പ്രത്യേക പ്രാധാന്യമുണ്ടാകും. ഈ സംരംഭങ്ങളിൽ സജീവമായി പങ്കെടുത്ത് ഇന്ത്യയുടെ ആഗോള ഇടപെടലുകൾക്ക് കരുത്തേകണമെന്ന് വ്യവസായികളോടും പ്രദർശകരോടും മന്ത്രി ആവശ്യപ്പെട്ടു.

ഗുണമേന്മയും പരിസ്ഥിതി സംരക്ഷണവും ഒരുമിച്ച് മുന്നോട്ട്

ഗുണമേന്മയും സുസ്ഥിരതയുമാണ് ഇന്ത്യ ശ്രദ്ധിക്കേണ്ട രണ്ട് പ്രധാന കാര്യങ്ങളെന്ന് ഗോയൽ പറഞ്ഞു. ഉൽപ്പന്നങ്ങളിൽ തകരാറുകളില്ലാതെയും പരിസ്ഥിതിക്ക് ദോഷമുണ്ടാക്കാതെയും പ്രവർത്തിക്കുന്ന ‘സീറോ ഡിഫെക്ട്, സീറോ ഇഫെക്ട്’ സമീപനം സ്വീകരിക്കണം. രാജ്യത്തുടനീളം തുല്യവും എല്ലാവരെയും ഉൾക്കൊള്ളുന്നതുമായ വളർച്ച ഉറപ്പാക്കാൻ ഇത് സഹായിക്കും. ഇന്ത്യയിൽ നിർമിക്കുന്ന ഓരോ ഉൽപ്പന്നവും ഉയർന്ന ഗുണമേന്മ പുലർത്തണം. അന്താരാഷ്ട്ര വിപണികളിൽ ഇന്ത്യയുടെ വിശ്വാസ്യത ശക്തിപ്പെടുത്തുന്നതാകണം അവയെന്നും മന്ത്രി പറഞ്ഞു.

ഉൽപ്പാദനത്തിലും സേവനങ്ങളിലും ഉയർന്ന ഗുണനിലവാര മാനദണ്ഡങ്ങൾ സ്വീകരിക്കണമെന്നും അദ്ദേഹം ആവശ്യപ്പെട്ടു. അതോടൊപ്പം സുസ്ഥിരമായ പ്രവർത്തനരീതികളും പിന്തുടരണം. വിഭവങ്ങൾ പുനരുപയോഗിക്കുന്ന ചാക്രിക സമ്പദ്‌വ്യവസ്ഥ പ്രോത്സാഹിപ്പിക്കണം. പ്രകൃതിദത്ത ഉൽപ്പന്നങ്ങൾ ഉപയോഗിക്കുകയും ജൈവമായി വിഘടിക്കുന്ന ഉൽപ്പന്നങ്ങൾക്ക് കൂടുതൽ പ്രാധാന്യം നൽകുകയും വേണം. പരിസ്ഥിതിക്ക് ദോഷമുണ്ടാക്കാതെ സാമ്പത്തിക വളർച്ച ഉറപ്പാക്കാനായാൽ അന്താരാഷ്ട്ര വിപണികൾ നേടാനുള്ള മത്സരത്തിൽ ഇന്ത്യയ്ക്ക് മുന്നിലെത്താനാകും. ജനങ്ങളുടെ സമൃദ്ധി വർധിപ്പിക്കാനും ഇത് സഹായിക്കുമെന്ന് അദ്ദേഹം പറഞ്ഞു.

ആഭ്യന്തര സമ്പദ്‌വ്യവസ്ഥയുടെ വളരുന്ന കരുത്തിന് ഉദാഹരണമായി സമീപകാല ഉത്സവവിപണിയിലെ സജീവത മന്ത്രി ചൂണ്ടിക്കാട്ടി. ദീപാവലി, ഗോവർധന പൂജ, ഭായ് ദൂജ്, നവരാത്രി, ദസറ, ധൻതേരസ് ആഘോഷക്കാലങ്ങളിൽ ശക്തമായ വ്യാപാരമാണ് നടന്നത്. രാജ്യത്തുടനീളമുള്ള കടകളിൽ ഉപഭോക്തൃ ആവശ്യകത ഉയർന്നു. വ്യാപാരവും ഗണ്യമായി വർധിച്ചു. ഒക്ടോബറിലെ ജി എസ് ടി വരുമാനം ആ മാസത്തെ സർവകാല റെക്കോഡിലെത്തിയിട്ടുണ്ട്. നവംബറിലും റെക്കോഡ് വരുമാനം ലഭിക്കുമെന്നാണ് പ്രതീക്ഷയെന്നും മന്ത്രി പറഞ്ഞു.

സമ്പദ്‌വ്യവസ്ഥയിലെ എല്ലാ വിഭാഗങ്ങളും രാജ്യത്തിന്റെ മുന്നേറ്റത്തിന് സംഭാവന നൽകുന്നതാണ് ഈ വളർച്ചയുടെ കരുത്തെന്ന് ഗോയൽ വ്യക്തമാക്കി. കർഷകർ, മത്സ്യത്തൊഴിലാളികൾ, തൊഴിലാളികൾ, സൂക്ഷ്മ ചെറുകിട ഇടത്തരം സംരംഭങ്ങൾ, ഉൽപ്പാദകർ, സേവനദാതാക്കൾ, കലാകാരന്മാർ, കരകൗശല തൊഴിലാളികൾ, കൈത്തറി–കരകൗശല ഉൽപ്പാദകർ എന്നിവരെല്ലാം വളർച്ചയും ആത്മവിശ്വാസവും പ്രകടിപ്പിക്കുന്നു. സമീപത്തെ പലചരക്ക് കടകൾ മുതൽ ഓൺലൈൻ വ്യാപാര സ്ഥാപനങ്ങൾവരെയും കരകൗശല തൊഴിലാളികൾ മുതൽ പ്രമുഖ ബ്രാൻഡുകൾവരെയും വികസിക്കുന്ന സാമ്പത്തിക അവസരങ്ങളുടെ നേട്ടം പ്രതീക്ഷിക്കുകയാണെന്നും അദ്ദേഹം പറഞ്ഞു.

പുതിയ കയറ്റുമതി വഴികൾ; ലക്ഷ്യം വികസിത ഇന്ത്യ

ഇന്ത്യയിലെ യുവസംരംഭകരും വ്യവസായങ്ങളും കൂടുതലായി ആഗോള വിപണികളിലേക്ക് കടക്കുകയാണെന്ന് മന്ത്രി പറഞ്ഞു. അവർ ഉൽപ്പാദനം വിപുലീകരിക്കുകയും മികച്ച ഭാവിയിലേക്ക് നോക്കുകയും ചെയ്യുന്നു. പുതിയ കയറ്റുമതി അവസരങ്ങൾക്ക് ഉദാഹരണമായി അരുണാചൽ പ്രദേശിൽനിന്നുള്ള കിവി കയറ്റുമതി അദ്ദേഹം ചൂണ്ടിക്കാട്ടി. നേരത്തേ അവിടെനിന്നുള്ള കയറ്റുമതി നിസ്സാരമായിരുന്നു. കുളുവിലെ സിന്ദൂരി മാതളനാരങ്ങകൾ ദുബായിലെത്തുന്നതും അദ്ദേഹം പരാമർശിച്ചു.

കയറ്റുമതിക്ക് സാധ്യതയുള്ള ഉൽപ്പന്നങ്ങൾ കണ്ടെത്തണമെന്ന് മേളയിലെ പ്രദർശകരോടും വ്യവസായികളോടും ഗോയൽ ആവശ്യപ്പെട്ടു. ഇന്ത്യയുടെ സ്വതന്ത്ര വ്യാപാര കരാറുകളിലൂടെ ലഭിക്കുന്ന അവസരങ്ങൾ പ്രയോജനപ്പെടുത്തണം. അന്താരാഷ്ട്ര വിപണികൾ ഇപ്പോൾ തുറന്നിരിക്കുകയാണ്. അവിടേക്ക് പ്രവേശിക്കാൻ ഇന്ത്യൻ വ്യവസായങ്ങൾ മുൻകൈയെടുക്കണമെന്നും അദ്ദേഹം പറഞ്ഞു.

മെച്ചപ്പെട്ട ജീവിതനിലവാരവും വിദ്യാഭ്യാസവും ആരോഗ്യപരിചരണവും ആഗ്രഹിക്കുന്ന യുവജനതയാണ് ഇന്ത്യയുടെ വളർച്ചയ്ക്ക് കരുത്തേകുന്നത്. കഴിവുകളും പ്രതിഭയും വികസിപ്പിക്കാൻ കൂടുതൽ അവസരങ്ങളും അവർ തേടുന്നു. പന്ത്രണ്ട് വർഷത്തിനിടെ ഏകദേശം 50 കോടി ആളുകളെ അതിദാരിദ്ര്യത്തിൽനിന്ന് കരകയറ്റാൻ ഇന്ത്യയ്ക്ക് കഴിഞ്ഞതായി മന്ത്രി പറഞ്ഞു. ഇത് രാജ്യത്തുടനീളമുള്ള ജനങ്ങളിൽ നേട്ടത്തിന്റെ ബോധവും കൂടുതൽ മികച്ച ഭാവിയിലേക്കുള്ള പ്രതീക്ഷയും സൃഷ്ടിച്ചു.

ലോകത്തിന്റെ വിവിധ ഭാഗങ്ങളിലെ സംഘർഷങ്ങളും അനിശ്ചിതത്വങ്ങളും തുടരുമ്പോഴും ഇന്ത്യ ആഗോള പ്രതിസന്ധികളെ ആത്മവിശ്വാസത്തോടെ നേരിടുകയാണെന്ന് ഗോയൽ പറഞ്ഞു. വ്യാപാരം, സാമ്പത്തിക വളർച്ച, ജനങ്ങളുടെ ക്ഷേമം എന്നിവയിലാണ് രാജ്യം ശ്രദ്ധ കേന്ദ്രീകരിക്കുന്നത്. ഉറച്ച തീരുമാനങ്ങളെടുക്കുന്ന നേതൃത്വവും വളരുന്ന സാമ്പത്തിക കരുത്തുമാണ് ഈ ആത്മവിശ്വാസത്തിന് കാരണമെന്നും അദ്ദേഹം വ്യക്തമാക്കി.

നിലവിൽ നാല് ലക്ഷം കോടി ഡോളറുള്ള ഇന്ത്യൻ സമ്പദ്‌വ്യവസ്ഥയെ 2047ഓടെ 30 ലക്ഷം കോടി ഡോളറിലെത്തിക്കാനാണ് ലക്ഷ്യം. ഇന്ത്യ സ്വാതന്ത്ര്യത്തിന്റെ നൂറാം വാർഷികം ആഘോഷിക്കുന്ന വർഷമാണത്. യുവജനതയും വിപുലീകരിക്കുന്ന വ്യവസായങ്ങളും വളരുന്ന കയറ്റുമതിശേഷിയും വികസിത ഭാരതം എന്ന ലക്ഷ്യം കൈവരിക്കുന്നതിൽ പ്രധാന പങ്കുവഹിക്കുമെന്നും മന്ത്രി പറഞ്ഞു.

പൈതൃകം സംരക്ഷിച്ചുള്ള വികസനം; ലോകത്തിന് മുന്നിൽ പുതിയ ഇന്ത്യ

വികസനത്തിനൊപ്പം ഇന്ത്യയുടെ പൈതൃകവും പാരമ്പര്യങ്ങളും സംരക്ഷിക്കേണ്ടതിന്റെ പ്രാധാന്യവും ഗോയൽ ചൂണ്ടിക്കാട്ടി. ഈ വർഷത്തെ വ്യാപാരമേളയുടെ പ്രമേയം ഇന്ത്യയുടെ മുന്നേറ്റത്തെ ഉചിതമായി പ്രതിഫലിപ്പിക്കുന്നു. പൈതൃകത്തോടുള്ള ആദരവില്ലാതെ വികസനം പൂർണമാകില്ല. സമൃദ്ധി കൈവരിച്ച വികസിത രാജ്യങ്ങൾ തങ്ങളുടെ പാരമ്പര്യവും പൈതൃകവും സംസ്കാരവും സംരക്ഷിക്കുകയും പ്രോത്സാഹിപ്പിക്കുകയും വളർത്തുകയും ചെയ്തിട്ടുണ്ടെന്നും അദ്ദേഹം പറഞ്ഞു.

നോർത്ത് ബ്ലോക്ക്–സൗത്ത് ബ്ലോക്ക് സമുച്ചയത്തിൽ ലോകത്തിലെ ഏറ്റവും വലിയ മ്യൂസിയമായ ‘യുഗേ യുഗീൻ ഭാരത് മ്യൂസിയം’ സ്ഥാപിക്കാൻ അടുത്തിടെ നൽകിയ അംഗീകാരവും മന്ത്രി പരാമർശിച്ചു. ഇന്ത്യയുടെ വൈവിധ്യവും നീണ്ട ചരിത്രവും ആയിരക്കണക്കിന് വർഷങ്ങളായി ലോകത്തിന് നൽകിയ സംഭാവനകളും സമ്പന്നമായ സാംസ്കാരിക പൈതൃകവും പാരമ്പര്യങ്ങളും ആഗോള സമൂഹത്തിന് മുന്നിൽ അവതരിപ്പിക്കേണ്ടതിന്റെ പ്രാധാന്യം പ്രധാനമന്ത്രി നരേന്ദ്ര മോദി തിരിച്ചറിഞ്ഞിട്ടുണ്ടെന്ന് ഗോയൽ പറഞ്ഞു.

ഒരുകാലത്ത് ആഗോള സമ്പദ്‌വ്യവസ്ഥയിൽ ഇന്ത്യയുടെ സംഭാവന 30 ശതമാനത്തിലധികമായിരുന്നുവെന്നും അദ്ദേഹം ചൂണ്ടിക്കാട്ടി. രാജ്യത്തിന്റെ ഭൂതകാലം മനസ്സിലാക്കുകയും അംഗീകരിക്കുകയും ചെയ്യേണ്ടത് അനിവാര്യമാണ്. ലോകരാജ്യങ്ങൾക്കിടയിൽ ഇന്ത്യയ്ക്ക് അർഹമായ സ്ഥാനം വീണ്ടെടുക്കാനും വികസിത ഇന്ത്യയെന്ന ലക്ഷ്യം സാക്ഷാത്കരിക്കാനും അത് സഹായിക്കും. നോർത്ത് ബ്ലോക്ക്–സൗത്ത് ബ്ലോക്ക് സമുച്ചയത്തിൽ വികസിപ്പിക്കുന്ന മ്യൂസിയം ഇന്ത്യയുടെ ചരിത്രവും പാരമ്പര്യവും ലോകത്തിന് നൽകിയ സംഭാവനകളും അവതരിപ്പിക്കുമെന്ന് മന്ത്രി ആത്മവിശ്വാസം പ്രകടിപ്പിച്ചു. ഭാവിതലമുറകൾക്ക്, പ്രത്യേകിച്ച് യുവജനങ്ങൾക്ക്, ഇത് പ്രചോദനമാകുമെന്നും അദ്ദേഹം പറഞ്ഞു.

ചെറിയ മെച്ചപ്പെടുത്തലുകൾക്കപ്പുറം, വികസിത ഭാരതം 2047 എന്ന ലക്ഷ്യത്തിലേക്ക് വലിയൊരു ചുവടുവയ്പാണ് നാൽപ്പത്തിയഞ്ചാമത് വ്യാപാരമേള നടത്തിയിരിക്കുന്നതെന്ന് ഗോയൽ വ്യക്തമാക്കി. മേള പുതിയ മാതൃക സൃഷ്ടിക്കുമെന്നാണ് പ്രതീക്ഷ. ഇന്ത്യ ലോകത്തിന് മുന്നിൽ സ്വയം അവതരിപ്പിക്കുന്നതിലും അന്താരാഷ്ട്ര വിപണികളുമായി ഇടപെടുന്നതിലും പുതിയൊരു കാലഘട്ടത്തിന് ഇത് തുടക്കമാകും. ഇന്ത്യൻ ഉൽപ്പന്നങ്ങൾ, സേവനങ്ങൾ, കല, സംസ്കാരം എന്നിവയുടെ പ്രചാരണത്തിനും മേള വഴിതുറക്കും.

സംസ്ഥാന സർക്കാരുകളുമായും മറ്റ് കേന്ദ്ര മന്ത്രാലയങ്ങളുമായും ഏകോപിപ്പിച്ച് ഇന്ത്യ ട്രേഡ് പ്രമോഷൻ ഓർഗനൈസേഷനും വാണിജ്യ വ്യവസായ മന്ത്രാലയവും സംരംഭങ്ങൾ മുന്നോട്ടുകൊണ്ടുപോകും. സർക്കാരിന്റെ വിവിധ വിഭാഗങ്ങൾ ഒന്നിച്ചുപ്രവർത്തിക്കുന്ന ഈ സമീപനം ഇന്ത്യൻ വ്യവസായികൾക്കും സംരംഭകർക്കും ലോകമെമ്പാടും കൂടുതൽ അവസരങ്ങൾ സൃഷ്ടിക്കുമെന്ന് മന്ത്രി പറഞ്ഞു. നാൽപ്പത്തിയഞ്ചാമത് ഇന്ത്യ അന്താരാഷ്ട്ര വ്യാപാരമേള ഔദ്യോഗികമായി തുറന്നതായി പ്രഖ്യാപിച്ച അദ്ദേഹം, രാജ്യത്തിന്റെ സാമ്പത്തിക പുരോഗതിക്കും ആഗോള ഇടപെടലുകൾക്കും എല്ലാവരും സജീവ സംഭാവന നൽകണമെന്ന് ആഹ്വാനം ചെയ്തു.

.